Read lubukusu Esek. 5 Bible Online

Esek. 5 - lubukusu bible

Esek. 5

¹Wele Omunyali Owa Bioosi aaloma ali, “Ne ewe ee Mwana wo mundu, bukula embalu enjoki, mala okirumikhire nga lubeko lwo mubeki, bisia khu murwe wibeke lichuune ne bunwanwa, lundi bukula eratili mala okabemo lichuune elio.

²Yosia khaboo khalala khu bitaru akari we lukoba, bukula khaboo khe khabili khu bitaru okhatonyakemo ne mbalu nga ne obotookheleele lukoba. Ne khaboo khamaliilisi khu bitaru okhasalanisie mu mbeo, ne ese ndaloondiakho embalu.

³Ne olabukulakho khu lino likeekhe mala oboe khu ngubo yowo.

⁴Ne khu lino olabukulakho lilala mala olimwaate mu mulilo mala olioosie. Khukhwama abwenao kumulilo kulamao kwingile mu kholo eya Isiraeli yoosi.”

⁵Omwami WELE aloma ali, “Oluno luli lukoba lwa Yerusalemu, ese nalura akari we chikholo ne bibala bialukara.

⁶Lwabeele lureengu lukali khu lilakiilisia liase khukhila chikholo chichiindi, khubiiya lilaka liase khukhila bibala bibiindi bioosi bibialukara khulwe khuloba lilakiilisia liase ne khuloba khukeendela mu lilaka liase.

⁷Khwako Omwami WELE aloma ali, Sikila enywe mwakholile sisiayuumba khukhila chikholo chichamukara, ne se mwakeendela mu malaka kase namwe mwaliinda lilakiilisia liase tawe. Ne kakhali mwakhola khuloondekhana ne lilakiilisia lie chikholo chichamukara enywe.

⁸Khwako ese Omwami WELE ndoma ndi, Ese seesi nabeele omusiku wenywe mala khakhole likhalaka liase khwinywe ebweeni we chikholo chichiindi.

⁹Sikila bibiindu bienywe bioosi nibio mukhola bili nibio ese nabiila, ndaana siuukuumo khu Yerusalemu nisio khakholakho tawe, lundi se ndikholakho ndio tawe.

¹⁰ Khwako basaasi barama mu Yerusalemu bakhalie babaana babwe ne babaana bakhalie basaasi babwe. Khamuukuume enywe balamu mala musalanisie chimbeka choosi.

¹¹“Khwako nga ese Wele omenyile mindali, Omwami WELE aloma ali, sikila mwanyaalutia Lukaangu lwase ne bubwoni bwa buli lukano, ne bibiindu bimayaanu nibio mwakhola ndamwiira ne se ndamukholelakho siisa tawe.

¹²Sitonyi silala khu bitaru mwinywe muleerwa ne lufu, ne njala. Sitonyi sia khabili khu bitaru balakwa mwiie enje we lukoba, ne sitonyi simaliilisi silasalaanila ne ese ndabaloondiakho liie.

¹³“Mulaulila busiro bwe lirima ne bukhalafu bwase khukhwola nga ndinyalikha, ne kano koosi ne kekholekha, mukhamanye muli ese, Wele Omunyali Owa Bioosi nalomaloome nanywe, sikila ndi ne lirima khu bumayaanu bwenywe.

¹⁴Khutasa khwako, babaandu be chikholo chichiindi chichamukara, ne babira, bakhamuchekheelele enywe ne khubira sinaao.

¹⁵“Nga ne khamuambile lirima, chikholo choosi chiili siimbi nanywe chikhesiindukhe. Bakhamubone mala bamuchekheelele.

¹⁶Khakhiingilile linyoola lie biakhulia bienywe mala mube ne njala. Mukhaulile burafu bwe njala oli manya ne bamulasa ne buembo.

¹⁷ Khamureerere enjala ne chisolo khukhwira babaana benywe. Kharume lufu, sisiayuumba ne liie khumwiira enywe. Ese Wele Omunyali Owa Bioosi nalomile.”