Read lubukusu Dan. 3 Bible Online

Dan. 3 - lubukusu bible

Dan. 3

¹Omwami Nebukadinesa aang'oona sifwaani sie esahabu. Buleeyi bwasio bwaba chimita kamakhumi kabili na munaane, ne bukhiikha siaba chimita chitaru. Aasira khu siangalaamwe sia Dura, mu sibala sia Babiloni.

²Mala omwami Nebukadinesa alakiilisia ali babemeelesi be kamae, baliindi, babaami, bakaambisi, babiikhi, bakhalaki, bakayi, ne babaami babaandi boosi be bibala beche khu mulukha kwe sifwaani nisio omwami Nebukadinesa eemikha.

³Nio babemeelesi be kamae, baliindi, babaami, babiikhi, bakhalaki, bakayi, ne babaami babaandi boosi be bibala, bebuusiana alala khu mulukha kwe sifwaani nisio omwami Nebukadinesa eemikha. Mala bema ebweeni we sifwaani nisio Nebukadinesa emikha esio.

⁴Nio omupi we lulwiika alangiliila ali, “Babaandu boosi Be Chikholo ne chinimi, mwakhalakiilwe muli,

⁵nga ne muulila lulwiika ne luupa, kumulele, siilili, endongooli, lituungu, bukhana, nende buli bie kimienya bioosi, mwenyibwa mukwe asi musaaye sifwaani sie efwesa nisio omwami Nebukadinesa emeekhe.

⁶Ne yesi yesi okhasikama asi ne khusaaya sifwaani tawe, alamwaatwa khangu mu bunoro, mu mulilo kukwerika.”

⁷Khwako nga, babaandu boosi ne baulila khu khuupa khwe lulwiika, kumulele, siilili, endongooli, lituungu bukhana nende bibiindu bioosi bie kimienya ne biipa, babaandu boosi, chikholo nende be chinimi chiikabukhaane bakwa asi basaaya sifwaani sie esahabu nisio omwami Nebukadinesa aaba ne emeekhe.

⁸Mu siise esio Bababiloni balala becha basitaka Bayaudi mu sikhalikhali.

⁹Baboolela omwami Nebukadinesa bali, “Omwami menya mindali na mindali!

¹⁰Omwami ewe wabisiisie oli buli mundu oulila khu khuupa khwe lulwiika, kumulele, siilili, endongooli, lituungu, bukhana nende buli kumwenya, akwe asi asaaye sifwaani sie esahabu.

¹¹Ne omundu ookhakwa asi ne khusisaaya tawe, alamwaatwa mu bunoro, mu mulilo kukwerika.

¹²Baliio Bayaudi babaandi nibo wara mu buliindi bwe sibala sia Babiloni: Shaduraka, Meshaka ne Abedineko. Omwami, babaandu bano se bakhuria ewe tawe. Sebakholela bawele bowo tawe, namwe se basaaya sifwaani sie esahabu nisio wemeekhe tawe.”

¹³Nio omwami Nebukadinesa, mwirima likali, akhalaka ali Shaduraka, Meshaka ne Abedineko bareerwe. Nio bareerwa ebweeni wo mwami.

¹⁴Nebukadinesa abareeba ali, “Shaduraka, Meshaka, Abedineko, kali ng'ali bali semukholela bawele base tawe, ne se musaaya sifwaani sie esahabu nisio nemeekhe tawe?

¹⁵Nono nga ne mulaulila lundi khukhupa khwe lulwiika, kumulele, siilili endongooli, lituungu, bukhana nende buli bie kimwenya ne biipa, mwaba ne mukwa asi mala mwasaaya sifwaani nisio ese kholile, aba bulayi. Ne mwaloba khusisaaya, mucha khumwaatwa khangu mu bunoro bwe kumulilo kuulikho kwerika. Ne wele siina olamuonia khukhwama mu makhono kase?”

