Read lubukusu Esek. 43 Bible Online

Esek. 43 - lubukusu bible

Esek. 43

¹Enyuma wako, omundu oyo, aandeera esilibwa sisialoleelela ebukwe.

² Abwenao nabona luyali lwa Wele owa Isiraeli khukhwama ebukwe, ne liiuliilikhana liewe liaba nga kameechi kamakali ne kaoloola, ne sibala siakhosia khulwe luyali lwewe.

³Kamalola niko nabona kaba nga kamalola niko nabona ne eecha khukhwonakaka lukoba lwa Yerusalemu, lundi nga kamalola niko nabona ne ndi khu luuchi lwa Chebari; mala nakwa asi mafuumala.

⁴Nga luyali lwa Wele Omunyali owa Bioosi ne lwecha mu Lukaangu khubirira mu silibwa sisialoleelela ebukwe.

⁵Roho wa Wele Omunyali Owa Bioosi aaniinia mu ngaaki mala aandeera khu luya lwe mukari; mala luyali lwa Wele Omunyali owa Bioosi lwechula mu Lukaangu.

⁶Omundu oyo eema embi nase; nio naulila Wele Omunyali owa Bioosi ne andomalomakho khukhwama mu Lukaangu.

⁷Amboolela ali, “Mwana wo mundu, abuundu ano ali abuundu we ndebe yase eye bubwami, abuundu niio Ese nda bikele biase. Ese khamenye ano mu baandu ba Isiraeli mala mbamiie buli lwoosi. Se balibao babaandu mu Isiraeli namwe babaami babwe bakhafwolobie lisina liase litakatifu khulwe khusaaya bawele babaandi namwe khulwe khusiikha babaami babwe abuundu ano tawe.

⁸Babaami bombakhila kamachipi kabwe siimbi ne Lukaangu lwase lutakatifu, lisiisi liong'ene liaba likhukabukhania. Bafwolobia lisina liase litakatifu ne bibiindu biisinya nibio bakholanga, nio mu lirima liase nababunia.

⁹Luno khukhwola balekhe khusaaya bawele babaandi ne khurusiao kimibili kie babaami babwe kibe aleeyi khukhwama niio ndi. Ne bakhola bario Ese khamenye ne nabo buli lwoosi.”

¹⁰Nio Wele Omunyali Owa Bioosi aachiililila khuloma ali, “Mwana wo mundu, yinoosielia babaandu ba Isiraeli khuloondekhana ne Lukaangu nga luli, lekha bapiime ne baloonda nga lwombakhwa mala baambwe chisoni khulwe bumayaanu bwabwe.

¹¹Baaba ne baambwa chisoni khu niko bakholile, benoosiele nga Lukaangu ne luli, nga lwamela, bilibwa bibiingila nende biirura, buli siindu nga sili, ne kamalaka kalwo. Baandikile koosi asi, nio babone nga buli siindu ne siarekekhwa mala baloonde kamarekeka koosi ne kamalaka koosi.

¹²Lino nilio lilaka lie Lukaangu: Buli abuundu lukoongo lulwabotookhelela Lukaangu khu sikulu khu ngaaki ali atakatifu lukali.”

¹³ Sino nisio sipiimo sia alutare, khurumikhira sipiimo sisiene nisio barumikhira khupiima Lukaangu. Lukaangu lwoosi asi, lwaba ne lubachangu chisendimita kamakhumi karaano khucha asi ne chisendimita kamakhumi karaano bubalaayi alala ne sikiingi khu ndulo chisendimita kamakhumi kabili na chiraano khucha angaaki.

¹⁴Lubeka lwe asi bukali bwe alutare khukhwama khu musiingi yaba emita ndala khucha angaaki. Siseenge siloondakho siaba chisendimita kamakhumi karaano chimbeka choosi ne chimita chibili khucha angaaki. Siseenge siloondakho siosi siaba busa nga sitaayi chisendimita kamakhumi karaano buli lubeka.

¹⁵Lubeka lwe angaaki luno, niio biianwa bioselwangwa, lwosi lwaba chimita chibili khucha angaaki. Chinjika choosi chine che mu koona chaba khukhila chimbeka chichiindi choosi.

¹⁶Khungaaki khwa alutare, khwaba khwatekanilila busa chimbeka choosi, chimita sita buli lubeka.

¹⁷Akari osi aba atekanilila busa chimbeka choosi, chimita saba buli lubeka ne lunika chisendimita kamakhumi kabili na chiraano khucha mu ngaaki. Lubachangu lulabaao, chisendimita kamakhumi karaano bubalaayi. Engila eecha khu alutare yabaao; bikele biayo bie khuniinilakho bialola lubeka lwe ebukwe.

¹⁸ Omwami WELE omunyali owa bioosi amboolela ali, “Mwana wo mundu, kano niko kamalaka ka alutare. Khu ndaalo niyo bakhombakhile alutare eye khuaana biianwa bie khukhwosieliakho ne khuchukhakho kamalasile.

¹⁹Basaayi be kholo eya Satoki nibo bong'ene babenyekha beeche khusaaya ebweeni wase. Ese Omwami WELE ndoma ndi mukhabaelesie euunwa endoro eaanwe nga embosio eye khurusiao bubwoni.

²⁰Mulabukula kamalasile kayo matiiti kari mala mukare khu njika chine cha alutare, ne mu koona akari ne khu lukina. Mu ngila yino, mukhakwalaasie alutare ne khukitakaasa.

²¹Lundi mukhabukule euunwa eye mbosio eye khurusiao bubwoni mala mwosiele abuundu niio muroboore embi ne Lukaangu enje we abuundu atakatifu.

²²Endaalo eye khabili, mukhaane endurume ekhalikho buubi bwosi bwosi tawe khuuba siianwa sie khurusiao bubwoni. Alutare ekhatakaaswe nga yatakaaswa ne uunwa.

²³Nga mwamalile khukhola murio mulabukula euunwa ekhalikho ne buubi bwosi bwosi tawe, muaane nga siianwa nende limiiku khukhwama mwituuli likhalikho buubi bwosi bwosi tawe.

²⁴Mulabira ebweeni wa Wele Omunyali Owa Bioosi, mala basaayi balara chumbe khu nyama echo mala bosie nga siianwa sie khukhwosia khu Wele Omunyali Owa Bioosi.

²⁵Khu ndaalo saba mulaana embusi buli ndaalo khulwe siianwa sie khurusia bubwoni; lundi euunwa ne limiiku biikhalikho buubi bwosi bwosi tawe bilaanwa.

²⁶Khu ndaalo saba mulaana siianwa sie khurusiao bubwoni khu alutare ne khukitakaasa; khwako mulakira alubeka khu Mwami Wele.”

²⁷Omwami WELE aloma ali, “Ne mumalile chindaalo chino, nio khukhwama endaalo eya munaane khuchiililila, basaayi bakhaane khu alutare biianwa bie khukhwosia nende bie kumuleembe, ne Ese ndamufukiilila enywe.”