Read lubukusu Esek. 7 Bible Online

Esek. 7 - lubukusu bible

Esek. 7

¹Wele Omunyali Owa Bioosi amboolela ali,

²“Mwana wo mundu, boolela Baisiraeli oli, Omwami WELE aboolela Baisiraeli ali: Libuna lioolile khu Baisiraeli boosi!”

³Isiraeli libuna liolile, ese ndakhuambila lirima lundi ndakhukhalakila khuloondekhana nende niko wakholile, mala ndakhuruunga khulwe bikholwa biowo biibi.

⁴Ese se ndakhulekha namwe se ndakhukholela siisa tawe, ne ndakhuukuuma khulwe bikholwa biowo biibi, nibio okholile. Nono ewe olamanya oli ese ndi Wele Omunyali Owa Bioosi.

⁵Kano niko Omwami WELE aloma, “Busiku bulakhwichakho buli siise.

⁶Libuna liechile, libuna lioolile! Enywe mwabunile!

⁷Libuna lioolile khwinywe mumenyile mu sibala, siise sili siimbi, siise sie kumunaanio, ne se sili sie khukhwekhoyela binamwima bie mu bikulu tawe, ne kakhali likoyaana.

⁸“Mu siise sitiiti siri, mulabona lirima liase. Ndikho mukhalakila khuloondekhana nende niko mukholile, lundi ndamuruunga khuloondekhana ne bikholwa bienywe bioosi bimayaanu.

⁹Se ndakhulekha namwe khukholele ewe siisa tawe. Khamuukuume khuloondekhana ne bikholwa bienywe bimayaanu nibio mukholile, nio mulamanya muli ese ndi Wele Omunyali Owa Bioosi lundi nise oolikho omuukuuma enywe.”

¹⁰Lola, endaalo eye libuna elikho yiicha khu kholo eya Isiraeli. Sisiayuumba siabeele sikali. Liliebonia liabiririire.

¹¹Sisiayuumba sireera bumayaanu bukali. Se aliio yesi yesi oolarama namwe sisiindu sienywe siosi siosi sie bukhala tawe.

¹²Siise sioolile nisio buli mundu alabuna. Khukula ne khukusia se bilabaao tawe sikila Wele alaukuuma buli mundu.

¹³Bakusia se baliyindila banyoole bukhala khu nibio batibia tawe. Sikila lirima lia Wele lili khu buli mundu, se lilakobola enyuma tawe lundi sikila bubwoni, se aliio olaba omulamu tawe.

¹⁴Ekhoombi yiipa khurekekha buli mundu ne kakhali mbao oocha mwiie tawe, sikila lirima liase lili khu buli mundu.

¹⁵Liie lili buli abuundu, bulwaale ne njala bili mu chinju, oyo ooli mu lukoongo alafwila mwiie, ne oyo ooli mu lukoba alafwa bulwaale ne njala.

¹⁶Kaaba bali babaandu balala bakhabeeo baakhaone, bakhelukhile mu ngulu nga kamauusi niko baoonile khukhwama mu matooma. Buli mulala khu bwoni bwewe.

¹⁷Buli mukhono kwa mulala kulawamo kamaani ne kamasikamo kabwe kalanikina.

¹⁸Balafwara kamakunia ne khuterema. Balabeka kimirwe kiabwe mala baambwe chisoni.

¹⁹Balamwaata efwesa ne sahabu khu ngila che mu lukoba, sikila se bilaba ne bukhala khu nibo tawe. Efwesa yabwe ne esahabu se bilabaonia khu ndaalo eye lirima lia Wele Omunyali Owa Bioosi tawe. Se banyala bekura efwesa ne sahabu tawe, sikila biabayila mu bwoni.

²⁰Bebonia sikila bie kamamili biabwe mala babikhola biaaba bifwaani bisinyisia. Kano kakila Wele Omunyali Owa Bioosi akhola kimiaandu kiabwe kiataamba bukhala khu nibo.

²¹Wele Omunyali Owa Bioosi aloma ali, “Ndalekha bakeni babanuule bibiindu biabwe bioosi ne banuuli bonakake kimiaandu kiabwe.

²²Se ndakhiingilila banuuli ne bafwolobia ne khukhwonakaka libiikhilo lie Lukaangu lwase tawe.

²³“Buli siindu siakoyaanile, sibala siechuule babeeri ne chingoba chechuule sisiayuumba.

²⁴Ndareera ekholo emayaanu lukali mu kholo choosi ebukule chinju chabwe. Ndakamia sileka sie babaandu babwe be kamaani ne abuundu wabwe atakatifu alafwolobisibwa.

²⁵Lieendekhelela ne liicha, balayiima kumuleembe ne kakhali se kulabao tawe.

²⁶Busiku bulaloondekhana busa, balaulila kamabi kaloondakhane, balayiima kamalola khukhwama khu bang'oosi. Ne kakhali lilaka mu basaayi ne likaambila mu bemeelesi bilawao.

²⁷Omwami alasooma, omwimeelesi alafwa kumwoyo ne babaandu be sibala balaba ne buuri bukali. Khuloondekhana ne limenya liabwe ne likhalaka liabwe ese ndabakhalakila nio bamanye bali ese ndi Wele Omunyali Owa Bioosi.”