Read lubukusu Hos. 13 Bible Online

Hos. 13 - lubukusu bible

Hos. 13

¹Nga Efuraimu aalomaloma, babaandu baterema, aaba we luyali mu Isiraeli ne kakhali anyolekhana ne kamamayaanu khubeela Baali mala afwa.

²Nono bachiililila khukhola bubwoni, nga bekholela bifwaani bibiinakulukha, bifwaani bibiakholwa mu busicha ne fwesa yabwe, bioosi bili kumulimo kwe babeechi aboolela babaandu khuaana chimbosio khu bino, ne khubikwayila.

³Khwako baliba nga namufweli we kumutikhinyi, namwe nga luume luwao bwangu, nga likhuuchi nilio babisia, namwe nga liliisi lirurira mwitirisia.

⁴Ese ndi Wele Omunyali Owa Bioosi, Wele wowo, khukhwama mu sibala sia Misiri, somanyile Wele okundi, ne khali ese tawe, ne nekhali ese, omuonia okundi se aliio tawe.

⁵ Naba ese owakhumanya mu sichiimi, mu sibala sie siimiyu.

⁶Ne nga balia lukali bekurira elala, basangaala, mala banjibilila,

⁷khwako nja khuba khu nibo nga etalang'i, nga engwe, ndabebuulila khu ngila.

⁸Ndi bafwakhila nga linani, litibiisie ching'ana chalio, nditabulaka bifuba biabwe, ao ne nao khubalia nga etalang'i, ne khubatabulaka nga esaang'i eye mundaa ne ebatabulaka.

⁹Isiraeli, khamubunie enywe, naanu olimuyeeta enywe?

¹⁰ Nono omwami wenywe ali waena, amuonie? Babemeelesi benywe bosi nabo bali waena bamuliinde? Mwaboolela balala muli, “Khuelesie omwami ne babemeelesi.”

¹¹ Namuelesia enywe babaami mwirima, ne mu lisinyikha liase nabarusiisieo.

¹²Bumayaanu bwa Isiraeli bwaboyilwe bubwoni bwewe bwabikhiilwe mu siaki.

¹³Buchuuni bwe khusaala omwana bwama khu niye, ne kakhali ali omwana omusilu, nga owenya khusaalwa mala aloba khurura munda mwa maawe.

¹⁴ Ndionia Isiraeli khukhwama mu bunyali bwe Makoombe ku? Ndibaonia khukhwama mwifwa ku? Ee Makoombe, libuna liowo lili waena? Se ndaba ne siisa lundi tawe.

¹⁵Akhaba omulayi nga simelwa, embeo eye ebukwe, eya Wele Omunyali Owa Bioosi, eliucha khukhwama mu sichiimi, nio esebele yewe yoome ne emoni eye kameechi kewe eteenye, buli siindu sili silayi silinuulwa khukhwama mu libiikhilo liewe.

¹⁶Samaria aliukuumwa sikila bumayaanu bwewe, sikila aakholela Wele wewe sileka, balifwila mwiie babaana babwe baliremakwamo bitonyi ne bakhasi babwe baali sisombo balitienulwamo.