Read lubukusu Dan. 8 Bible Online

Dan. 8 - lubukusu bible

Dan. 8

¹Mu mwiiko kwa khataru Belishasa ne ali omwami, Ese Danieli nabona kamalola kakaandi, Nabona kamalola ka khabili enyuma we khubona ke khunyoa ako.

²Mu malola kano, nenyoola ndi Susa, lukoba luboofu lwe lukoongo lwa Elamu. Naba nemile aluuchi lulaangwa Ulai.

³Nasuta bubweeni mala nabona limiiku liemile khu luuchi. Liaba ne kimisanga kibili, kiombi kimileeyi, mala mulala kumuleeyikho khukhila kukuundi. Kumuleeyikho kwamaliilikha khumela.

⁴Nabona limiiku chana ne liipana ne licha elubeka lwe mumbo, ebunaswa, ne siafubo. Se yabakhoo esaang'i yosi yosi eyakhaka khulikhiingilila namwe eyefubarura kamaani kalio tawe. Ne se abakhoo yesi yesi owanyala khureesia khukhwama mu bunyali bwalio tawe. Liakhola siosi siosi nisio lienya mala liaba ne kamaani lukali.

⁵Nga naba ne siloleelela, nabona endurume khukhwama lubeka lwe mumbo, ne elikho yiicha khangu khu sibala sioosi, mala se yetilangakho asi tawe. Endurume eyo yaba ne lulwiika luboofu akari we chimoni chayo.

⁶Yacha niyo limiiku lie kimisaanga kibili, nilio nabona ne liimile aluuchi liaba. Yalitimakakho ne kamaani kamakali yaliuunaka, yafunaka kimisaanga kialio kiombi. Limiiku elio se liabakho ne kamaani ke khu khupania endurume eyo tawe. Yamwaata limiiku elio asi mala yaliswalakilila. Se abakhoo yesi yesi onyala areesia limiiku elio khukhwama khu maani ke ndurume eyo tawe.

⁷Nakibona ne ibwaakala limiiku. Yaba ne lirima likali khu limiiku mala yaliuunaka yafuna kimisanga kialio kiombi. Limiiku se liabakho ne kamaani ke khuukipania tawe. Yamwaata limiiku elio asi mala yaliswalakilila, ne se abakhoo yesi yesi owanyala khureesia limiiku elio khukhwama khu maani ke ndurume eyo tawe.

⁸Mala endurume yaselukha, yakhula yaba ne kamaani kamakali po. Ne kakhali nga yola khuuba ne kamaani kamakali ako, lulwiika lwayo luboofu olwo lwafunikha. Mala abuundu ao, amelao chinjika chine chichereka. Chaloleelela chimbeka chine che likulu.

⁹Khukhwama mu lwiika lulalakho khu njika echo, lulwiika luluundi lukeekhe lwamela. Lwachoa lukali ne lulola lubeka lwe siafubo, ebukwe, ne elubeka we sibala silayi.

¹⁰ Lwakhula lukali lwolela bibuumbe bie mwikulu. Mala yamwaata asi ching'enieesi ndalakho yachiswalakilila asi.

¹¹Lwakhula lwalea lwoola khu mukhulu owe bibuumbe bie mwikulu. Mala yamurusiakho biianwa bia buli lwoosi bie khukhwosia. Nio yonaka abuundu wewe atakatifu.

¹²Sikila bumayaanu, bibuumbe bie mwikulu biaanwa khu niyo, alala ne biianwa bie khukhwosia bia buli lwoosi.

¹³Mala naulila omutakatifu mulala ne alomaloma no wasie. Owasie oyo amureeba ali, “Kamakhuwa niko kamalola kano kalikho kaboola kalachiililila khu siise siina? Biaanwa bie khukhwosia bia buli ndaalo bilarama ne bikaluukhasiibwe khu siise siina? Buutibi bwe khukhwonaka buli siindu bulachiililila khu siise siina? Ne Abuundu Atakatifu, alala ne bibuumbe bie mwikulu bilachiililila khuswalakililwa khu siise siina?”

¹⁴Omutakatifu owe khunyoa oyo amukobosia ali, “Khu biise bie akolooba nende kumutikhinyi chielefu chibili ne chimia chitaru. Nio Abuundu Atakatifu akobosebwe liiba liao lia ng'ali.”

¹⁵Nono ese, Danieli nga naba ne kamalola, nenya manye sifuno siako. Nio ao ne nao mulala eema ebweeni wase ofwaana nga omundu.

¹⁶ Naulila aluuchi lulaangwa Ulai kumumilo kwo mundu ne kulaanga kuli, “Kaburieli, yeeta omundu yuno amanye sifuno sie kamalola niko aboone.”

¹⁷Nio Kaburieli echa siimbi nende niio naba ne nimile. Naria lukali mala nakwa asi mafumala. Ne kakhali amboolela ali, “Ulila mwana wo mundu, kamalola niko oboone kali khu ndaalo chimaliilisi.”

¹⁸Oli asilomaloma nase, naambwa ne liilo likali ne ndikho ngona mafumala. Ne niye ambamba, anjimisia.

¹⁹Mala amboolela ali, “Lolakho, ndikho khwekesia kacha khwikholekha lwanyuma mu siise sie lirima lia Wele. Kamalola ako kali ke chindaalo chimaliilisi.

²⁰“Ne ke khu limiiku nilio wabona ne kimisanga kibili, bali babaami ba Metia ne Pasha.

²¹Mala endurume eli omwami we Bakiriki, ne lulwiika akari we chimoni chayo luli omwami we khunyoa.

²²Lulwiika lulwafunikha, mala chichiindi chine ne chimelao, chili bubwami bune buliama mu kholo yewe, ne kakhali bubwami bune obwo se buliba ne bunyali nga bwe bubwami bwe khunyoa obwo tawe.

²³“Nga bubwami obwo bukhoole khu siakamo siabwo, mala bumayaanu bwoosi bube bukali bwoole khu siakamo siabwo, omwami mulala akheche ookhabe ne bunyindaafu lundi omukesi.

²⁴Bunyali bwewe buliba bukali. Alisaasia bubwonaki bukali lukali mala alitabusia buli nilio akhakhole. Akhabunie babaandu be kamaani kamakali ne babaandu ba Wele.

²⁵Mu bubacha bwewe ne bubeeyi, akhanyale khukhola lirekekha liewe liibi. Mala akheniinie. Akhabunie baandu bakali ne bakhamanyile tawe. Akhenye khu khuupana nende Omukhulu owe bakhulu, ne kakhali akhabunisibwe ne kamaani kakhali ko mundu tawe.

²⁶Kamalola ke akolooba ne kumutikhinyi kakenoosiibwe, kali ka ng'ali. Nono kakise sikila kalabukula siise sileeyi.”

²⁷Nio ese, Danieli, naweelelela kamaani mala nakona asi nendi omulwale khu siise. Mala nenyokha khukhola kimilimo kio mwami. Ne kakhali kamalola ako kambukia, ne ese se nanyala khu kamanya tawe.