Read lubukusu Hos. 12 Bible Online

Hos. 12 - lubukusu bible

Hos. 12

¹Efuraimu aaya embeo, mala aloondeleela embeo eye ebunaswa endaalo yoosi, batasa bubeeyi ne sisiayuumba bakhola endakaano nende Asiria, ne kamafura kayilwa e Misiri.

²Wele Omunyali Owa Bioosi asitaka Yuda, ne alaukuuma Yakobo khu bikholwa biewe, ne khumua kumuruuru khu bikholwa biewe.

³ Ne asiili munda mwa maawe, atiila wandaaye ekhukunyu, ne mu bukhulu bwewe arekana ne Wele.

⁴ Arekana ne malaika mala amukhila, alila ne khusaba buyeeti bwewe, akaanana nende Wele e Beteli, ebweeneyo Wele alomaloma naye.

⁵Wele Omunyali Owa Bioosi, Wele we banamae, lisina liewe bali Wele Omunyali Owa Bioosi.

⁶Nono ewe, mu buyeeti bwa Wele wowo kobola, lumilila khu busiime ne bung'ali, chiililila khulindiilila Wele wowo.

⁷Wele Omunyali Owa Bioosi aloma ali, “Babaandu ba Isiraeli bafwaanana busa ne Bakanaani mu bubeeyi, basiima khukhwibila mu bipiimilo biabwe abo babakulakho.

⁸Efuraimu alomile ali, ‘Aa, ndi omuiinda nenyoolele samwene kimiaandu,’ ne kakhali kimiaandu kiewe kiosi se kinyala khurusiao bumayaanu bumulikho tawe.

⁹ Ese ndi Wele Omunyali Owa Bioosi, Wele wowo, khukhwama mu sibala sia Misiri, nja khumukhola mumenye lundi mu maeema, nga mu ndaalo che naikara yakhalakwa.

¹⁰“Nalomaloma khu bang'oosi, naba ese wakaliia kamalola, naana chisimo khubirira mu bang'oosi.

¹¹Bumayaanu bwaaba ne buli mu Kileati, se bulibayeeta siindu tawe, ne baba ne baana chiuunwa nga chimbosio e Kilikali, chi alutare chabwe chiliba nga bipupu bie kamabaale mu mukuunda kulimiilwe.”

¹² (Yakobo elukhila mu sibala sia Aramu ebweeneyo asiooba akhwe omukhasi aaya kamakheese nio anyoole omukhasi.)

¹³ Khubirira mu mung'oosi, Wele Omunyali Owa Bioosi arusia Isiraeli e Misiri, mala Isiraeli aaliindwa no mung'oosi.

¹⁴Efuraimu akholile ke lisinye likali po, khwako Wele Omunyali Owa Bioosi akalusia sifuki khu mwene, ne acha khumuukuuma khu mamayaanu kewe.