Read lubukusu Hos. 10 Bible Online

Hos. 10 - lubukusu bible

Hos. 10

¹Babaandu Baisiraeli baba nga kumusabibu kukwanenekha. Nga baindiaalanga, bachililanga khukhwombakha chi alutare chichiindi. Nga sibala siabwe siachiililila khuindiaala, nabo bachiililila khusaa kamabaale kabwe niko basaaya.

²Bali babeeyi, nono bakhoyela banaanisibwe khu mabi kabwe. Wele Omunyali Owa Bioosi alifunaka chi alutare chabwe, ne khukhwonaka chinjeko chabwe che khukhwesaaya.

³Ne luno baloma bali, “Se khuli no mwami tawe, sikila se khuriakho Wele Omunyali Owa Bioosi tawe, nono omwami naye, alikhukholela siina?”

⁴Belomalomia busa kamakhuwa bakhola chindakaano mu khwechuba khwe bubeeyi, nono likhalaka linyokha busa nga enyoonyi embi mu mukuunda kumulime.

⁵Bamenywa ba Samaria baterema khubeela euunwa eye Beteli. Babaandu bayo balikilila, ne basaayi bayo bakisaaya balikilila, sikila lukoosi lwayo lwakilekhile.

⁶Ee, sifwaani sisiene siliilwa Asiria, nga kumuruungo khu mwami omukhulu. Efuraimu aliambwa chisoni ne Isiraeli eliambwa chisoni sikila sifwaani siayo.

⁷Omwami owa Samaria alibukulwa, nga sitonyi sie lukhu khu meechi.

⁸ Binamwima bie khu lukulu mu Afeni, niio Baisiraeli basaayilangao bifwaani, bikhonakakwe. Kamawa ne mbululwe bilimela khu alutare chabwe. Baliboolela bikulu bali, “Khukise!” Ne chingulu bali, “Khufuume!”

⁹ Wele Omunyali Owa Bioosi aboola ali, “Babaandu ba Isiraeli bakhalekhakho khu khukholela bubwoni tawe, khukhwama siise nisio bakholela bubwoni e Kibea, khwako, liie likhabanyoole e Kibea.

¹⁰Ndibwaakala babaandu babooni bano ne khubaukuuma. Chikholo chiliebuusia khubebwaakala, mala baliukuumwa sikila bubwoni bwabwe bukali.

¹¹“Isiraeli yaba nga ekhaafu niyo beyikia bulayi khukhwesa lichooki, ne kakhali se nara khwikosi liayo lilayi elio lichooki namwe nakira khu milimo kimikali tawe. Nakhola Yuda khukhwesa embako, ne Isiraeli khubuusa.

¹² Yebiaalila mwabene bung'ali, kesa kamatuunda ke busiime bukhawa tawe, lima liirome lienywe, sikila sili siise sie khuyiima Wele Omunyali Owa Bioosi, nio amuelesie buonia.

¹³Mwabiaala kamamayaanu mwakesile kakhali kang'ali tawe, mwaliile lituunda lie bubeeyi. “Sikila mweyikina kamakaari ke chifarasi ne bukali bwe banamae bowo,

¹⁴khwako sisiayuumba sie liie sikhabeo khu baandu bowo, ne chingoba chowo choosi chikhonakwe, nga Salimoni abunia Besaribeli mu ndaalo eye liie, ne bamaayi ne babaana babwe batienuulwa bafwa.

¹⁵Ee Isiraeli, kano kaliekholekha khwinywe sikila bubwoni bwenywe bukali, omwami owa Isiraeli alifwila mu mbembeesi[5].”