Read lubukusu Esek. 45 Bible Online

Esek. 45 - lubukusu bible

Esek. 45

¹Ne mukabanamo kamaloba khuloondekhana nende buli kholo, sitonyi silala silaebwa khu Wele Omunyali Owa Bioosi. Kamaloba buleeyi chikilomita likhumi na chibili ne nusu, ne bukhiikha chikilomita likhumi, kano koosi kalaba kamatakatifu.

²Mu sibaanga sino, khulabao ne kamaloba ke Lukaangu buleeyi ne bukhiikha chimita chimia chibili ne kamakhumi karaano buli lubeka. Silabotookhelelwa ne bubwangu chimita kamakhumi kabili na chiraano.

³Enusu eye sino, chimita likhumi na chibili ne siwanja nusu khu mita chiraano silarusibwakho, ano niio Lukaangu lukhabe, abuundu atakatifu khukhila oosi.

⁴Ano akhabe atakatifu mu maloba aaroborwa khuuba we basaayi, bakholela OMWAMI Wele Omunyali Owa Bioosi mu Lukaangu.

⁵Enusu eramire khukhwola sirwe alubeka khu balawi nga kumukabwa kwabwe, abo baakhola kimilimo mu Lukaangu. Khukhabeo ne chingoba chabwe che khumenyamo.

⁶Khuloondela abuundu atakatifu, enusu ekiindi buleeyi chikilomita likhumi na chibili ne nusu ne bukhiikha chikilomita chibili ne nusu siikharwe alubeka khulwe lukoba ne yesi yesi Omuisiraeli anyala amenyao.

⁷Kamaloba kalarwa lundi alubeka khu mwami; khukhwama elubeka we lulwakha lwe mumbo we abuundu atakatifu khukhwola emwalo mu nyanja eya Mediterenia, ne khukhwama khu lwakha lwe bukwe, kakhoole khu ndulo khwe bukwe khwe sibala nio buleeyi bube busa nga buleeyi bwe kamaloba niko baelesia ekholo eya Isiraeli.

⁸Abuundu ano alaba sitonyi sio mwami mu sibala sia Isiraeli, nio alekhe khukhuupia siibi babaandu, ne kakhali alalekha sibala sioosi, sibe sie Baisiraeli khuloondekhana ne chikholo chabwe.

⁹Omwami WELE aloma ali, “Ee babaami ba Isiraeli, khe mwakamile ao! Lekha burafu ne khukhuupia babaandu siibi, mala mukhole bung'ali ne buluungi, lekha khuuyisia babaandu base; Ese OMWAMI Wele Omunyali Owa Bioosi nalomile.

¹⁰ “Buli mulala khukhwola arumikhire sipiimilo sia ng'ali

¹¹Efa eye khupiima siakhulia sisioomu, eleekhaana nende ebaasi eye khupiima kamafura. Biombi bili nende sitonyi silala khwikhumi sie homeri ndala.

¹²Khupiima busiro khulaba khuri: Chingera kamakhumi kabili chileekhaana nende eshekeli ndala, chishekeli kamakhumi sita chileekhaana nende emina ndala.

¹³Bino nibio bipiimilo nibio mukhaanilengekho biianwa bienywe: Sitonyi silala khu sita sie efa khukhwama mu homeri ndala eye ngaanu, nende sitonyi silala khu sita sie efa khukhwama mu homeri ndala eye shayiri.

¹⁴Sipiimo sie kamafura silaba siri: Ebaasi ndala eye kamafura khukhwama mu buli kori (ekori ndala eleekhaana nende ehomeri ndala eeli nga chibaasi ekhumi).

¹⁵Likheese lilala khukhwama mu lituuli lie kamakheese chimia chibili mumaayilwe ka Isiraeli. “Enywe mularera biianwa bie bibiaamo, biianwa bie khukhwosia, nende biianwa bie kumuleembe, nio bumayaanu bwolaane khurusibwao. Ese Wele Omunyali owa Bioosi nalomile.

¹⁶“Babaandu boosi be sibala, bakhaane biianwa bino khu mwami owe mu Isiraeli.

¹⁷Kukhabe kumulimo kwo mwami khuaana biianwa bie khukhwosia, bibiaamo bie khunywa mu chinaikara, bie kumwesi ne kubalukha, nende bie chisabato, mu buli naikara eye nju eya Isiraeli. Akhaane biianwa bie khurusiao bubwoni, biianwa bie bibiaamo, bie khukhwosia, nende bie kumuleembe, nio bumayaanu burusibwe khu nju eya Isiraeli.”

¹⁸Omwami WELE aloma ali, “Khu ndaalo eye khunyoa, khu mweesi kwe khunyoa, mulareera euunwa ekhalikho ne buubi bwosi bwosi tawe mala mukwalaasie abuundu wase atakatifu.

¹⁹Omusaayi alabukula kamalasile malala ke siianwa sie khurusio bubwoni mala akaakhe khu bisiindi bie kimiliango kie Lukaangu, khu koona chine cha alutare, ne khu bisiindi bie silibwa siicha mu luya lwe mukari.

²⁰Khu ndaalo eya saba eye kumwesi, mulakhola murio, khu buli mundu oonyala aaba ne akholile bubwoni nibwo akheteekile khukhola tawe, namwe mu khukorwa. Mu ngila yino, mukwalaasie enju yo Mwami Wele.

²¹ “Khu ndaalo eya khane eye kumwesi kwe khunyoa, mularakikha ekhoyo eye naikara eye lipasaka. Mu ndaalo saba buli mulala alalia kumukaati kukhalimo limela tawe.

²²Khu ndaalo ng'ene eyo, omwami khukhwola aane euunwa nga embosio eye khurusiao bubwoni bwewe nende bwe babaandu boosi.

²³Buli khu ndaalo mu ndaalo saba che naikara, alaana chiuunwa saba che chimbosio, ne kamamiiku saba kakhalimo buubi bwosi bwosi tawe khu Wele Omunyali Owa Bioosi mala oosie bioosi. Lundi alaana endurume buli ndaalo nga siianwa sie khurusiao bubwoni.

²⁴Khu buli uunwa nende buli limiiku nilio baanile nga embosio, mulaba ne biianwa bie efa ndala ndala eye siakhulia sisioomu nende ehini ndala eye kamafura khu buli efa eye siakhulia sisioomu.

²⁵ “Kumwesi kukhola saba, endaalo eye khumi na chiraano, khu ndaalo saba che Naikara eye Bisali echo, omwami akhaane buli ndaalo siianwa sie khurusiao bubwoni, siianwa sie khukhwosia nende sie siakhulia sisioomu alala ne kamafura.”