Read lubukusu Dan. 4 Bible Online

Dan. 4 - lubukusu bible

Dan. 4

¹Omwami Nebukadinesa aruma burume buno khu baandu boosi Be Chikholo, ne chinimi che liloba. “Mube ne kumuleembe!

²Rekeeresia ke liukia kase niko Wele owe Angaaki Lukali anjekeesie.

³“Bimanyisio bia Wele bili bikali po! Ke liukia niko akhola kali ke kamaani po! Bubwami bwewe buli bwa mindali na mindali, buruki bwewe buliio chiselukho choosi.

⁴“Ese Nebukadinesa, beele namenya bulayi mu lichipi liase ne khusangaalila kimiaandu kiase.

⁵Ne kakhali siilo silala naba ne kamarooro kakakila neendekhelela lukali; nabona kamalola nga naba ne ngonile mala kamba bireengo.

⁶Khwako nakhalaka ndi bakesi boosi mu Babiloni bareerwe khwise nio bamboolele sifuno sie kamarooro kase.

⁷Mala be kamayia, balakusi, balosi, ne babaandu bamenieelesianga ching'enieesi, bareerwa. Nio nababoolela kamarooro kase. Ne se bamboolela sifuno siako tawe.

⁸Mala mukhumaliilikha Danieli niye batiuukha bali Beliteshasa, lisina lia wele wase echa. Roho owe bawele batakatifu aba mu niye. Mala namuboolela kamarooro, ne ndoma ndi:

⁹Beliteshasa, omukhulu owe babaandu be kamayia, manyile ndi roho we bawele batakatifu akhulimo, ne se lilikhoo liliekisa liili litinyu khwiwe khubuula tawe. Nono mboolele sifuno sie kamarooro kase sili siina?”

¹⁰Nga naba ne ngona, kamalola kase kaba kano: Lolakho, nabona kumurongooro akari we sibala. Kwaba kumuleeyi lukali.

¹¹Kumurongooro chana kwakhula mala kwakaliya, kwalea khukhwola mwikulu. Kwabonekhana khu buli mundu mu sibala sioosi.

¹²Kamasaafu kakwo kang'enang'ena, kwanenekha kamatuunda kamakali, kaba biakhulia khu bioosi. Chisaang'i che mundaa chamenyanga mu siiniini siakwo, chinyuni chombakha biswi mu sakia chakwo, ne bibuumbe bioosi biakulichangakho.

¹³Nga naba ne ngonile khu sitanda, nachiililila khulola kamalola ako: omuliindi, omutakatifu ekha khukhwama mwikulu.

¹⁴Alanga lukali, ne aloma ali, “Rema kumurongooro okusonjoole chisakia, ochurure kamasafu kakwo ne khusalanisia kamatuunda kakwo. Lekha chisaang'i chisalanikhe khukhwama musisina ne chinyuni khukhwama mu sakia chakwo.

¹⁵Ne lekha siisina ne kimili kiakwo mwiloba, osiboe ne kumusiipi kwe sichuuma ne kumukasa, mubonga eng'ana mundaa. “Lekha esiinge luume khukhwama mwikulu. Lekha amenye alala ne chisaang'i che mundaa, alie bunyaasi mu sichiimi.

¹⁶Lekha kamebaasio kewe ko mundu kakaluukhane, abe ne kamebaasio ke saang'i khu miaka saba.

¹⁷Buno nibwo bukhalaki nibwo baliindi batangaasiisie. Buli bukhalaki bwaabo baali batakatifu, nio babaandu boosi buli abuundu boole khumanya bali Wele owe Angaaki Lukali ali ne bunyali khu bwami bwoosi bwe babaandu; Niye aelesianga bubwami omundu yesi yesi niye asiimile, akhaba ne ali omutiiti owe khumalayo.”

¹⁸Ese Nebukadinesa, kamarooro kano niko ndoorire. Nono ewe, Beliteshasa, mboolele sifuno siako. Sikila be bukesi boosi mu bwami bwase se banyala bamboolela tawe. Ne ewe onyala, sikila roho owe bawele batakatifu akhulimo.

¹⁹Nio Danieli, oolaangwa Beliteshasa, esiindukhakho akeekhe, mala lilibaasia liewe liamunania. Omwami amuboolela ali, “Beliteshasa, okhalekha kamarooro kano namwe sifuno siako bikhuriisie tawe.” Beliteshasa akobosia ali, “Omwami wase, Lekha kamarooro kano kabe khu bakhakhwenya tawe, ne sifuno siako khu basiku bowo!

