Read lubukusu Dan. 2 Bible Online

Dan. 2 - lubukusu bible

Dan. 2

¹Mu mwiiko kwa khabili mu bwami bwa Nebukadinesa, Nebukadinesa aba ne kamarooro. Eendekhelela lukali mala arengecha.

²Nio omwami akhalaka ali be kamayia, bafumu, balakusi ne Bababiloni beche khuulila kamarooro kewe. Becha mala bema ebweeni wewe.

³Omwami ababoolela ali, “Ese ndoorire kamarooro. Neendekheleele nenya manye sifuno siako.”

⁴Nio Bababiloni bakobosia omwami mu Luaramaiki bali, “Ee omwami, indila miiko na mindali! Khuboolele efwe bakholi bowo kamarooro ako, ne efwe nafwe khulakhuboolela sifuno siako.”

⁵Omwami aboolela Bababiloni ali, “Nakhalake likhuwa ndi: ne mukhamboolela kamarooro ako ne sifuno siako tawe, mulatonywamo bitonyi, ne chinju chenywe chilonakwa sio.

⁶Ne mwamboolela kamarooro ako ne sifuno siako, ndamuelesia biianwa bilayi ne lukoosi lukhilao. Khwako mboolele kamarooro ako ne sifuno siako.”

⁷Bamukobosia lwe khabili bali, “Omwami khuboolele kamarooro ne efwe khulakhuboolela sifuno siako.”

⁸Omwami abakobosia ali, “Manyile ndi mu bung'ali mulenyanga khumala biise, sikila mwaboone muli ese nakhalakile elala nilio ndakhola.

⁹Ne mukhamboolela kamarooro kabeele siina tawe, nakhalaake sisiindu silala siong'ene khwinywe. Mwafukiilisiaane khuloma ebweeni wase bubeeyi ne kamakhuwa ke khu khundiimia ese khukhwola nga bibiindu ne bikaluukhana. Khwako mboolele kamarooro, nio manye ndi munyala mwamboolela sifuno siako.”

¹⁰Bababiloni bakobosia omwami bali, “Se aliio omundu khu sibala onyala abuula niko omwami enya kano tawe. Sikila se aliio omwami owe bunyali namwe owe kamaani owareebakho sisiindu siri khu be kamayia namwe bafumu, namwe Bababiloni tawe.

¹¹Sisiindu nisio omwami areeba sili sitinyu lukali. Ne se aliio onyala asiekesia omwami tawe ne bakhali bawele bakhamenyile ne babaandu tawe.”

¹²Mu khuulila kano, omwami Nebukadinesa aambwa ne lisinyikha likali, mala akhalaka ali babaandu bakesi boosi mu Babiloni berwe.

¹³Nio lilaka liarusibwa khu bakesi boosi berwe, akhaba Danieli ne basaale bewe bayiimwe berwe.

¹⁴Nio Danieli, mu bukesi ne burekeerefu, akobosia Arioki, omukhulu owe baliindi bo mwami, lundi owaebwa kimilimo kie khukhwira bakesi ba Babiloni.

¹⁵Areeba Arioki ali, “Siina sikila lilaka lio mwami ne lili lirafu lirio? Nio Arioki aboolela Danieli koosi kakekholekha.”

¹⁶Nio Danieli acha areeba omwami amuelesie biise, nio aboolele omwami sifuno sie kamarooro kewe.

¹⁷Mala Danieli acha engo wewe aboolela basaale bewe Hanania, Mishaeli ne Asaria.

¹⁸Ababoolela basabe siisa khukhwama khu Wele owe mwikulu khuloondekhana ne kamakhuwa ke mu bwikisi kano nio Danieli ne babasie bakheerwa alala ne bakesi be mu Babiloni tawe.

¹⁹Nio kamakhuwa ke mu bwikisi kano kabuulikha khu Danieli mu malola mu silo. Nio Danieli afumia Wele owe mwikulu.

²⁰Danieli aloma ali, “Lisina lia Wele lieebwe luyali mindali na mindali. Ali owe limanya ne bunyali.

²¹Akaluukhasianga biise, amiyaanga babaami ne khubalekhesia lundi aananga limanya khu be limanya ne bukesi khwaabo be liiulila.

²²Abuulululanga bibiindu bie mukari lukali bibiekisa lukali, amanyile biili mu siilima, ne buwaanga buli naye.

²³Khwiwe Ee Wele we bakuuka baase. Khupila orio ne khu khufumia sikila wambelesia bukesi ne kamaani ne khumanyisia nisio khusabile sikila wakhwekeesie kamakhuwa ko mwami.”

²⁴Nio Danieli acha khu Arioki, niye omwami alaka khukhwira babaandu bakesi ba Babiloni. Acha amuboolela ali, “Mukheera babaandu bakesi ba Babiloni tawe. Mbile wo mwami, ne nja khumuboolela sifuno sie kamarooro kewe.”

²⁵Nio Arioki ayila Danieli ebweeni wo mwami Nebukadinesa khangu, mala amuboolela ali, “Omwami, nanyoolile omundu mu baambe babaama Yuda onyala aboolela omwami sifuno sie kamarooro kewe.”

²⁶Omwami areeba Danieli oolaangwa Beliteshasa ali, “Onyala wamboolela kamarooro niko ndoorire ne sifuno siako ku?”

²⁷Danieli akobosia omwami ali, “Se baliio babaandu bakesi, be kamayia, bafumu namwe bamenieelesi be ching'enieesi banyala bekesia omwami ke liiukia niko omwami areebire tawe.

