Read lubukusu Dan. 11 Bible Online

Dan. 11 - lubukusu bible

Dan. 11

¹“Ne kakhali ese mu mwiiko kwe khunyoa kwo mwami Dario omumedi, nema khumuyeeta niye ne khumua kamaani.”

²Nono ndakhuboolela bung'ali bwe kamakhuwa kano. Lola babaami babaandi bataru baliruka sibala sia Pasha. Mala omwami owe khaane akhabe omuiinda khukhila babamuraangirira boosi. Ne nga akhabe ne kamaani sikila buiinda bwewe, akharakikhe khukhwibwaakala bubwami bwe Bakiriki.

³“Ne omwami we kamaani kamakali aliicha. Aliamiia ne bunyali bukali ne khukhola niko niye enya.

⁴Ne akari we bunyali bwe bubwami bwewe bulikabukhanamo bitonyi bine. Babaami bakali be lisaaye liewe balibukula bubweyaangu bwewe ne kakhali se baliba ne kamaani nga kakewe tawe.

⁵“Omwami owa Misiri akhabe ne kamaani, mala mulala khu bemeelesi bewe aliba ne kamaani kamakali khumukhila, mala amiia sibala sikali,

⁶enyuma we kimiiko omwami owa Misiri alikhola buambaani no mwami owa Ashuru mala amuakhile omukhaana wewe. Ne kakhali buambaani buno se bukhamale siise tawe. Sikila omukhaana yuno, no museecha wewe, no mwana wewe, ne bakholi babacha naye baliirwa.

⁷Enyuma we siise sitiiti mulala khu balebe bo mukhaana yuno aliamiia. Alibwaakala banamae bo mwami owa Ashuru, mala engile mu lukoba lwabwe mala abaule.

⁸Alisuta ayile e Misiri bifwaani bie bawele babwe ne bibiindu bie esahabu ne efwesa nibio bara alubeka khu bawele babwe. Enyuma we kimiiko kimikali kie kumuleembe,

⁹omwami owa Ashuru, alibwaakala Misiri, ne kakhali lilimuyingilila akobole mu sibala siewe.

¹⁰“Basoleeli bo mwami owa Ashuru balirekekha liie mala babuusie banamae bakali. Mulala khwaabo aliba ne kamaani kamakali mala ebwaakale lukoba lwe basiku.

¹¹Mu lirima liewe, omwami owa Misiri alipana liie no mwami owa Ashuru, ne aliula banamae bewe bakali.

¹²Aliebonia sikila bukhili bwewe ne banamae bakali nibo eerire. Ne kakhali se alichiililila khuba ne bukhili tawe.

¹³“Omwami owa Ashuru alikobolayo mala abuusie banamae bakali khukhila nibo aaba nabo. Ne siise silayi ne siolile alikobola ne banamae bakali baali ne bulwaani bulayi.

¹⁴Nio babaandu bakali balilekelesia omwami owa Misiri. Ne babaandu be sisiayuumba mu kholo mwowo, Danieli, balilekelesia nio kamalola kano kechusibwe, ne kakhali balikhilwa.

¹⁵Ne omwami owa Ashuru alibotookhelesia lukoba mala aluambe. Banamae ba Misiri se balichiililila khu khuupana tawe, akhaba be kamaani bariena se bakhabemo kamaani tawe.

¹⁶Omwami owa Ashuru alibakholela liosi liosi nilio enya akhole, ne se alibakhoo yesi yesi omukhiingilila tawe. Akheme mu sibala sie luyali, mala biindu bioosi biliba mu bunyali bwewe.

¹⁷“Omwami owa Ashuru alirekekha khucha mwiie ne banamae bewe boosi. Ne khukhwonakaka bubwami bwo musiku wewe, aliambaana naye mukhumuakhila omukhaana wewe. Ne kakhali lirekekha lino se likhanyalikhane tawe.

¹⁸Enyuma wako alibwaakala chikholo chiili siimbi ne nyanja mala aule chingali. Ne kakhali komanda owe banamae alimukhila mala amuambie chisoni. Ng'ali ekibonio yewe elimuruunga omwene.

¹⁹Omwami alikobola mungoba che mu sibala siewe, ne kakhali alikhilwa, ne khukhwenokhwo nikhwo khuliba sisiakamo siewe.

²⁰“Omwami okundi alimuloondela, oliruma omwimeelesi oliyiingilila babaandu khurusia bushuru khutasa buiinda bwe bubwami. Mu siise sitiiti omwami akheerwe ne kakhali se akhererwe mu lirima namwe mwiie tawe.”

²¹Malaika achiililila naloma ali, “Omwami oloondakho owa Ashuru akhabe omumayaanu okhenyibwa abe omwami tawe. Ne kakhali aliicha mala ebwaakale bubwami ne kamaani mu bubeeyi.

²²Yesi yesi olimukhiingilila akhaba ne ali Omusaayi Omukhulu owa Wele akheerwe.

²³Mu liambaana liewe akhabee chikholo chingali, ne alitasa khunyoola kamaani kamakali akhaba ne amiia babaandu batiiti busa.

²⁴Alibwaakala sibala siinda nakhababoolele tawe. Mala alikhola bibiindu bikali nibio bakuuka babwe bakhakholakho tawe. Akhakabe kimiaandu, buiinda, nende bibiindu biewe nibio bayaaya khukhwama mwiie. Akherekekhe khukhwibwaakala chingoba che kamasiisi, ne kakhali sikhabe busa khu siise sitiiti.

