Read lubukusu Esek. 9 Bible Online

Esek. 9 - lubukusu bible

Esek. 9

¹Nio naulila Wele ne aloma ne kumumilo kwe angaaki ali, “Enywe mucha khuukuuma lukoba luno, khe mweseende siimbi, yiicha ne bulwaani bwenywe.”

²Babaandu sita becha khukhwama e silibwa sie nje sie ebunaswa we Lukaangu, buli mundu ne bulwaani bwewe. Khu baandu sita abo, aabaamo omundu owaba ne afwarire engubo eya katani, aasutile sisiindu nisio anyala aandikila. Boosi becha bema a alutare eye kumukasa.

³Nio nabona buwaanga bukali bubwekesia khubao khwa Wele owa Isiraeli, bwaniina khukhwama khu kerubi niio bwabechanga, mala bwacha mu silibwa sie Lukaangu. Nio Wele Omunyali Owa Bioosi alaanga omundu owafwara engubo eya katani, lundi owaba ne sisiindu sie khuandikila

⁴ aaloma ali, “Cha mu lukoba lwa Yerusalemu mwoosi mala ore simanyisio khu bweeni bwa buli mundu ooli mu buchuuni ne sibeela sikila bie lisinye bioosi biili mu lukoba.”

⁵Ese naulila Wele ne aboolela babaandi ali, “Cha mu lukoba mala mwiire babaandu. Mukhakholelakho omundu yesi yesi siisa tawe.

⁶Yiira basaakhulu, basoleeli, bakhaana, bakhasi ne babaana. Ne kakhali mukheera omundu ooli ne simanyisio khu bweeni tawe. Rakikhira abuundu atakatifu wase ano.” Khwako baarakikhira khu bemeelesi ba baaba ne bemile ebweeni we nju eya Wele.

⁷Nio Wele aababoolela ali, “Nyaalutia enju eyo. Yandakasia bafu khu luuya. Rakikha!” Khwako barakikha khukhwira babaandu mu lukoba.

⁸Ne nga baba ne balikho beera bario, ese narama seng'ene. Nakwa mafumala mala nalila ndi, “Ee, Omwami WELE! Oleera Baisiraeli boosi babarama mu Yerusalemu sikila lirima liowo?”

⁹Nio Wele aangobosia ali, “Babaandu ba Isiraeli ne Yuda bakholile bubwoni bukali. Berire babaandu mu sibala sioosi mala bechuusie sifuki mu Yerusalemu. Ne eyi baloma bali ese Wele Omunyali Owa Bioosi nanjuukhe sibala, lundi bali ese se mbabona tawe.

¹⁰Ne kakhali se khabakholele siisa tawe, khabakhole nga ne nakholeele babaandi.”

¹¹Nio omundu owaba ne afwarire engubo eya katani aakobola aaboolela Wele Omunyali Owa Bioosi ali, “Nakholile nga ne undakile.”