Read lubukusu Dan. 9 Bible Online

Dan. 9 - lubukusu bible

Dan. 9

¹Mu mwiiko kwe khunyoa mu liamiia lia Dario, okhwa Ahuswero niye bamiia mu sibala sie Bakalidayo mu liamiia liewe lie khunyoa,

² ese Danieli, namenieelesia kaali mu bitabu bitakatifu mala khukhwama mu nibio namanyilisia sifuno sie likhuwa nilio Omwami Wele aaboolela omung'oosi Yeremia khuloondekhana nende kimiiko kamakhumi saba ekio, Khuloondekhana ne khukhwonakwa khwa Yerusalemu.

³Nio nasaba Omwami Wele mukhwikoonjelela namulilila, neyimana khulia, nefwara kamakunia, ne khukhwikhala mwikokhe.

⁴Nasaba Omwami Wele, Wele wase ne khukhwiyama ndi: “Ee Omwami Wele, ewe oli Wele Omukali lundi ooriisia. Oli omusuubilwa khu ndakaano yowo ne wekesianga busiime bwa ng'ali khwaabo babakhusiima ne khuloonda kamalaka kowo.

⁵“Efwe khwakholile bubwoni lundi khwakholile kamabi. Khwabeele bamayaanu lundi khwabeele ne bureengu. Khwauukhe khukhwama khu malaka kowo ne lilakiilisia liowo.

⁶Se khwarekeeresia bakholi bowo bang'oosi, babalomaloma mu lisina liowo khu baami befwe, khu bakhulu befwe, khu bikuuka biefwe ne khu sibala siefwe sioosi tawe.

⁷Buluungi buli lubeka lwowo, ee Omwami. Ne kakhali chisoni nga chiliio luno luri chili khwifwe, babaandu ba Yuda, bamenywa ba Yerusalemu, ne Isiraeli yoosi, ne nabo nibo ewe wasalanisia mu bibala bie aembi ne aleeyi khulwe khulekha khuuba basuubilwa khwiwe.

⁸Khwifwe Omwami Wele, kali likoyaana khu baami befwe, bakhulu befwe, bikuuka biefwe, sikila khwakhola kamabi ebweeni wowo.

⁹Khwiwe Omwami Wele, kali siisa ne silekhelo, akhaba ne khwakhukholela kamabi.

¹⁰Se khwakhurekeeresia tawe, ee Omwami Wele wefwe, nga ne khukhaloonda kamalaka kowo niko wakhuelesia efwe khubirira mu bakholi bowo bang'oosi.

¹¹Baisiraeli boosi bafunaka kamalaka kowo ne khuloba khukhurekeeresia. Silaamo ne sisiechubo bibiaandikwa mu lilaka lia Musa omukholi wa Wele, biakhwikholeekhekho, sikila khwakholile bubwoni khwiwe.

¹²Wakholile koosi niko wakhukhalakila efwe ne babaami befwe, nga nilwo oukuumile lukoba lwa Yerusalemu burafu lukali khukhila lukoba luluundi lwosi lwosi khu sibala.

¹³Ewe wakhuukuumile bulayi bwene nga ne kaandikwa mu malaka ka Musa, ne kakhali khukhwola luno, ee Wele Omunyali Owa Bioosi, Wele wefwe, se khwakhusabile okhubeele tawe. Se khwalekhile bubwoni bwefwe ne khukhwibaasia khu busuubilwa bwowo tawe.

¹⁴Khwako ee Omwami Wele, Wele wefwe, waba werekeekhe khu khuukuuma efwe, mala wakhuukuuma, sikila buli lwoosi okholanga kaali kamaluungi, ne efwe se khwakhurekeeresia tawe.

¹⁵“Ne siise sino, Omwami Wele wefwe, owarusia babaandu bowo khukhwama e Misiri mu bunyali bwowo bukali ne khukhola lisina liowo lieebwe luyali khukhwola luno. Khwakholile bumayaanu ne kamabi.

¹⁶Ee Omwami, khulwe bikholwa biowo bia ng'ali okhaambwa ne lirima ne lukoba lwa Yerusalemu, ne sikulu siowo sitakatifu tawe. Ne sikila bumayaanu bwefwe nende kamabi ke bikuuka biefwe, Yerusalemu ne babaandu bowo babeele chisoni khu bibala biili siimbi.

¹⁷Ee Wele wefwe, ulila lisaba lio omukholi wowo ne liliekoonjelela liewe. Nosiima ng'oona lundi Lukaangu lwowo nilwo bonaka.

¹⁸Ee Wele, khurekereesie mala obone butinyu bwefwe nende bwe lukoba lulaangwa mwisina liowo. Se khulikho khu khusaba sikila buluungi bwefwe tawe, ne kakhali khulikho khukhusaba khulwe siisa siowo sikali.

¹⁹Ee Omwami Wele, khuulile! Ee Omwami Wele, khubeele! Omwami Wele, khurekereesie, lundi okhole! Okhakhiinda tawe, Omwami Wele, sikila lukoba ne babaandu bowo balaangwa mwisina liowo.”

²⁰Nga naba ne saba, ne niyama bubwoni bwase ne bubwoni bwe babaandu base ba Isiraeli, ne khulilila Omwami Wele wase, khulwe sikulu sitakatifu sia Wele wase,

²¹ Omundu Kaburieli oyo, niye nabona mu malola kamataayi, echa khangu niio naba. Siaba siise sie khuaana chimbosio akolooba.

²²Echa mala amboolela ali, “Ee Danieli, ese nechile khuelesie bukesi ne liiulila.

²³Nga warakikha khusaba Wele, akhukobosia. Nono nechile khukhuboolela likobosio. Sikila ewe oli omusiime lukali. Khwako rekeeresia bulayi mala omanye sifuno sie kamalola.

²⁴“Kimiiko kamakhumi saba khukhwola saba kiakhalaakwe khu baandu bowo ne sikulu siowo sitakatifu, khumalao kamakhiikha, khukhwakamia bubwoni, khubeela bumayaanu, khureera buluungi bwa mindali, khuura kumuuri khu malola ne bung'oosi, ne khuakha kamafura Abuundu Atakatifu Lukali.

²⁵Khwako manya mala omanye bulayi likhuwa lino: Khukhwama siise nisio lilaka likharusibwe khukhwombakhwa lundi lukoba lwa Yerusalemu khukhwola khukhwicha khwo murobore owa Wele owaakhwa kamafura, silibao siise sie kamachuuma saba. Khu siise sie kamachuuma kamakhumi sita na kibili, lukoba lwa Yerusalemu luliombakhwa lundi ne chingila ne lisiisi lie kamaani, ne kakhali siise esio sikhabe sie butinyu.

²⁶Nio enyuma we kamachuuma kamakhumi sita na kabili ako, owaakhwa kamafura oyo akheerwe ne se akhabekho na sioosi tawe. Babaandu bo mwami wicha balionaka lukoba ne abuundu atakatifu. Ekhumaliilikha khwayo khulibao ne kameechi kamakali, liie ne lilionaka nilio Wele arekekha.

²⁷ Omwami oyo alakhola lifukiilisiana lie kamaani ne babaandu bakali khulwe lichuuma lilala. Mala mu nusu eye lichuuma alakamia khuaana chimbosio ne biianwa. Mu bweyaangu bwabio mu Lukaangu silibao Sibiilisio sie Lilionaka khukhwola nga owaraao Sibiilisio oyo ne akhabunisibwe nga nilwo Wele ne aamurekekhera.”