²⁵“Mu bunyindaafu aliba ne banamae bakali khukhwibwaakala omwami owa Misiri olierekekha khu khuupana ne banamae be kamaani bakali. Ne kakhali balibea omwami owa Misiri mala se alinyala tawe.

²⁶Akhaba baloondi bewe baali siimbi balimwiira. Banamae bewe bakali bakherwe.

²⁷Mala babaami babili abo balikhala khu mesa ndala khulia, ne kakhali kamebaasio kabwe kaliba kamamayaanu sikila bakhabeane, se bakhanyoole nilio bekoomba tawe sikila siise sisiarebwao sikhoola tawe.

²⁸Omwami owa Ashuru alikobola engo wewe nende buiinda bukali, ne kakhali mu mwoyo kwewe akherusie khukhwonaka endakaano endakatifu. Akhakhole lilienya liewe mala akobole mu sibala siewe omwene.

²⁹“Mu siise sisiarekekhwa, alibwaakala sibala sia Misiri lundi ne siise sino kamakhuwa kakhakaluukhane, se kakhabe nga kaba mataayi tawe.

³⁰Barumi baliicha mu meeli ne khumwibwaakala mala aliria. “Ne alikobola enyuma mwirima ne khukhaka khukhwonakaka edini eye babaandu ba Wele. Akhaloonde likaambila liabo babalekha edini eyo.

³¹ Banamae bewe balinyaalutia Lukaangu ne chingoba che kamasiisi. Baliakamia biianwa bie khukhwosia bia buli ndaalo ne khukhwisia mu lukaangu Sibiilisio sie Lilionaka.

³²Mu bubeeyi alinyoola buyeeti khwaabo babalekha endakaano, ne kakhali babaandu bamanyile Wele wabwe bakheme siriririri mala bakhole sikholwa.

³³Abo baali ne limanya akarikari wabwe bakhekisie bakali. Kakhaba kario khu siise bakherwe ne mbalu namwe kumulilo, bakhabaambe babayile mu mbaambe namwe banuulwe kimiaandu kiabwe.

³⁴Nga liliira ne likhabe ne lichiililila, babaandu ba Wele balinyoola buyeeti butiiti, ne kakhaba kario bakali baliambaana nabo balikhola bario mu khwikholesia busa.

³⁵Balala khu baandu be limanya bakherwe, nio boole khukwalaasibwa, khutakaasibwa, ne khusiingwa khukhwola khu sise simaliilisi. Siise esio khu sise sino sikhoola tawe.

³⁶ “Omwami owa Ashuru akhakhole nga ne enya. Alieniinia ne khuloma ali niye ali omukali khukhila bawele boosi. Akhakhole embelekeu khu Wele owe bawele. Akhachiililile khuindiaala khukhwola nga siise sie lirima ne sikhoole khu siakamo sikila ka kaarekekhwa koosi khukhwola kechusibwe.

³⁷Ne omwami oyo se alielesiakho liria liosi liosi khu bawele nibo bakuuka bewe bakholelanga, namwe khuyo niye bakhasi bekoombanga tawe. Akhalekelesie bawele babaandi boosi sikila akhebale khuuba owe bunyali bukali khukhila buli mulala khu bawele abo boosi.

³⁸Mu bweyaangu bwe bawele abo, niye aliinamila wele oliindanga chingoba, wele niye bakuukawe bakhaamanyakho tawe. Aliaana khu wele oyo esahabu, efwesa, kamabaale ke bukusi bwe angaaki, ne biaanwa bibiindi bie bukusi bwe angaaki.

³⁹Akhebwaakale chingoba che kamaani lukali khulwe buyeeti bwa wele owe babaandu babaandi. Abo baamufukiilila niye khuuba omwami, akhabaelesie lukoosi lukali. Akhabare mu bwimeelesi bwe angaaki ne khubaelesia kimikuunda nga siaanwa siabwe.

⁴⁰“Nga siise simaliilisi sio mwami owa Ashuru ne sikhabe siimbi khukhwola, omwami owa Misiri alimwibwaakala, ne omwami owa Ashuru alipana naye ne kamaani kewe koosi, ne arumikhira kamakaari, chifarasi, ne chimeeli chingali. Akhebwaakale bibala bikali, nga kameechi kamakali po.

⁴¹Alibwaakala sibala sie ndakaano esio mala eere babaandu chielefu ne chielefu. Ne kakhali bibala bia Edomu, Moabu, ne babaandu be lubeka lwa Amoni bakali baliona.

⁴²Nga alibwaakala bibala ebio bioosi, akhaba Misiri sesiliona tawe.

⁴³Alinuula libiikhilo lia Misiri lie sahabu ne fwesa ne bibiindu bibiindi bie bukusi bwe angaaki. Babaandu ba Libia nende Baesopia bakhaloonde kakewe.

⁴⁴Mala kamakhuwa khukhwama ebukwe ne ebunaswa kakhamuriisie. Mala akhenyokhe ne lirima likali khubunia ne khukhwira bakali.

⁴⁵Aliombakha kamaeema kewe kamaboofu akarikari we nyanja ne sikulu sie luyali lundi sitakatifu. Ne kakhaba kario akhabe oolile khu siakamo siewe, ne se akhabeo yesi yesi olimuyeeta tawe.”