Read lubukusu Hos. 14 Bible Online

Hos. 14 - lubukusu bible

Hos. 14

¹Isiraeli, kobolela Wele Omunyali Owa Bioosi, Wele wowo, wakwile sikila bubwoni bwowo.

²Yibaasia kamakhuwa kano, mala okobolele Omwami Wele omuboolele oli, “Rusiao bubwoni bwase bwoosi, yakaanila ako kali kamalayi, nio khu khufumie ne kiminwa kiefwe.

³Asiria se elikhuonia tawe, se khulikeendela khu farasi tawe, se khulilaanga kimilimo kie kamakhono kefwe khuli, ‘Wele wefwe tawe.’ Ne omufuubi anyoolanga siisa khwiwe.”

⁴Wele Omunyali Owa Bioosi aloma ali, “Ndikobosia babaandu base, ndibasiima ne kumwoyo kwase kwoosi, nono se ndibaambila lirima lundi tawe.

⁵Ndiba khu Baisiraeli nga luume, ne balimulikha nga bimuli, ne khukhwikhisia kimili nga kimirongooro kia Lebanoni.

⁶Kimili kiewe kilialaama mwiloba, bulayi bwewe buliba nga kumusabibu, ne elaafu yewe nga eye Lebanoni.

⁷Balikobola bamenye mu siniini siase, balimulikha nga kumusabibu, elaafu yabwe eliba nga endali eye Lebanoni.

⁸Ee Efuraimu, Ese ndi na siina ne bifwaani? Ese niise omukobosianga ne musaba, lundi ese niise omuliindanga. Ese ndi nga Saipurasi bibiaamo biowo biama khwise.”

⁹Ooli omukesi, aulile bibiindu bino, ooli omurekeerefu, abimanye, sikila chingila cha Wele Omunyali Owa Bioosi chili cha ng'ali, baali baluungi bakeendelakho, ne babooni betuya.