²⁰Kumurongooro, nikwo wabona kukwakhula ne kukalia, emusie wakwo yetiila khwikulu mala kwabonekha mu sibala sioosi,

²¹Kamasaafu kakwo kang'enang'ena, kwanenekha kamatuunda, kaba biakhulia khu bibuumbe bioosi, Chisaang'i che mu ndaa cheyikamanga mu siiniini siakwo, ne chinyuni chombakha biswi mu chisakia chakwo,

²²“Kuli ewe omwami. Wabeele omukali lundi oli ne kamaani. Bukali bwowo bwabalaayile ne khukhwola mwikulu ne bunyali bwowo bwafuusiisie sibala sioosi.

²³Mala omwami ewe waboone lundi omuliindi, omutakatifu, ne ekha khukhwama mwikulu, ne arusia lilaka ali, ‘Rema kumurongooro mala kwonakwe, ne kakhali lekha siisina siakwo ne kimili birame mwiloba. Siboe ne kumusiipi kwe sichuuma ne kumukasa, sikarwe ne bonga eng'ana. Lekha luume khukhwama mwikulu lumunyisie, amenye ne chisaang'i che mundaa khu miiko saba.’

²⁴“Ee omwami, sino nisio sifuno sie kamarooro kowo. Ne niko Wele owe Angaaki Lukali abisiisie kalekholekha khwiwe.

²⁵Bakhakhutimanie obe aleeyi ne babaandu, ne olamenya ne chisaang'i che mundaa. Olalia bunyaasi nga eeyi ne okhanyirire khulwe luume khukhwama mwikulu. Kimiiko saba kikhabire ne oli orio khukhwola omanye oli Wele owe Angaaki Lukali aamiaanga bubwami buuli khu sibala, ne abuelesia yesi yesi niye enya.

²⁶Mala sifuno sie lilaka lie khulekha siisina ne kimili kiakwo mwiloba nisio sino: Ewe okhakobosebwe lundi bubwami bwowo khukhwama siise nisio olimanyilamo oli Wele owe mwikulu niye owamiia.

²⁷Khwako, ee omwami, loonda bukeleki bwase. Lekha khukhola bumayaanu, khola siili siluungi, lundi lekha kamabi kowo mala okholele siisa babamiinwa, khola orio wakana biise biowo bie khuindiaala bichiililila.”

²⁸Kano koosi kekholekha khu mwami Nebukadinesa.

²⁹Enyuma we kimiesi ekhumi na kibili, nga aba ne akeenda khu ngaaki khwe lichipi lie bubwami mu Babiloni,

³⁰areeba ali, “Se luli luno Babiloni lukoba luboofu nilwo nombakha ne bunyali bwase bukali nga lukoba lwase lwe ngalaasia khukhwekesia efuma ne bukhulu bwase?”

³¹Nga omwami aaba ne asilomaloma kamakhuwa ako, kumumilo kwamila mwikulu kuli, “Ee omwami Nebukadinesa, rekeeresia burume buno khwiwe: Bubwami bwakhulekhile.

³²Mala ewe ocha khurusibwa mu baandu, olamenya ne chisaang'i che mundaa, ne khulia bunyaasi nga eeyi. Ne olamenya orio khu miiko saba, khukhwola nga ne olimanya oli Wele owe Angaaki Lukali niye okhalaka bubwami bwe babaandu, ne abuelesia yesi yesi niye enya.”

³³Ao ne nao kamakhuwa ke liikhalaka ako kekhola khu Nebukadinesa. Arusibwa mu baandu mala alia bunyaasi nga eeyi. Amenya mu luume lwe mwikulu. Lichuune liewe liaba lileeyi nga kamafuumbo ke furuusi, ne kamatere kewe nga kamatere ke nyuni.

³⁴Enyuma we kimiiko saba, ese Nebukadinesa nalola mwikulu, mala bukesi bwase bwangobolela. Mala nafumia Wele owe Angaaki Lukali, nafumia ne khuelesia lukoosi oyo omenyile mindali na mindali. “Sikila bubwami bwewe buli bwa mindali na mindali, ne bubwami bwewe buindila selukho na selukho.

³⁵Boosi bamenyile mu sibala se bali siindu tawe, Wele akholanga nilio enya khu bibuumbe bie mwikulu ne babaandu be khu sibala, mala se aliio omukhiingilila namwe amureeba ali, ‘Okhola siina?’ Tawe.”

³⁶Mu siise esio bukesi bwase bwangobolela. Lundi bangoboselia luyali lwe bubwami bwase, ne kamaani kase, ne fuma yase. Bakambisi base ne babemeelesi be bubwami bambenja mala namiia lundi. Nanyoola kamaani kamakali khukhila mataayi.

³⁷Luno, ese Nebukadinesa fumia Omwami owe mwikulu, muniinia angaaki lundi muelesia lukoosi. Sikila bikholwa biewe bioosi bili bia ng'ali, ne chingila chewe chili chinuungi. Anyala aboombia abo be lukhole.