¹⁶Nio Shaduraka, Meshaka ne Abedineko bamukobosia bali, “Omwami Nebukadinesa, se khuli nende nilio khu khukobosia mu makhuwa kano tawe.

¹⁷Ee omwami, Kaaba bali Wele wefwe niye khukholelanga anyala khu khuonia efwe khukhwama mu bunoro bwe kumulilo kukwerika kuno ne khu khuonia khukhwama mu makhono kowo, aba lekha akhuonie.

¹⁸Ne kakhaloba khuba kario tawe, Ee omwami, lekha kamanyikhane abuwaanga mbo se khulakholela bawele bowo, namwe khusaaye sifwaani sie esahabu nisio wemeekhe tawe.”

¹⁹Ne kakhali omwami Nebukadinesa echula kurima, mumoni mwewe mwaba mukhalafu lukali, asinyikhwa ne khubiila Shaduraka, Meshaka ne Abedineko. Nio alaka bekelesie kumulilo kubile lukali khukhwola saba angaaki khukhila nga kubechanga.

²⁰Nio alaka babaandu be kamaani lukali mu banamae bewe be liie, khuboa Shaduraka, Meshaka ne Abedineko, ne khubamwaata mu bunoro bwe kumulilo kukwerika lukali.

²¹Nio babaandu bano babowa ne befwarire kamakooti kabwe, chikaanjo chabwe, chikofio chabwe ne chingubo chichiindi. Bamwaatwa akarikari we bunoro bwe kumulilo kumurafu okwo.

²²Sikila lilaka lio mwami liaba lirafu, ne kumulilo kwaba kumurafu khubiriirira, chimemo che bunoro chosia babaandu babatiila Shaduraka, Meshaka ne Abedineko.

²³Nio babaandu bataru bano Shaduraka, Meshaka ne Abedineko ne baboilwe, bakwa akari we bunoro, mu mulilo kukwerika.

²⁴Nio omwami Nebukadinesa esiindukha, enyokha khangu. Mala areeba bakambisi bewe ali, “Efwe se khuboyile babaandu bataru ne khubamwaata mu bunoro ta ku?” Bakobosia omwami bali “Yee omwami”

²⁵Nio omwami ayokela mu mumilo kwe angaaki ali, “Lola! Ndikho mbona babaandu bane, bakanguluulwe, balikho bakeenda akari mu mulilo. Ne kumulilo se kwabosiisiekho na atiiti ene tawe. Mala khubonekha khwo omundu we khane alolekha nga omwana we bawele.”

²⁶Nio Nebukadinesa acha amuliango kwe bunoro mala alaanga ali, “Shaduraka! Meshaka! Abedineko! Bakholi ba Wele owe Angaaki lukali! Rura enje! Yiicha ano!” Nio Shaduraka, Meshaka ne Abedineko, barura enje, khukhwama mu mulilo.

²⁷Nio bakhulu be kamae, baliindi, baruki ne bakambisi bo mwami bebuusia alala mala babona bali kumulilo se kwosiisiekho omundu yesi yesi tawe. Lichuune liabwe, chingubo chabwe se biayilekho tawe, namwe khuunyakho liliisi tawe.

²⁸Omwami Nebukadinesa aloma ali, “Wele owa Shaduraka, Meshaka ne Abedineko afume! Orumire malaika wewe khuonia bakholi bewe, babamusuubila. Baloba lilaka lio mwami mala beana babeene, khukhila ne basaaya ne khukholela wele yesi yesi okhali Wele wabwe yeng'ene tawe.

²⁹“Khwako ese mbisia lilaka lino: babaandu bosi bosi, ekholo, namwe lulimi lwosi lwosi balomaloma embelekeu khu Wele owa Shaduraka, Meshaka ne Abedineko balatabulwa bitonyi, ne enju yabwe elabuna. Sikila se aliio Wele okundi onyala aonia ario tawe.”

³⁰Nio omwami aelesia Shaduraka, Meshaka ne Abedineko bunyali bukali mu sibala sia Babiloni.