Read lubukusu Dan. 12 Bible Online

Dan. 12 - lubukusu bible

Dan. 12

¹ Malaika owaba ofwarire engubo eya katani aloma ali, “Siise esio malaika Mikaili omukhulu, oliindanga babaandu bowo, aliicha. Siise esio siliba sie butinyu bukali, bukhila koosi khukhwama nga ekholo eya Isiraeli ne erakikha khubao. Ne siise esio ne sioola, babaandu be kholo yowo yoosi nibo kamasina kabwe kaandikwa mu sitabu sia Wele, Wele alibaonia.

² Bakali khwaabo babafwa balilamukha: balilamukha lundi balala balinyoola bulamu bwa mindali, ne babaandi balinyoola chisoni cha mindali.

³Abo baali ne limanya balikhosia nga buwaanga bwe khwikulu. Ne abo babekesianga babaandu khukhola kamaluungi balikhosia nga ching'enieesi mindali na mindali.”

⁴ Nio malaika amboolela ali, “Ne ewe Danieli, fuunikha sitabu, mala orekho kumuuri khukhwola khumaliilikha khwe sibala. Mu siise esio babaandu bakali bakhayiiye eyi ne neyi khukhwenya khutasa bukesi.”

⁵Nio Ese Danieli nalola mala nabona babaandu babili bemile khulukuku lwe luluuchi mulala eyi ne okundi eyi.

⁶Mulala khwaabo areeba malaika owaba ne efwarire engubo eya katani ne emile a luuchi angaaki ali, “bilabukula siise siina nio bibiindu bie liukia bino bikholekhe?”

⁷ Nio owaba ne efwarire engubo eya katani, ne emile angaaki we luluuchi asuta kamakhono koombi mu ngaaki ne echuba mu lisina lioyo omenyile mindali ali, “Bilaba biise bitaru ne nusu. Bibiindu bino bioosi bikhechusibwe nga kumunaanio kwe babaandu ba Wele ne kuliwa.”

⁸Naulila niko aloma, ne kakhali se nakamanya tawe. Khwako nareeba ndi, “Omwami, sisiakamo sie kamakhuwa kano koosi sikhabe siriena?”

⁹Angobosia ali, “Danieli khukhwola oche siise sino, sikila kamakhuwa kano kali ke mu bwikisi lundi kafuniikhwe ne kumuuri khukhwola siise simaliilisi.

¹⁰ Babaandu bakali bakhakwalaasibwe, batakaasibwe ne khusiigwa. Ne kakhali abo baali bamayaanu bakhachiililile khukhola bumayaanu. Se akhabeo khu bamayaanu abo akhaba mulala okhamanye tawe, ne kakhali abo baali ne limanya bakhamanye.

¹¹ “Khukhwama khu siise sie khukhwakamia khuaana biianwa bie chimbosio cha buli ndaalo ne khukhwimikha Sibiilisio sie Lilionaka, chindaalo e elefu ndala ne chimia chibili ne kamakhumi tisa chikhabire.

¹²Bali ne khabi abo baliekhaliilikha khukhwola chindaalo e elefu ndala ne chimia chitaru ne kamakhumi kataru na chiraano ne chiwa!

¹³“Ne ewe Danieli, ba omusuubilwa khukhwola khu siakamo. Mala olifwa ne olilamukha khunyoola kumuruuru kwowo mu siise simaliilisi.”