Read lubukusu Hos. 2 Bible Online

Hos. 2 - lubukusu bible

Hos. 2

¹Laanga wandaayo omusoleeli[1] “Babaandu base,” ne wandaayo omukhaana[2] oli, “Owaebwa siisa.”

²Baana base yekoonjelela maawenywe, akhaba luno ne akhali omukhasi wase tawe, ne nase se ndi omuseecha wewe tawe, mwekoonjelele alekhe bueeyi.

³Kholandio namufuula mala aba sichula nga khu ndaalo niyo asaalilwakho, mala abe nga sichiimi, mukhole oome nga sibala sisioomu nio mwiire ne bulesia.

⁴Khu baana bewe boosi se ndibakho ne siisa tawe sikila bali babaana babasaalwa mu bueeyi.

⁵Sikila mawaabwe akhola bueeyi owabasaala akhola ke chisoni sikila aloma ali, “Nja khuloonda khu basaale base babambechanga siakhulia ne kameechi, bufuumbo bwe kamakheese ne katani, kamafura nende nibio enywa.”

⁶Khwako ndisira engila yewe ne kamawa mubotookhelesie lisiisi saliba ne ngila eye khurura tawe.

⁷Aliloondelela basaale bewe ne kakhali se alibanyoola tawe, alibayiima ne kakhali se alibanyoola tawe mala aliloma ali, “Lekha ngobole wo museecha wase owambula sikila nabakho bulayi siisa esio, khukhila luno.”

⁸Ne se amanya ali ese niye wamua biakhulia, endali ne kamafura, owabaelesia efwesa ne esahabu engali niyo arumikha khusaaya Baali tawe.

⁹Khwako ndimunuula biakhulia biase mu siise sie likesa ne endali yase mu siise siayo ndimunuula chingubo chase che bufuumbo bwe kamakheese ne katani nibio namuelesia khukhwefwara.

¹⁰Ndimufwarura arame sichula ebweeni we batia bewe ne se aliio olikhiingilila khukhola ndio tawe.

¹¹Ndiakamia busangaafu bwewe bwoosi chinaikara chewe che kimieesi kimiya ne chisabato chewe, ne chinaikara chewe choosi chichalakwa.

¹²Ndionaka kimisabibu ne kimituli kiewe nikio aloma ali, “Kino kili kumuruungo nikwo batia base baamba.” Ndikikhola kibe kumusiru ne chisaang'i che mundaa chilikionakaka.

¹³Wele Omunyali Owa Bioosi aloma ali, “Ndimuukuuma niye sikila chindaalo nicho akholela Baali naikara, nga abooselia bupaani ne esaa omwene embete ne kamamili nio ache khuyiima batia bewe mala anjibilila ese.

¹⁴“Khwako, nja khumuombelesia muyile mu sichiimi mala ngachule naye bulayi.

¹⁵ Ebweeneyo ndimuelesia biluundu bie kimisabibu kiewe mala khole litooma lia Akori libe kumuliango kwe lilieyikina. Nio ebweeneyo alilomaloma nga mu ndaalo chewe che buele nga mu sise nisio aruriira e Misiri.”

¹⁶Omwami Wele aloma ali, “Endaalo eyo ewe olinaanga oli ‘Omuseecha wase,’ se olilomakho lundi oli Baali wase tawe.”

¹⁷Sikila ndirusia mu munwa kwewe kamasina ke ba Baali. Se balilangwakho lundi kamasina ako tawe.

¹⁸Mala mu siise esio ndikhola endakaano ne chisaang'i che mundaa, ne chinyuni, ne bibiindu bioosi bimoola. Ndirusia buyiingo, embalu nende liie khu sibala. Ndikhukhola omenye mu muleembe.

¹⁹Ne ese ndikhubukula obe omukhasi wase owa buli lwoosi. Oliba omukhasi wase mu busuubilifu ne mu bung'ali, mu busiime bukhawa ne mu siisa sia mindali.

²⁰Ndikhubukula obe omukhasi wase mu busuubilifu, mala omanye Wele Omunyali Owa Bioosi.

²¹Wele Omunyali Owa Bioosi aloma ali mu ndaalo eyo, ndifukiilila lisaba lie babaandu base Isiraeli ne khalekhuule efula ekwe, ne sibala silikhusia biakhulia ne kamatuunda.

²³ Khemekhe babaandu base mu sibala mala mbaelesie kimiaandu. Ndiekesia busiime bwase khwaabo nibo balanganga bali “Nabulobe,” ne khwaabo babalaangwa bali, “Se Bali Babaandu Base Tawe,” Ndiboola ndi, “Muli Babaandu Base” ne nabo baliloma bali, “Nawe oli Wele wefwe.”