Read lubukusu Esek. 6 Bible Online

Esek. 6 - lubukusu bible

Esek. 6

¹Wele Omunyali Owa Bioosi amboolela ali,

²“Mwana wo mundu, lola e bikulu bia Isiraeli obiboolele elomo yase eye libunia.

³Boolela Baisiraeli bamenyile mu bikulu baulile elomo eyo Mwami WELE, lundi baulile niko ese Omwami WELE mboolela be mu bikulu ne chingulu, chimbangaachi ne kamatooma ndi, lola ese, khareere liie khwinywe mala nonake abuundu angaaki niio mwinamilanga bifwaani.

⁴Chialutare chenywe ne abuundu niio mwoselianga biiunya bulayi bicha khwonakakwa. Babaandu boosi bakheerwe ebweeni we bifwaani bienywe.

⁵Ese khasalanisie Baisiraeli bafu ebweeni we bifwaani, lundi khasalanisie bikuumba bienywe bibotookhelele chialutare chenywe.

⁶Chingoba choosi cha Isiraeli chikhonakwe ne chialutare chenywe choosi ne bifwaani bilaarakakwa. Ne chialutare nicho boseliangakho biiunya bulayi chilatechulwa, ne buli siindu nisio bakhola silarusibwao.

⁷Ne babaandu mwinywe baleerwa buli abuundu, ne baalarama balamanya bali ese ndi Wele Omunyali Owa Bioosi.

⁸“Ne kakhaba kario ese khalekhe balala baone mala mbasalanisie mu kholo choosi,

⁹niio mukhamenye mu mbaambe. Ebweeneyo bakhakhebulile ese mala bamanye bali nabaukuuma ne khubaambia chisoni, sikila bataamba lisuubila mala basaaya bifwaani mu bweyaangu bwase. Khwako, bakhebiiye babeene, sikila bumayaanu bwabwe ne bibiindu nibio bakhola.

¹⁰Mu siise esio bakhamanye bali ese ndi Wele Omunyali Owa Bioosi, lundi bakhamanye bali engaani yase se yaba eye khuriikhirisia busa tawe.”

¹¹Nio Omwami WELE aamboolela ali, “Ra kamakhono khu murwe, sooma, lila mu bubeeleli, sikila bumayaanu bwabwe, bakhafwe khulwe liie, enjala ne bulwaale.

¹²Be aleeyi bakhalwaale bafwe ne be aembi bakhafwiile mwiie. Abo bakharame bakhafwe enjala. Bakhanyoole busiro bwe bukhalafu bwase.

¹³Ne mukhamanye muli ese ndi Wele Omunyali Owa Bioosi, nga baafu benywe ne bakhalambaale akari we bifwaani khu alutare chabwe. Kikhabe buli khu khakulu khaleeyi, khu bikulu, khu ndeleelwa, asi we kimirongooro nende asi we kimikhoonge niio baanilanga biianwa biiunya bulayi bisiimisia bifwaani biabwe.

¹⁴Ese ndonakaka sibala siabwe, khasikhole sibe sichiimi khukhwama siafubo khukhwola mu lukoba lwa Ribula ebunaswa. Ne se ndalekhakho abuundu osi osi niio Baisiraeli bamenyile tawe. Nio buli mundu alamanya ali ese ndi Wele Omunyali Owa Bioosi.”