Read lubukusu Esek. 41 Bible Online

Esek. 41 - lubukusu bible

Esek. 41

¹Nio omundu oyo aambila mu lusiro lwe akari, abuundu atakatifu aapiima bubalaayi bwe ngila eyingilamo; yaba chimita chitaru khucha asi,

²ne chimita chiraano bubalaayi, ne kamasiisi ke silibwa chimita chibili ne nusu buboofu chimbeka chombi, Aapiima lusiro, lwaba chimita kamakhumi kabili buleeyi ne chimita likhumi bukhiikha.

³Nio aacha mu lusiro lwe mukari lukali, mala aapiima engila akari we chisiro; yaba emita ndala khucha asi, ne chimita chitaru bubalaayi, ne kamasiisi chimbeka chombi che buboofu chimita chitaru ne nusu.

⁴Aapiima bubalaayi bwe lusiro olwo; lwaba chimita ekhumi buli lubeka. Lusiro luno lwaba aleeyi khukhilakho lwe akari. Mala aamboolela ali, “Ano ali abuundu atakatifu po!”

⁵Omundu oyo aapiima buboofu bwe lisiisi lie mukari lie Lukaangu; lioola chimita chitaru. Mwisiisi muno mwoosi mwabaamo biiyu bitiiti bibiabotookhelesia Lukaangu, bubalaayi chimita chibili.

⁶Biiyu bino biaba biakelekhana khataru, ne chisiro kamakhumi kataru khu buli koroofa. Lisiisi lie nje lie Lukaangu khu buli koroofa liaba linyelele khukhila ekoroofa eye asi. Nio liaba bali biiyu bino binyale khukhwiima bulayi ne bikheaambile khwisiisi lie Lukaangu tawe.

⁷Ne khwako kamasiisi ke Lukaangu, ne olola khukhwama enje, kalolekhana oli manya ne kalekhaana bubalaayi khukhwama asi khukhwola khu ngaaki. Embi ne kamasiisi ke Lukaangu, enje we biiyu, bombakha engila eye bikele eye khuniinilakho khubotookhelela Lukaangu nio linyalikhane bulayi khucha khu ngaaki ne khukhwiikha khu koroofa eye asi.

⁸Lisiisi lie enje lie biiyu bino liaba bubalaayi chimita chibili ne nusu. Kwabao kumuliango mulala kucha mu biiyu bibiaba ebunaswa we Lukaangu ne kukuundi elubeka lwe siafubo. Nio nabona engila yaba bubalaayi chimita chibili ne nusu yabotookheleele Lukaangu. Yaba chimita chitaru khukhwama khwiloba, yaba yalekhaana ne kumusiingi kwe biiyu bibiaba mwisiisi lie Lukaangu. Akari we ngila ne chinju nicho basaayi barumikhiranga, sibaanga siabao chimita ekhumi khubotookhelela Lukaangu buli lubeka.

¹²Ebweeni we sibaanga lubeka lwe mumbo lwe Lukaangu, enju yabaayo eye buleeyi chimita kamakhumi kane na chiraano ne bukhiikha chimita kamakhumi kataru na chiraano. Lisiisi liaba buboofu chimita chibili ne nusu khubotookhelela buli lubeka.

¹³Omundu oyo aapiima enje we Lukaangu; lwaba buleeyi chimita kamakhumi karaano. Ne khukhwama enyuma we Lukaangu, khubira sibaanga khukhwola khu ndulo khwe lubeka lwe mumbo, lwosi lwaba buleeyi chimita kamakhumi karaano.

¹⁴Bubalaayi ebweeni we ebukwe we Lukaangu, ne oraakho sibaanga buli lubeka, lwosi lwaba chimita kamakhumi karaano.

¹⁵Omundu oyo aapiima buleeyi bwe nju elubeka lwe mumbo, ne oraakho chingila che lusiro chimbeka chombi; chosi chaba chimita kamakhumi karaano. Mu lwe mu Lukaangu akari ne lusiro lwe mukari lukali, ne lusiro lwe khufwaruriramo lwe khu ndulo;

¹⁶oosi arebwakho chimbao khukhwama asi khu bwelu khukhwola khu matirisia, kamatirisia kano kanyala beele kafuunikhwa.

¹⁷Khukhwola mu numa angaaki we kumuliango, akhaba mu lusiro lwe mukari, ne nje. Ne khu masiisi koosi khubotookhelela lusiro lwe mukari nende akari we Lukaangu; bibiindu bibiabeechwa biabaao bibialoondekhana bulayi.

¹⁸Biaba bifwaana kamakheendu ne chikerubi. Kamakheendu ne chikerubi bialoondekhananga khukhwama khu sino ne khuucha khu siindi, khwaba khurio busa khubotookhelela enju yoosi. Buli kerubi yaba ne bubweeni bubili:

¹⁹bubweeni bwo mundu bubwaloleelela kumukheendu lubeka lulala, ne bubweeni bwe talang'i bubwaloleelela emukheendu lubeka luluundi. Biabeechwa khubotookhelesia Lukaangu lwoosi,

²⁰khukhwama asi khu bwelu khukhwola angaaki we kumuliango, chikerubi ne kimikheendu biabeechwa khwisiisi.

²¹Bisiindi bie kumuliango kwe akari we Lukaangu biaba bilekhaana chimbeka choosi. Ebweeni we abuundu atakatifu, sisiindu siabao sisiafwaana nga

²²alutare eye chimbao. Siaba emita ndala ne nusu khucha angaaki nende emita ndala bubalaayi. Mu koona, asi ne chimbeka choosi chaba chakholwa ne chimbao. Omundu oyo aamboolela ali, “Yino eli emesa ebechanga ebweeni wo Mwami Wele.”

²³Akari we Lukaangu nende abuundu atakatifu ombi aaba ne kumuliango kukwakabukhasibwamo akari.

²⁴Khwako buli muliango kwaba kunyala kwekulilwa akari ne kulola chimbeka chombi.

²⁵Chikerubi ne kimikheendu abeele biabeechwa khu miliango kie akari we Lukaangu. Biaba bifwaana nga bie khwisiisi; lulama lwe chimbao lwaba ebweeni lusiro lwe khukhwefwaruriramo lubeka lwe nje.

²⁶Mu mbeka che chisiro chino, kamatirisia kamatiiti kabaamo ne kimikheendu buli lubeka khu masiisi ke lusiro lwe khukhwefwaruriramo.