Read lubukusu Dan. 10 Bible Online

Dan. 10 - lubukusu bible

Dan. 10

¹Mu mwiiko kwa khataru Sairasi ne ali omwami owa Pasha, burume bwecha khu Danieli, niye batiuukha bali Beliteshasa. Burume obwo bwaba bwa ng'ali, ne kakhali bwaba buandalafu lukali, se bwamanyikhana tawe. Kakhaba kario, Danieli aamanya burume obwo sikila aamanya kamalola ako kosi.

²Mu siise esio, ese Danieli, naba mu bubeeleli khu machuuma kataru.

³Se naliakho siakhulia silayi tawe. Se naliakho enyama namwe nanywakho endali tawe. Se neakhakho kamafura mu bweeni bwase, namwe mwichuune liase tawe khukhwola kamachuuma kataru ne kawa.

⁴Khu ndaalo eye kamakhumi kabili na chine che kumwesi kwe khunyoa, naba nemile khu lukuku lwe luluuchi lwa Tikiri,

⁵ nakalama angaaki, ne lola nabona omundu afwarire chingubo cha katani, ne eboyile mu sibuno kumusiipi kwe esahabu khukhwama Ufasi.

⁶Kumubili kwewe kwakhosia nga limili. Bubweeni bwewe bung'enang'ena nga khumeniuukha khwe lueni, ne chimoni chewe nga chinjaso che kumulilo, kamakhono kewe ne bikele biakhosia nga kumukasa kusiliilwe, ne kumumilo kwewe kwauliilikhana nga luyoka lwe babaandu bakali.

⁷Mala ese Danieli seng'ene niye owabona kamalola ako. Babaandu ba baaba ne nase se babona kamalola ako tawe, ne kakhali baterema, belukha mala bekisa.

⁸Nio nalekhwao seng'ene, ne ndikho ndoleelela kamalola kamaboofu kano. Nawa kamaani, lukoondo lwase lwakaluukhana lukali lwonekha, nawechekheelela kamaani.

⁹Nga naulila kumumilo kwewe, nakwa asi mafumala khumanya sisikholekha tawe.

¹⁰Nio kumukhono kwanjinyosia, mala beele esiiterema kamakhono ne kamasikamo.

¹¹Malaika amboolela ali, “Danieli, Wele akhusiima. Yiima mala orekeeresie bulayi niko nja khukhuboolela, narumiirwe khwiwe.” Nga ne amala khuloma kano, ese nema, mala abeele esiiterema busa.

¹²Mala amboolela ali, “Danieli, okharia tawe. Sikila khukhwama khu ndaalo eye khunyoa niyo wakhalaka khumanya ne khukhwiboombia ebweeni owa Wele wowo, lisaba liowo liauliilikha. Nechile sikila lisaba liowo elio.

¹³ Omukhulu owe bubwami bwa Pasha aakhiingilila khulwe chindaalo kamakhumi kabili na ndala. Mala Mikaili, mulala khu bamalaika bakhulu, echa khukhunjeeta, nio namulekhao no mukhulu owe bubwami bwa Pasha oyo.

¹⁴Nechile khukhuyeeta omanye kakhekholekhe khu baandu bowo mu ndaalo chichiicha. Sikila kamalola niko waboone kali khuloondekhana ne chindaalo chichiicha.”

¹⁵Nga aaba ne alikho amboolela kamakhuwa kano, ese nalola asi, nilio ndoma tawe.

¹⁶Nio mulala ofwaana omundu atiila khu munwa kwase. Nio nasama naboolela oyo owaba ne emile siimbi nase ndi, “Ee Omwami wase, kamalola kano kandereere buchuuni bukali lundi kamalilemo kamaani.

¹⁷Ndinga nasioobi owimile ebweeni wo mwami wewe. Se ndi ne kamaani namwe lulomaloma nawe tawe.”

¹⁸Mulala oofwaana nga omundu oyo andilakho lundi mala nanyoola kamaani.

¹⁹Amboolela ali, “Wele akhusiima, siosi siosi sikhakhwiendekhelesia namwe siakhuriikhirisia tawe.” Nga amboolela kamakhuwa kano, nanyoola kamaani mala naloma ndi, “Omwami wambelesie kamaani, mboolele niko wenya khukhumboolela.”

²⁰Nio aloma ali, “Omanyile sikila ne nichile khwiwe? Nono lie khunyoa ndikho ngobolayo khu khuupana no mukhulu owe bubwami bwa Pasha. Ne nga ndaba ne malile khumuula, omukhulu owe bubwami bwe bukiriki alecha.

²¹ Ne kakhali ndakhuboolela ako kakaandikwa mu sitabu sie bung'ali. Se ndikho no kundi owe khu khuunjeta tawe ne akhali malaika omiliindi wenywe Mikaili.