Read lubukusu Hos. 4 Bible Online

Hos. 4 - lubukusu bible

Hos. 4

¹Ulila likhuwa lia Wele Omunyali Owa Bioosi enywe baandu ba Isiraeli, sikila Wele Omunyali Owa Bioosi ali ne libiiya khu baandu ba menyile mu sibala. Busuubilifu namwe siisa se biliio tawe, ne limanya lia Wele mu sibala mbamo.

²Khuli ne khukhwechuba, bubeeyi, bubwiri, bubwifwi ne khukhola bueeyi bafuna kamalaka koosi ne beera nandakhaola.

³Khwako sibala sibeelela ne boosi bamenyilemo beunamila, nio akhaba chisaang'i che mundaa ne chinyuni che mungaaki akhaba ching'eeni che mu nyanja bilifwa.

⁴Wele Omunyali Owa Bioosi aboola ali, “Omundu yesi yesi alekhe khukhweloocha namwe khubiiya, sikila omusaayi, lilieloocha liase lili khwiwe.

⁵Olietuya kumuusi omung'oosi yesi alietuya ne nawe mu siilo ne ndibunia ekholo eya maao.

⁶Babaandu base babuna sikila se bali ne limanya tawe, sikila ewe waloba limanya, sesi nakhulobile ewe khuba omusaayi wase. Sikila webilila lilaka lia Wele wowo, Ese sesi ndibilila babaana bowo.

⁷“Nga basaayi ne bakucha, nga nilwo batasa khukhola bubwoni, ndikaluukhania efuma yabwe ebe chisoni.

⁸Muindiaala sikila bubwoni bwe babaandu base, khwako mwekoomba batase khukhola bubwoni.

⁹Siiukuumo nisio babaandu babaandi balinyoola mwesi mukhasinyoole khamuukuume enywe mala muruungie kamabi niko mwakhola.

¹⁰Mukhalie chinaikara chenywe, ne se mulikura tawe. Mulisaaya bawele babaandi munyoole babaana ne se mulinyoola tawe, sikila mwanjanjukha mala mwasaaya wele babaandi.”

¹¹Wele Omunyali Owa Bioosi aboola ali, “Endali ekhale ne mbia erusia mu baandu base limanya!

¹²Babaandu base benya khumanya kamakhuwa khu bisosono ne lusaala lubekesia niko benya bamanye, sikila kumwoyo kwe bueeyi kwabatibia nono banjuukhe Wele wabwe khukhola bueeyi.

¹³Baana chimbosio khu bikulu khungaaki, ne khuaana biianwa khu ngulu, mu mukhoonge ne mumurongooro kumuboofu, sikila sisiiniini siakwo silayi. Khwako bakhaana benywe bakhola bueeyi, ne bakhasi be babaana benywe bakhobana.

¹⁴Ne se nja khuukuuma bakhaana benywe, ne bakhola bulaaya tawe. Namwe bakhasi be babaana benywe ne bakhola bueeyi tawe sikila baseecha baloondelela balaaya, ne khuaana chimbosio mu ngila che balaaya babaandu bakhali ne limanya balibuna.

¹⁵Isiraeli enywe ne mukhola bueeyi, Yuda se lulabalikha nga nilwo lukholile tawe. Mukhacha mu Kilikali namwe Betifeni tawe, ne mukhechuba muli ‘Nga Wele Omunyali Owa Bioosi ne amenyile mindali,’ tawe.

¹⁶Nga emasoti eye sileka, Isiraeli ali we sileka, nono Omwami Wele anyala abaliisia, nga limeeme mu mayilwe ku?

¹⁷Lekha babaandu ba Isiraeli basaaya bifwaani babe.

¹⁸Sipupu sie bameesi, babene beaana khu bueeyi, basiima chisoni khukhila lukoosi lwabwe.

¹⁹Bakhasutibwe oli basutwa ne khuungu, mala baliaambwa chisoni khulwe biianwa nibio barusilia ba wele babaandi.”