²⁸Ne kakhali aliio Wele mwikulu, obulululanga kakekisa koosi, mala abululiile omwami Nebukadinesa kamakhuwa kakhabeo chindaalo chichiicha. Nono kamarooro kowo nende kamalola kowo, nga waba ne okona, niko kano:

²⁹“Nga waba ne olikho okona omwami, waba ne kamebaasio khuloondekhana ne kamakhuwa kakhabeo mu ndaalo chichiicha. Mala Wele obuulululaanga kamakhuwa kakekisa akhwekesia kamakhuwa kalikho kacha khukhwekholekha.

³⁰Ne khwise, se kali bali ndi ne bukesi khukhila babaandu babaandi tawe. Ne kakhali nio ewe omwami onyoole khumanya sifuno sie kamarooro kowo ne kamebaasio kowo.

³¹“Omwami mu marooro kowo wabona sifwaani sio mundu siboofu lundi sie kamaani. Sifwaani sino siaba ne buwaanga bukali. Siaba siemile ebweeni wowo mala siariisia mukhubonekhana khwasio.

³²Kumurwe kwe sifwaani sino kwaba kwe esahabu endayi, sifuba ne kamakhono kasio biang'oonwa ne fwesa, enda ne kamaraango biaba bie kumukasa,

³³ne bikele biasio biaba bie sichuuma, ne bikhandakilo biasio biaba lubeka sichuuma, ne lubeka liloba.

³⁴Nga ne waba ne osiiloleelela, libaale liakhalikha khulwe kamaani ke buwele, omundu nakhalitiililekho tawe. Liapa bikhandakilo bie sifwaani bie sichuuma ne liloba ebio mala biafunikhakamo bimesu.

³⁵Nio sichuuma esio, liloba, kumukasa, efwesa, ne sahabu bioosi alala, biafunakwa bimesu, mala biekhola nga likhuuchi khu luuya lwe khuulila buyaaya mu siimiyu. Mala ekhuungu yatamuusia bioosi, yeyelao elala sio. Ne libaale liliafunaka sifwaani liakhula liekhola sikulu siboofu siafuunikha sibala sioosi.

³⁶“Kano niko ka kaba kamarooro kowo. Nono khakhuboolele omwami sifuno siako.

³⁷Ewe omwami, oli omwami we babaami. Wele owe mwikulu akhuele bubwami, kamaani, bunyali, ne luyali.

³⁸Akhukholile ewe khuuba omuruki owe babaandu boosi, ne chisaang'i che mundaa, ne chinyuni che mungaaki oosi oosi niio bili. Ewe niwe kumurwe kwe esahabu okwo!

³⁹Enyuma wowo, buliicha bubwami bubuundi, ne kakhali bukhabe bukeekhe khu bwowo. Buno bukhaloondelwe ne bubwami bwe khataru buufwaananisibwa ne kumukasa. Bubwami buno bukhamiie sibala sioosi.

⁴⁰Ne bulabao bubwami bwa khane, bwe kamaani nga sichuuma. Ne bulayi bwene nga sichuuma ne sifunakanga ne khubulungula buli siindu, bubwami buno bukhafunakake ne khubulungula bubwami butaayi bwoosi.

⁴¹Bikhandakilo ne chinjala bibiaba lubeka sichuuma ne lubeka liloba biekesia bili bubwami buno bukhabe ne bubwabukhani.

⁴²Lubeka lulala lukhabe ne kamaani nga sichuuma ne luluundi lukhabe lutekhele nga liloba.

⁴³Ne nga wabona sichuuma ne situbaana ne liloba, kario bakhatubaane alala mu khukhwaana. Ne se baliambaana alala tawe, nga sichuuma ne liloba ne bikhaambaananga tawe.

⁴⁴Ne mu siise sie babaami abo, Wele owe mwikulu aliimikha bubwami. Bubwami buno se bukhonakibwe tawe. Se alikhoo omundu yesi yesi okhabukwisie tawe. Bukhatubundule bubwami buno bwoosi butambeo, ne kakhali bubweene bukhabeo mindali na mindali.

⁴⁵Esio nisio sifuno sie libaale liliakhalwa khukhwama khu sikulu ne kamaani ke buwele, libaale liliapa liabulungula sifwaani sie sichuuma, kumukasa, liloba, efwesa, ne esahabu biaba bufu. Wele omukali ekeesie omwami kakhekholekhe mu ndaalo chichiicha. Kamarooro kali ka ng'ali, ne sifuno siako siolaana khusuubilwa.”

⁴⁶Mala omwami Nebukadinesa enama asi oola khwiloba asikamila Danieli akhalaka ali bamurusirie chimbosio ne khukhwosia bupaani buunya bulayi ebweeni wewe.

⁴⁷Omwami aboolela Danieli ali, “Ng'ali Wele wowo ali Wele we bawele, omwami we babaami obululuulanga ke liiukia. Sikila ewe onyalile khubuluulula ke liukia kano.”

⁴⁸Nio omwami aelesia Danieli luyali lwe angaaki, amuelesia biianwa biboofu bikali, amwamiia khu sibala sia Babiloni sioosi, lundi amukhola khuuba omwimeelesi we bakesi be mu Babiloni boosi.

⁴⁹Danieli areeba omwami ara Shaduraka, Meshaka ne Abedineko khuliinda kamakhuwa koosi ke sibala sia Babiloni. Danieli, arama mwichipi lio mwami.