Read lubukusu Dan. 7 Bible Online

Dan. 7 - lubukusu bible

Dan. 7

¹Mu mwiiko kwe khunyoa Belishasa ne ali omwami owa Babiloni, Danieli aroora kamarooro mala abona kamalola nga aaba ne akonile khu sitanda siewe. Aandika kamarooro kewe kano:

²Ese Danieli mu malola mu silo nabona chimbeo chine khukhwama chimbeka choosi che sibala ne chitumbuula enyanja emboofu.

³ Mala chisaang'i chimboofu chine chiikhafwaanana tawe, charura khukhwama mu nyanja omwo.

⁴ Eye bweeni yafwaana nga etalang'i, mala yaba ne chindaa nga che furuusi. Nga naba ne siloleelela ndio, chindaa chayo chakhuulwa. Mala bakinyosia bakimisia khu bikele bibili nga omundu. Mala bakia bukesi bwo mundu.

⁵Ne lola, esaang'i ekiindi eya khabili efwaana nga sibulukhu. Yaba yachochomaale, mala yaba ne chimbafu chitaru mukhanwa akarikari we kameeno kayo. Nio kumumilo kwakiboolela kuli, “Yinyokha olie babaandu bakali nga ne wenya!”

⁶Enyuma owa kano nga ne naloleelela, ekiindi yabonekha efwaana nga engwe, mala eli ne chindaa che nyuni chine khu mokoongo khwayo. Esaang'i chana yaba ne kimirwe kine. Mala bakielesia bubwami.

⁷ Enyuma owa kano, nabona mu malola mu silo, nabona esaang'i eya khane. Yaba eye liuka, eye khuriisia lukali lundi eye kamaani kamakali po. Yaba ne kameeno ke sichuuma niko yarumikhira khulia ne khunyanyakamo biindu ne ebitabulaka mu bitonyi. Bibiasikala yabiswalakilila ne bikele biayo. Yaukhana ne chisaang'i chichiindi che bweeni choosi, mala yaba ne chinjika ekhumi.

⁸ Nga ne naloleelela chinjika echo, nabona lulwiika luluundi lukeekhe lwameelela akari we chichiindi ekhumi echo. Nio lunyoole bubweyaangu bwe khuchoa, bafunakila mu sisina chinjika che bweeni chitaru. Lulwiika luno lwaba ne chimoni nga cho mundu. Lwaba lundi ne kumunwa mala kumunwa okwo kwalomalomanga mu ngila eye sileka.

⁹ Nga naba ne siloleelela, chindebe che bubwami charebwao nio mulala, Omutaai lukali, khukhwama khaale, ekhalakho. Chingubo chewe chiwaanga chererere nga liiarara, ne lichuune liewe liaba likwalaafu nga bufuumbo bwe likheese. Endebe yewe yaba chinjaso che kumulilo, bikele biayo biaba kumulilo kuburukha.

¹⁰ Esebele eye kumulilo yatubukha luluuchi lwe kumulilo lwekha khukhwama ebweeni wewe. Bamalaika chielefu ne chielefu bamukholela, ne chimilioni chingali bema ebweeni wewe. Ekoti yekhala khukhwirekekhera khukhola bukhalaki, nio bitabu biekulibwa.

¹¹Nachiililila khuloleelela sikila naulila kamakhuwa kamakali niko lulwiika olwo lwalomalomaanga ne lwibonia. Ne nga naloleelela, beera esaang'i eyo, kumubili kwayo kwonakibwa mala bakuaana kwosibwe ne kumulilo.

¹²Chisaang'i chichiindi echo chanuulwa bunyali bwacho, ne kakhali bachilekha chichiililile khumenya khu siise ne chindaalo.

¹³ Nga ne nachiililila mu malola mu silo omwo, nabona mulala owafwaana nga omwana owo mundu ne echa khukhwama mu mafuumbi. Acha niye Omutaai Oyo ali, mala bamureera ebweeni wewe.

¹⁴ Khu niye bwaebwa bunyali ne luyali ne liliamiia nio babaandu boosi, chikholo, ne chinimi, bamukholele. Buruki bwewe, buli buruki bwa mindali, se buliwao tawe ne liliamiia liewe lili liliamiia likhonakwa tawe.

¹⁵Ese Danieli, nesiindukha lukali, mala kamalola ako kanjiendekhelesia lukali po.

¹⁶Khwako nacha khu mulalakho khu ba baaba ne bemile andebe eye bubwami, mala namureeba sifuno sie kamakhuwa kano koosi. Nio amboolela sifuno siako ali:

¹⁷“Chisaang'i chimboofu chine echo chili babaami bane bakheeche khu sibala.

¹⁸ Ne kakhali batakatifu ba Wele owe Angaaki Lukali bakhaebwe bubwami mala bakhabwamiie mindali na mindali.”

¹⁹Mala nenya khumanya sifuno sie esaang'i eya khane eyo, eyaba ne bubwaukhani bukali ne chichiindi choosi. Yaba eriisia likali, yaba ne kameno ke sichuuma ne kamatere ke kumukasa, yalia ne nyanyakamo ne khutonya mala yaswalakilila bibiarama ne bikele biayo.

²⁰Lundi nenya khumanya ke chinjika ekhumi khu murwe kwayo ne lulwiika luluundi lulwamela ne lufunaka chinjika chitaru, lwaba ne chimoni ne kumunwa kwe khukhwibonia mu kisuunia. Mala lwalolekhana khukhila chichasie.

²¹ Nga naloleelela, lulwiika luno lwapana liie ne batakatifu ba Wele mala lwabaula.

²² Ne kakhali Omutaai Lukali oyo enyokha, mala arusia bukhalaki aelesia batakatifu ba Wele owe Angaaki Lukali bung'ali bwabwe. Nga siise siola, batakatifu abo baebwa bubwami.

²³Nio aloma ali: “Khuloondekhana nende esaang'i eye khane, bulibaao bubwami bwa khane khu sibala buliaukhana ne bubwami bubuundi bwoosi mala bulimila sibala sioosi. Bukhasiswalakilile mala busitonyemo bitonyi.

²⁴ Ne khu njika ekhumi, babaami ekhumi bakhaame mu bwami buno ne okundi aliamiia enyuma wabwe, ne yuno akhaukhane ne bataayi, mala aliula babaami bataru

²⁵ Alifwochola Wele owe Angaaki Lukali mala apie siibi babaandu batakatifu ba Wele owe Angaaki Lukali. Akhakhake khukalukhania lilaka ne chindaalo cha naikara chindakatifu. Batakatifu bakhaanwe mu makhono kewe khu siise, biise bibili, nende enusu eye siise.

²⁶Ne kakhali ekoti ekhakhole sisiikhasio, mala buruki bwewe bulibukulibwa. Bulimilwa ne khukhwonakibwa elala,

²⁷ mala bubwami, bunyali ne bukali bwe bubwami buuli asi we likulu lioosi bulaanwa khu baandu be batakatifu ba Wele owe Angaaki Lukali. Bubwami bwabwe buliba bubwami bwa mindali, ne buruki bwoosi bulibakholela nibo ne khubaria.”

²⁸Sino nisio sisiakamo sia kano. Ne ese Danieli, neendekhelela lukali, nakaluukhana lukoondo. Ne kakhali nabiikha buli siindu mu mwoyo kwase.