Read lubukusu Dan. 6 Bible Online

Dan. 6 - lubukusu bible

Dan. 6

¹Omwami Dario abisia khurobora babemeelesi emia ndala ne kamakhumi kabili bamiie mu bwami bwewe bwoosi.

²Arobora babemeelesi bataru, mulala khwaabo Danieli ne babaandi babili bemeelele babemeelesi babaandi ne khuliinda kimiaandu kio mwami, nio omwami akhatibiakho siosi tawe.

³Nono Danieli amanyikhana khukhila babemeelesi ne bakhulu babaandi, sikila aaba ne roho eye khukhola buli siindu bulayi. Nio omwami apanga ali amiie Danieli khu bwami bwoosi.

⁴Nio babemeelesi ne bakhulu bakhaka khunyoola sifuno sie khusitaka Danieli khu lubeka lwe bubwami. Ne se banyoolakho sifuno tawe, sikila Danieli aaba omusuubilwa ne se abakho ne kamakhiikha namwe bubi bwosi bwosi tawe.

⁵Nio babaandu bano baboolana bali, “Se khulanyoola sifuno sie khusitaka Danieli tawe ne sikhali khuloondekhana ne kamakhuwa ke lilaka lia Wele wewe.”

⁶Nio babemeelesi ne bakhulu bauliilisiana bacha wo mwami bamuboolela bali, “Ee omwami Dario, oiindile mindali!

⁷Babemeelesi boosi mu bwami bwowo, baliindi ne babaloondela, bakeleki ne babemeelesi batiiti bafukiilisiane bali omwami arusie lilaka ne khuliimikha ne burafu. Yesi yesi osaba wele namwe omundu khu ndaalo kamakhumi kataru, khurusiakho ewe alamwaatwa mwiloo lie chitalang'i.

⁸Nono omwami rusia lilaka lino ne khurakho kumukhono, lilekhe khukaluukhasibwa khuloondekhana ne lilaka lie Baamedi ne Bapasha, likhakaluukhana tawe.”

⁹Nio omwami Dario arusia lilaka mala alirakho kumukhono.

¹⁰Nga Danieli ne amanya ali lilaka elio liabisiibwe, acha munju mwewe mu mwaba ne kamatirisia kakaloleelela Yerusalemu. Asikama khukhwola khataru khu ndaalo, ne asaba ne khufumia Wele wewe bulayi bwene nga aakholanga anyuma ao.

¹¹Babemeelesi abo becha nga bafukiilisiane mala banyoola Danieli ne alikho asaba Wele wewe amukholele siisa.

¹²Nio boosi bacha wo mwami khuabila Danieli ne baboola khu lilaka bali, “Omwami, ewe se wara esaini khu lilaka oli khu ndaalo kamakhumi kataru omundu yesi yesi osaba Wele namwe omundu ne okhali ewe tawe, alamwaatwa mwiloo lie chitalang'i?” Omwami abakobosia ali, “Yee, kali kario khuloondekhana ne lilaka lie Baamedi ne Bapasha, se linyala liakaluukhasibwa tawe.”

¹³Nio baboolela Omwami bali, “Danieli, mulala khu be mu mbaambe khukhwama Yuda, se akhuria ewe namwe khuria lilaka nilio walaka tawe. Asabanga khataru buli endaalo.”

¹⁴Nga omwami ne aaulila kamakhuwa kano, esiindukha lukali, akhaka lukali khunyoola engila eye khureesia Danieli. Achiililila khukhaka khukhwola nga bwelabula.

¹⁵Mala babaandu abo bakobola khu mwami ne bamuboolela bali, “Omwami omanyile oli lili lilaka lie Baamedi ne Bapasha, bali lilaka nilio omwami akhalake se linyalikha liakaluukhasibwa tawe.”

¹⁶Nio Omwami akhalaka Danieli aambwe ne khumwaatwa mwiloo lie chitalang'i. Omwami aboolela Danieli ali, “Okhoya Wele wowo, niye okholelanga buli lwosi akhureesie.”

¹⁷Mala bareera libaale bafuunikha emunwa we liloo. Omwami ara khu sifunikho kumukhono kwewe ne kumukhono kwe bakhulu bewe, nio siindu sikhekholekha khureesia Danieli tawe.

¹⁸Mala omwami akobola mu lichipi liewe, mala siilo sioosi khuliakho siindu tawe. Aarengecha busa ne se bamureererakho siakhulia siosi siosi tawe.

¹⁹Mala, makhelebeende omwami enyokha acha sieloo lie chitalang'i.

²⁰Nga eecha aambi ne mwiloo nimwo Danieli aaba, alaanga lukali ne liliiendekhelela, ne areeba ali, “Danieli, omukholi owa Wele omenyile mindali, Wele wowo niye okholelanga buli lwosi, akhureesiisie khukhwama khu talang'i ku?”

²¹Nio Danieli akobosia omwami ali, “Omwami oiindile mindali!

²²Wele wase arumire malaika wewe afuunikha kiminwa kie chitalang'i nio chikhakholakho kamabi tawe. Sikila se ndikho ne bubi mumoni chewe tawe. Ne lundi omwami ese khakholakho bubi bwosi bwosi khwiwe tawe.”

²³Omwami asangaala lukali po, mala arusia lilaka ali Danieli arusibwe mwiloo. Nio bamurusiamo, ne se aaba aumiiekho abuundu oosi oosi tawe, sikila eyikina Wele wewe.

²⁴Omwami arusia lilaka khu babaandu babaasitaka Danieli bareerwe mala bamwaatwe mwiloo lie chitalang'i. Nibo, babaana babwe, na bakhasi babwe. Ne bakhoola asi khu sibale sie liloo tawe, chitalang'i chaberiekakho chabakaamula ne khutonyaka bikuumba biabwe bioosi.

²⁵Mala omwami Dario aandikila babaandu boosi, chikholo ne chinimi khu liloba ali, “Kimileembe khwinywe!

²⁶Ese khalaka ndi mu bwami bwase bwoosi, babaandu barie ne khuelesia luyali Wele owa Danieli. “Sikila ali Wele omenyile mindali, aindila khulwa mindali. Bubwami bwewe se bulionakwa tawe, ne liliamiia liewe lilibao mindali.

²⁷Aonia lundi areesianga; akholanga ke khuukia ne kamakana, mwikulu ne khu sibala. Areesia Danieli khukhwama mu matere ke chitalang'i.”

²⁸Khwako Danieli yuno aindiala chindaalo che khukhwamiia khwo mwami Dario no mwami Sairasi Omupasia.