Read lubukusu Esek. 8 Bible Online

Esek. 8 - lubukusu bible

Esek. 8

¹Khu ndaalo eya kharaano eye kumwesi kwa sita kwe kumwiiko kwa sita kwe mbaambe yefwe, naba nekhaale ne babemeelesi be mbaambe khukhwama Yuda munju mwase. Siise esio, kamaani ko Mwami WELE kanjichamo.

² Nio naaba ne kamalola, nabona sifwaanani sio mundu nga kumulilo. Khukhwamila mu sibuno khukhwiikha, kumubili kwasio kwafwaana kumulilo, ne khukhwamila mu sibuno khuniina emurwe, siang'enang'ena nga kumukasa kumumiliiu.

³Nio siakololosia sisiindu sisiafwaana nga kumukhono mala siandiila lichuune. Mu malola kano, Roho owa Wele aasuta angaaki aambila e Yerusalemu. Aambila mukari niio bengilila mu silibwa sie bunaswa sie Lukaangu, niio sifwaani siisinyisia Wele siaba.

⁴ Abwenao nabona buwaanga bukali bubwekesia khubao khwa Wele owa Isiraeli, bulayi bwene nga nibwo nabona aluuchi lwa Kebari.

⁵Wele aamboolela ali, “Mwana wo mundu, lola ebunaswa.” Nalolayo mala nabona ambi nende alutare e silibwa sifwaani siisinyisia Wele.

⁶Wele aamboolela ali, “Mwana wo Mundu, waboone niko balikho bakhola? Lola bibiindu bimayaanu nibio Baisiraeli balikho bakhola, bachiililila khu khuseenda ese aleeyi khukhwama abuundu wase atakatifu. Olabona bie chisoni lukali khukhila kano.”

⁷Aambila mu silibwa sie luuya lwe nje mala aanjekesia liloo mwisiisi.

⁸Aamboolela ali, “Mwana wo mundu, techula lisiisi ano.” Ne nga natechula lisiisi elio, kumuliango kwabao.

⁹Ne amboolela ali, “Yingila mukari obone bumayaanu, ne kamabi niko balikho bakholamo.”

¹⁰Nio nengilamo mala nabona, chipiicha che chindemu khwisiisi ne chisaang'i chichiindi chinyaalu, ne bifwaani nibio Baisiraeli basaayanga.

¹¹Babemeelesi kamakhumi saba Baisiraeli mulala khwabo Yasania okhwa Shafani. Buli mulala aaba ne lucho lwe khukhwoseliakho bupani, mala liliisi liabwo liebuuyanga ne liniina mu ngaaki.

¹²Wele aandeeba ali, “Mwana wo Mundu, ewe waboone niko babemeelesi be Baisiraeli balikho bakhola mu bwikisi?” Buli mundu mu lusiro lwewe lulweechula bifwaani. Mu nganakani chabwe bebaasia bali, “Wele Omunyali Owa Bioosi se akhubona efwe tawe. Anjuukhe sibala.”

¹³Nio Wele Omunyali Owa Bioosi aamboolela lundi ali, “Olabona biisinyisia lukali khukhila nibio balikho bakhola bino.”

¹⁴Nio aambila e silibwa sie bunaswa sie Lukaangu mala aanjekesia bakhasi balikho balila sikila lifwa lia wele wabwe Tamusi.

¹⁵Lundi aamboolela ali, “Ee, mwana wo mundu, waboone kano? Lundi olabona bie lisinye bikali khukhila bino.”

¹⁶Nio aambila khu luya lwe mukari lwe Lukaangu. Asilibwa sie Lukaangu, akari wa alutare ne ngila, babao babaandu kamakhumi kabili na baraano. Bapile kimikoongo Lukaangu baloleleele ebukwe balikho basaaya enyanga esoa.

¹⁷Wele Omunyali Owa Bioosi aamboolela ali, “Mwana wo mundu, waboone kano? Babaandu ba Yuda bano se banyaliikhe ne bumayaanu nibwo balakholanga buno ne khutasa sisiayuumba mu sibala sioosi tawe. Khukhwola beeche bakakholele mu Lukaangu luno lulwene khu khuumbaambia ese lirima. Lola nga bandekelesia mu ngila embi khukhila choosi.

¹⁸Khwako balaulila busiro bwe lirima liase. Se ndabalekha namwe mbakholelekho siisa siosi siosi tawe. Bakhasaaya lukali bariena, se khabarekeeresiekho tawe.”