Read lubukusu Esek. 46 Bible Online

Esek. 46 - lubukusu bible

Esek. 46

¹Omwami WELE aloma ali, “Silibwa sie luuya lwe mukari, sisialoleelela ebukwe sikharame sisiikale khu ndaalo sita che kimilimo, ne kakhali endaalo eye sabato, ne endaalo niyo kumwesi kubalukhile sikhekulibwe.

²Omwami akhabiriremo khukhwama mu luya lwe mukari khukhwama enje, mala eme khusisiindi sie silibwa. Basaayi bakhaane siianwa sie khukhwosia nende sisiewe sie kumuleembe, lundi alasaayila embi ne silibwa. Nio ache enje, ne kakhali silibwa sesilekalwa tawe khukhwola ekolooba.

³Babaandu be sibala bakhenaamile OMWAMI Wele Omunyali owa Bioosi mu silibwa chindaalo che sabato nende chindaalo nicho kumwesi kubalukhilakho.

⁴“Khu ndaalo eya sabato omwami alareera khu Wele Omunyali Owa Bioosi kamameeme sita ne limiiku bikhalikho ne buubi bwosi bwosi tawe nga biianwa bie khukhwosia.

⁵Ne khu buli limiiku alareererakho siianwa sie siakhulia sisioomu efa ndala; bibili ebio bilaba sikelo siosi siosi nisio eenya khuaana alala nende ehini ndala eye kamafura khu buli efa eye siakhulia sisioomu.

⁶Khu ndaalo eye khukhwekhoyela kumwesi khubalukha, alaana euunwa endoro ekhalikho ne buubi bwosi bwosi tawe, alala ne kamameeme sita nende limiiku lilala bikhalikho ne buubi bwosi bwosi tawe.

⁷Ne buli uunwa nende buli limiiku bilaanwa alala nende efa ndala eye siakhulia sisioomu ne kamameeme sikelo nisio eenya, alala nende ehini ndala eye kamafura khu buli efa ndala eye siakhulia sisioomu.

⁸Omwami ne engilamo, khukhwola abirire mu silibwa sie lusiro lwe khufwaaruriramo mala alure enje khu ngila eng'ene.

⁹“Nga babaandu ne beecha khusaaya Wele Omunyali Owa Bioosi khu ndaalo yosi yosi eye khoyo, abo babengilila mu silibwa sie bunaswa, balarurira mu silibwa sie siafubo ne bamalile khusaaya. Ne abo babengilila mu silibwa sie siafubo balarurira mu silibwa sie bunaswa. Akhabakhoo yesi yesi orurira mu silibwa nisio echeelemo tawe; khukhwola arurire nikhwo akhecheele tawe.

¹⁰Omwami aleecha siise nisio babaandu bosi bechelakho lundi alarura siise nisio barurirakho.

¹¹Khu ndaalo cha naikara ne khukhwekhoya, siianwa sie siakhulia sisioomu silaba efa ndala nende euunwa ne limiiku, ne sikelo siosi siosi eenya khuaana alala nende ehini ndala eye kamafura khu buli efa ndala eye siakhulia sisioomu.

¹²“Omwami oolikho, ne eenya khuaana siianwa sie khukhwerusia khu Wele Omunyali Owa Bioosi nga siianwa sie khukhwosia namwe sie kumuleembe, silibwa sie bukwe nisio bengilila mu luya lwe mukari, sileekulwa abiriremo. Alaana siianwa mu ngila niyo aanilangamo khu ndaalo eya sabato, ne silibwa sileekalwa ne amalile khururiramo.”

¹³Wele Omunyali Owa Bioosi aloma ali, “Buli mutikhinyi limeeme liili kumwiiko mulala liikhali ne buubi bwosi bwosi tawe, liloosibwa lioosi nga siianwa khu Wele Omunyali Owa Bioosi. Siianwa sino khukhwola sirusibwe buli ndaalo.

¹⁴Lundi siianwa sie siakhulia sisioomu buli mutikhinyi, sitonyi silala khu sita sie efa eye buufu, nende sitonyi silala khu bitaru sie hini eye kamafura khuolaosia buufu. Kamalaka ke siianwa sino kali ke biise bioosi.

¹⁵Khwako limeeme, buufu, ne kamafura, bilaanwa buli mutikhinyi nga siianwa sie khukhwosia sia buli khase.”

¹⁶Omwami WELE aloma ali, “Omwami ne aana kamaloba khu mwana wewe owe siseecha nga kumukabwa kwewe, kalaba kakewe; sikila kali kumukabwa kwe nju yabwe.

¹⁷ Ne kakhali omwami ne aana kamaloba khu mukholi wewe yesi, kalaba kakewe khukhwola kumwiiko kwewe kwe khueebwa bulekhuule mala kamaloba ako kakobolele omwami oyo. Babaana bewe bong'ene niibo banyala baaba nako biise bioosi.

¹⁸Omwami akhabukulakho ne kamaani kamaloba ke kumukabwa kosi kosi khu mundu tawe. Kamaloba niko aelesia omwana wewe khukhwola kabe niko omwene yesi aeebwa, nio akhaapia siibi babaandu base khulwe khubanuula kamaloba tawe.”

¹⁹Nio omundu oyo aambisilia khu ngila eyaba alubeka we silibwa, ebunaswa we chisiro che basaayi chindakakatifu chichaloondekhana. Aanjekesia abuundu lubeka lwe mumbo lwe chisiro

²⁰mala aaloma ali, “Abuundu ano niio basaayi bakhateekhele chinyama nicho baanile nga siianwa sie bumayaanu namwe siianwa sie khurusiao bubwoni, ne khuteekha siianwa sie siakhulia sisioomu, nio sisiindu siosi siosi siili sitakatifu sikhasutwakho siacha enje khu luuya lwe enje niyo sinyala siaumisia babaandu tawe.”

²¹Nio omundu oyo lundi aandeera khu luya lwe enje, mala andangirira khukhwola mu koona chine che luuya, mala buli koona yaba ne luuya lwayo;

²²mu koona chine che luuya chitekanilila, buli koona yaba ne luuya litiiti, buleeyi chimita kamakhumi kabili, ne bukhiikha chimita ekhumi na chiraano.

²³Buli luuya lutiiti lulala lwaba lwabotookhelesibwa ne khasiisi khe kamabaale ne kamaika asi we khasiisi.

²⁴Omundu chana aamboolela ali, “Chino chili chichikoni nicho bakholi be mu Lukaangu bakhateekhelemo biianwa nibio babaandu baana.”