Read lubukusu Hos. 1 Bible Online

Hos. 1 - lubukusu bible

Hos. 1

¹ Buno buli burume nibwo Wele Omunyali Owa Bioosi aelesia Hosea okhwa Beeri mu siise nisio Usia, Yosamu, Ahasi, ne Hesekia baaba babaami ba Yuda, ne Yeroboamu okhwa Yeoasi aaba omwami owa Isiraeli.

²Nga Wele Omunyali Owa Bioosi ne alomaloma lwe khunyoa khu Isiraeli khubirira khu Hosea, amuboolela ali, “Cha oyile omukhasi, omukhasi yuno alaba omueeyi, ne alasaala babaana bamuloonde, bulayi bwene nga babaandu base ne bandekhile mala baloba khukhusuubila ese.”

³Nio Hosea ayila Komeri, omukhaana owa Tibulaimu. Komeri asaala omwana omusoleeli.

⁴ Wele Omunyali Owa Bioosi aboolela Hosea ali, “Mutiuukhe oli ‘Yesireeli,’ sikila mu siise sitiiti ndaukuuma enju eya Yehu sikila sifuki sia Yesireeli. Ndikho nja khwakamia bubwami bwe enju eya Isiraeli.

⁵Ne endaalo eyo ndibunia banamae ba Isiraeli mwitooma lia Yesireeli.”

⁶Komeri anyoola omwana owa khabili, omukhaana. Nio Wele Omunyali Owa Bioosi aboolela Hosea ali, “Mutiuukhe oli ‘Nabulobe,’ sikila ese se ndokesiakho siisa lundi khu nju eya Isiraeli tawe, namwe mbabeele tawe.

⁷Ne kakhali khu baandu ba Yuda ndekesia siisa. Ese, Wele Omunyali Owa Bioosi, Wele wabwe, ndabaonia. Ne se khabaonie ne liie, namwe ne chifarasi namwe ne babaandu bachitimia tawe.”

⁸Nga Komeri alatia Nabulobe aesia lundi, asaala omwana omusoleeli.

⁹Mala Wele Omunyali Owa Bioosi aboola ali, “Mutiuukhe oli ‘Se-Bali-Babaandu-Base Tawe,’ sikila se muli babaandu base tawe, ne Ese se ndi Wele wenywe tawe.”

¹⁰ Babaandu ba Isiraeli baliba nga kumuyekhe kwe mu nyanja, bakhabalikha namwe khukelwa tawe. Ne abuundu niio baboolelwa bali, “Enywe se muli babaandu base tawe,” ao baliboolelwa bali, “Enywe Muli Babaana Ba Wele omenyile mindali!”

¹¹Nono babaandu ba Yuda ne babaandu ba Isiraeli balibuusiana alala. Balirobora omwimeelesi mulala mala baliindiala mu sibala siabwe. Ng'ali eliba endaalo emboofu eya Yesireeli.