Read lubukusu Esek. 44 Bible Online

Esek. 44 - lubukusu bible

Esek. 44

¹Nio omundu oyo aambila khu silibwa sie nje, siaba lubeka lwe bukwe lwe Lukaangu. Silibwa esio siaba sisiikale.

²Aamboolela ali, “Silibwa sino silarama sisiikale, se silekulibwa tawe, se aliio olabiriramo tawe. Sikila Wele Omunyali Owa Bioosi, Wele owa Isiraeli abiriiremo; khwako silarama sisiikale.

³Omwami yeng'ene niye oonyala ekhalamo mala aliilamo siakhulia ebweeni wa Wele Omunyali Owa Bioosi. Alengilamo ne khurura mu silibwa siicha mukari.”

⁴Nio omundu oyo ambisilia mu silibwa sie bunaswa ebweeni we Lukaangu; nalola mala nabona luyali lwa Wele Omunyali Owa Bioosi lwechuule Lukaangu lwa Wele Omunyali Owa Bioosi; mala nakwa mafumala.

⁵Nio Wele Omunyali Owa Bioosi amboolela ali, “Mwana wo mundu, lola bulayi, bona ne chimoni chowo wamwene, ulila ne kamaru kowo koosi niko nja khu khuboolela khuloondekhana ne bulayi bwabo banyala bafukiililwa mu Lukaangu nende abo bakhafukiililwamo tawe.

⁶“Boolela babaandu ba Isiraeli be sileka oli, Ese Omwami WELE Omunyali Owa Bioosi, se ndekhaliilikha bibiindu biibi nibio bakholanga ebio tawe.

⁷Banyaalutiisie Lukaangu lwase khulwe khufukiilila bakeni, babaandu bakhafukiilila Ese tawe, khukhwingila abuundu wase atakatifu; siise nisio balikho baaana khwise siakhulia siase, kiminawa ne kamalasile. Babaandu base, bafunake endakaano yase khulwe khukhola bibiindu biibi bino.

⁸Se bemeleele kimilimo kimitakatifu kino mu Lukaangu lwase tawe, ne kakhali bafukiliile bakeni khukhwimeelela mu bweyaangu bwabwe.”

⁹Omwami WELE aloma ali, “Se aliio omundu owe sikeni, osiili khukhebwa namwe okhafukiilila Ese, oolacha mu Lukaangu lwase akhaba ne ali omukeni owamenya mu Baisiraeli tawe.”

¹⁰Wele Omunyali Owa Bioosi amboolela ali, “Ndikho mbaana siuukuumo khu Balawi abo, alala ne babaandu ba Isiraeli ba banjanjukha baacha khukhwinamila bifwaani.

¹¹Banyala bandumikhira busa mu Lukaangu, khulwe khuliinda bilibwa ne khukhola kimilimo kikiindi kie mu Lukaangu. Banyala beera chisaang'i nicho babaandu bareerire nga chimbosio che khukhwosia, mala khukhwola babe khu milimo khuyeeta babaandu.

¹²Ne sikila bemeelela babaandu ba Isiraeli mu khwinamila bifwaani, mala mu ngila yino bayila babaandu mu bumayaanu; Ese Omwami WELE nechuba ndi ndabaelesia siuukuumo.

¹³Se bandumikhira nga basaayi namwe bache embi ne sisiindu siosi siosi siili sitakatifu khwise namwe bache abuundu atakatifu lukali tawe. Sino nisio siuukuumo nisio balanyoola khuloondekhana nende niko bakhola.

¹⁴Ndikho mbaelesia kimilimo mitiiti kino bakholenge mu Lukaangu.”

¹⁵Omwami WELE aloma ali, “Ne kakhali basaayi balawi, ba okhwa Satoki, ba baaba babemeelesi mu Lukaangu lwase, siise nisio babaandu ba Isiraeli baba ne banjauukhekho, babenabo balecha mala bandumikhire, mala balaambanila kamafura ne kamalasile.

¹⁶Balengila mu Lukaangu lwase, mala besende khu mesa yase khukhundumikhira mala balaba babemeelesi.

¹⁷ Nga bengila mu bilibwa bie khucha mu nja che mukari, bakhafware chingubo cha katani, se bakhabekho ne chingubo che bufuumbo tawe, siise nisio bakhabe ne bakhola kumulimo kuno mu bilibwa bie mu luya lwe mukari nende chili siimbi.

¹⁸Bakhabe ne bilemba bia katani khu mirwe kiabwe ne chisirwari mu bibuno biabwe. Sebaleboa sisiindu siosi siosi sinyala siareera lukesi tawe.

¹⁹ Ne bacha enje we luuya niio babaandu bali balafwarura chingubo nicho babele nacho, mala bachire mu siro chindakatifu, mala bafware chingubo chabwe bakhakhola bario barera butinyu khu baandu khubirira khu ngubo chabwe tawe.

²⁰ ‘Basaayi se bakhabeke lichuune namwe balekhe lilee tawe. Khukhwola babe ne lichuune likhali lileeyi namwe liliimbi tawe.

²¹ Basaayi bakhanywakho endali yosi yosi nakhacha mu luuya lwe mukari tawe.

²² Omusaayi yesi yesi akhayila omukhasi owalekhana no museecha tawe. Khukhwola ayile omukhaana owe yabwana owe kholo eya Isiraeli namwe namulekhwa wo musaayi.’

²³ “Basaayi balasomia babaandu base bubwabukhani bwe sitakatifu ne siikhali tawe. Lundi silayi ne siibi.

²⁴Nga kamayiingamo kang'ali ne kabao basaayi bakhakhalake khuloondekhana ne kamalaka. Balaloonda naikara eye dini khuloondekhana ne kamalaka mala balaria esabato endakatifu.”

²⁵ Wele Omunyali Owa Bioosi aloma ali, “Omusaayi salenyaalutia khulwe khutiila khu mundu omufu tawe, ngeba aaba raraawe namwe maawe, omwana wewe omusoleeli namwe omukhaana, namwe wandaaye omukhaana osiili khucha mwilia.

²⁶Enyuma we khutila khu mufu, alaliinda chindaalo saba, oli chaweele aba nono alaba omukwalaafu.

²⁷Ne khu ndaalo niyo achila abuundu atakatifu, mu luuya lwe mukari khukhola kimilimo kio mwami, alaana siianwa siewe sie bumayaanu. Omwami WELE alomaloome.

²⁸ “Basaayi balaba busa ne busaayi nga kumukabwa kwabwe nikwo mbaele mu Isiraeli, khukhwama khu selukho yino khucha khu kiindi. Se balaba ne kumukabwa kwe kimiaandu tawe ese nise kumukabwa kwabwe.

²⁹Balalia biianwa bie biakhulia, biianwa bie bumayaanu, nende bie khukhweyama kamabi na buli siindu siianwa khuuba sitakatifu siikhabe sisiabwe.

³⁰ Nabuli likesa lia buli siindu lie khunyoa, na buli siianwa sia buli siindu, khukhwama mwinywe, bikhabe bie basaayi. Lundi mukhae basaayi siakhulia sie khunyoa nio chikhabi chibe ne nju yenywe.

³¹ Basaayi se bakhalie sisiindu siosi siosi sifwiile ebeele enyuni namwe esaang'i efwiile eng'ene namwe nisio esaang'i yirire tawe.”