Read lubukusu Esek. 47 Bible Online

Esek. 47 - lubukusu bible

Esek. 47

¹ Nio omundu oyo aangobosia mu silibwa sie Lukaangu. Kameechi beele kalikho karura asi we luuya lwe Lukaangu mala kacha lubeka lwe bukwe, sikila Lukaangu lwaloleelela ebukwe. Kameechi kakhulukukhanga ne kaloonda lubeka lwe siafubo we luuya lwe Lukaangu, siafubo we alutare.

²Omundu oyo aambila enje we Lukaangu khubirira mu silibwa sie bunaswa, mala ambotookhelesia khukhwola mu silibwa sisialoleelela ebukwe. Kameechi kaba beele karurira lubeka lwe siafubo.

³Omundu oyo apiima ne sipiimilo chimita chimia chiraano buleeyi khucha asi lubeka lwe bukwe, mala aambisilia mu meechi ako. Kameechi koola busa mu kheng'engele.

⁴Nio aapiima lundi chimita chimia chiraano mala aambisilia mu meechi ako. Kameechi koola mu masikamo. Lundi aapiima chimita chichiindi chimia chiraano, mala aambisilia mu meechi ako. Kameechi koola mu sibuno.

⁵Lundi aapiima chimita chimia chiraano, ne abwenao lwaba luluuchi nilwo khaanyala khukhwambukha tawe. Lwaba lusiba lukali mbo se onyala khukhwambukha busa ne okhasokile tawe.

⁶Aamboolela ali, “Mwana wo mundu, loleelela bino bioosi bulayi bubwene.” Nio omundu oyo, aangobosia khu lukuku lwe luluuchi,

⁷ne nga noolakho nabona kimirongooro kimikali khu lukuku chimbeka chombi.

⁸Aamboolela ali, “Kameechi kano kabira mu sibala khukhwola ebukwe mala koola mu litooma lia Yoritani ne khuchukha mu Nyanja eya Chumbe. Ne nga koola mu nyanja, kakaluukhania kameechi ka chumbe ne kaba kameechi kamalayi.

⁹Osi osi niio luluuchi lucha, khukhabe ne chisaang'i cha buli lukano ne ching'eeni. Luluuchi luno lulakhola kameechi ke Nyanja eya Chumbe kabe kamalayi, ne osi osi niio kacha kalareerao bulamu.

¹⁰Khukhwama khu sebele cha Engedi khukhwola khu sebele cha Engalaimu, khukhabe ne balobi khu ndulo khwe nyanja, mala bakhaanikhile chindiimba chabwe ao. Khukhabe ne ching'eeni chingali cha buli lukano nga chiili mu nyanja eya Mediterenia.

¹¹Ne kakhali kameechi ke lureende ne kamatiisi kaali khu ndulo khwe nyanja se kakhabe kamalayi tawe. Kakharameo busa kabe nga sinoko sia chumbe.

¹² Khu ndulo khwe luluuchi, kimirongooro kikhamelekho kia buli lukano kibe kie siakhulia. Kamasaafu kakio se kaliniaala tawe, ne se kililekha khukhwama kamatuunda tawe. Kikhabe ne kamatuunda kamaana buli mwesi, sikila kinyoolanga kameechi khukhwama mu Lukaangu. Kimirongooro kikhaame kamatuunda, ne kamasaafu nako kakhabe kamalesi.”

¹³Omwami WELE aloma ali, “Chino nicho chinjakha che sibala, siikhakabwemo khu kholo ekhumi na chibili, ne kholo eya Yosefu ekhanyoole chimbeka chibili.

¹⁴Ese nalakiilisa bakukaao lukali ndi khabaelesie sibala sino; nono kabana buleekhaane.

¹⁵“Luno nilwo lulaba lulwakha lwe sibala: Ebunaswa, khukhwama khu nyanja eya Mediterenia, khubirira khu lukoba lwa Hetiloni, khukhwola Hamatipasi ne khuchiililila khukhwola khu lukoba lwa Setati.

¹⁶Khukhwama ao lulacha mu ngoba cha Berota ne Siburaimu (luli akari wa Damasika ne Hamati) khukhwola khu lukoba lwa Haseri-hatikoni luuli khu lwakha lwa Haurani.

¹⁷Khwako lulwakha lulaama Mediterenia ne kucha engaaki khukhwola khu lukoba lwa Hasari-enoni, luuli ebunaswa we lulwakha lwa Damasika, ne lulwakha ebunaswa.

¹⁸“Lubeka lwe bukwe, akari wa Haurani ne Damasika, khuloonda luluuchi lwa Yoritani akari we sibala sia Isiraeli lubeka lwe mumbo ne Kileati, khukhwola Tamari khu Nyanja eya chumbe.

¹⁹“Lulwakha lwe siafubo lulaamila Tamari khukhwola abuundu we kameechi mu Meriba-kateshi. Ne lubeka lwe akari we siafubo ne mumbo, embi ne lulwakha lwa Misiri khukhwola khu nyanja eya Mediterenia.

²⁰“Lulwakha lwe lubeka lwe mumbo lulaba enyanja eya Mediterenia mala luniine luche ebunaswa khukhwola abuundu e aaloleelana ne abuundu khukhwingila mu Lebo-hamati.

²¹“Khwako mulakabana sibala sino khuloondekhana ne chikholo chenywe cha Isiraeli.

²²Silaba kumukabwa kwenywe buli lwosi. Baakwa bosi bamenyile nanywe, babasaalila babaana mu sibala sienywe, bosi bakhanyoole kumukabwa kwabwe ne mukabana sibala. Mukhababukule busa nga Baisiraeli basienywe mu ngila choosi, lundi mukhabaelesie kumukabwa ne khukabana nabo bulayi bwene nga ne mukabana ne Baisiraeli.

²³Baakwa babaandi ba bamumenyamo bakhanyoole kumukabwa kwabwe alala ne babaandu be kholo niyo bamenyilemo. Ese Omwami WELE nalomile.”