Read lubukusu Dan. 5 Bible Online

Dan. 5 - lubukusu bible

Dan. 5

¹Endaalo ndala omwami Belishasa akhola naikara engali khu bakhulu bewe chielefu. Mala anywa nabo endali.

²Nga baba ne banywa endali Belishasa arusia lilaka ali bareere bikoombe bie fwesa ne esahabu nibio raraawe Nebukadinesa aabukula khukhwama mu Lukaangu Yerusalemu. Omwami aabirumania nio omwami ne bakhulu bewe, bakhasi bewe, ne bakhasi nibo aamenyia busa nga basaale babinywelemo.

³Nio bareera bikoombe bie fwesa ne sahabu nibio babukula khukhwama mu Lukaangu, Yerusalemu. Mala omwami ne bakhulu bewe, bakhasi bewe, ne bakhasi nibo aamenyia busa nga basaale babinywelamo.

⁴Banywa endali ne bafumia bifwaani biabwe bie esahabu, efwesa, kumukasa, bichuuma, kimirongooro nende bie kamabaale.

⁵Ao ne nao chinjala che kumukhono kwo mundu chabonekha mala chaandika khwisiisi lie lichipi lio mwami, ambi ne siteetwe sie etaa. Omwami omwene abona kumukhono nga kuandika.

⁶Nio lukoondo lwo mwami lwakaluukhana, chinganakani chamunania. Kamakumba kewe kareenga ne kamasikamo katerema.

⁷Omwami alaanga bareere bafumu, balosi ne bamenieelesia ching'enieesi. Nga ne bareerwa, omwami aboolela be bukesi be mu Babiloni abo ali, “Yesi yesi oosoma kamaandiko kano ne khu khumboolela sifuno siako, alafwarwa engubo eye bubwami eefwaana buseemwa, ne kumunyololo kwe esahabu mwikosi ne alaba owa khataru mu bwami buno.”

⁸Nio bakesi boosi bo mwami becha, ne se banyala khusoma kamaandiko, namwe khuboolela omwami sifuno siako tawe.

⁹Mala omwami Belishasa esiindukha lukali, abiililwa mumoni. Bakhulu bewe beendekhelela.

¹⁰Khubeela kamakhuwa ko mwami ne bakhulu bewe, maawe kwini engila nimwo baba ne balikho baliila naikara, mala aloma ali, “Omwami menya mindali na mindali! Okheendekhelela tawe, namwe okhabiililwa tawe.

¹¹Aliio omundu mu bwami bwowo, olimo roho we bawele batakatifu. Mu biise bia raraao ne amiia, omundu yuno aanyoolekhana khuuba omundu oonyala khumanyilisia kamakhuwa kakekisa, ali omundu owe limanya lundi owe bukesi nga bwe bawele. Ne raraao, omwami Nebukadinesa, amukhola omwimeelesi we babaandu be kamayia, bafumu, balakusi, bang'oola ne bamenieelesia ching'enieesi mu Babiloni.

¹²Sikila roho omulayi lukali, bukesi ne limanya lie khubuula sifuno sie kamarooro, khukhwinoosia kiminai, ne khuyeeta butinyu biaba mu Danieli niye omwami atiuukha Beliteshasa. Nono laanga Danieli, akhwekesie sifuno.”

¹³Nio bareera Danieli ebweeni wo mwami. Omwami amureeba ali, “Ewe oli Danieli, mulala khu Bayaudi be mu mbaambe, nibo Paapa wase omwami, areera khukhwama e Buyuda?

¹⁴Ese nauliile bali roho we bawele batakatifu akhulimo, lundi bali oli ne bubwikhochochi, bukesi ne limanya likali.

¹⁵Nono babaandu base bakesi, ne bafumu bakhakile khusoma kamaandiko kano ne khu khumboolela sifuno siako ne kakhali bakhiliilwe.

¹⁶Nauliile bali onyala waboola bifuno ne khu khumalila butinyu bwase. Nono waaba ne onyala khusoma kamaandiko kano, mala umboolele sifuno siako, olafwarwa engubo eefwaana buseemwa eye bubwami, olafwarwa kumunyololo kwe esahabu mwikosi mala olaba okhola khataru mu bwami buno.”

¹⁷Nio Danieli akobosia omwami ali, “Lekha biianwa biowo bibe bibiowo. Bielesie okundi. Ne kakhali, nja khukhusomela kamaandiko mala khuboolele sifuno siako.

¹⁸“Ee omwami, Wele owe Angaaki Lukali aelesia raraao Nebukadinesa bubwami, amukhola aaba omukali, amuelesia lundi luyali ne bunyali.

¹⁹Mala khubeela bunyali nibwo amuelesia, babaandu boosi, chikholo ne chinimi baterema ne khumuria. Boosi nibo enya khukhwira eera, boosi nibo enya bamenye abalekha bamenya. Abo nibo enya khuniinia abaniinia ne abo nibo enya khukhwikhisia abekhisia.

²⁰Ne kakhali nga arakikha khuuba ne sileka, aaba ne kumwoyo kumulume lundi aaba owe kibonio, anuulwa endebe yewe eye bubwami, ne luyali lwewe.

²¹Arusibwa mu baandu, mala kamebaasio kewe kaaba oli ke saang'i. Aamenya ne chipunda che mundaa, aliisibwa bunyaasi nga eeyi, mala esiinga luume lwe mwikulu, khukhwola nga ne amanya ali Wele owe Angaaki Lukali ali ne bunyali bwe khukhwamiia omundu yesi yesi niye enya.

²²“Ne ewe, omwana wewe, Belishasa, se weboombia tawe akhaba ne wamanya kano koosi.

²³Weniinia khukhila Omwami Wele owe mwikulu. Mala wareera bibiindu bie mu Lukaangu lwewe ebweeni wowo mala ewe, ne bakhulu bowo, bakhasi bowo, ne bakhasi nibo wamenyia busa nga basaale babinywelamo endali. Ne ewe wafumia bifwaani bie bawele babang'oonwa khu fwesa, khu sahabu, khu mukasa, khu bichuuma, khu mirongooro ne khu mabaale, bifwaani bikhabona namwe biaulila, namwe biamanya tawe. Ne se waria Wele oliindanga bulamu bwowo lundi omanyile chingila chowo tawe.

²⁴Ako niko kakakila Wele ne aruma kumukhono khuandika kamakhuwa kano.

²⁵“Ne kano niko kakaandikwa, ‘MENE, MENE, TEKELI, PARISINI.’

²⁶Ne sifuno siako nisiesi: MENE liboola lili Wele amalile khubala chindaalo che bubwami bwowo ne khubwaakamia.

²⁷TEKELI liboola lili wapimiibwe khu sikelo mala wanyoolekhaane khuuba omwaangu.

²⁸PARISINI liboola lili bubwami bwowo bwakabukhasiibwe ne khuebwa Baamedi ne Bapasha.”

²⁹Nio Belishasa, akhalaka khufwara Danieli engubo eye bubwami, ne khumufwara mwikosi kumunyololo kwe esahabu kwe lukoosi. Mala amwamiia nga omwami owa khataru mu bwami bwewe.

³⁰Silo esio ne sisiene Belishasa, omwami we Bakalidayo erwa.

³¹Mala Dario, Omumedi amiia ne ali ne kimiiko kamakhumi sita na kibili.