Read lubukusu Hos. 5 Bible Online

Hos. 5 - lubukusu bible

Hos. 5

¹“Enywe basaayi ulila kano! Rekeeresia enywe be nju eya Isiraeli! Muulile enywe be lisaaye lie bubwami. Mala likhalaka lili khwinywe, sikila mwabele kumureko e Misipa ne lutimba lwabakaalwe khu Tabori.

²Mala bayaba liloo lileeyi e Sitimu ne ese ndaukuuma boosi

³Manyile Isiraeli ne Isiraeli se yanjekisakho tawe Ne luno, Isiraeli yakholile bueeyi Isiraeli yafwolobisiibwe.”

⁴Bikholwa biabwe bibakhiingilila khukobolela Wele wabwe, sikila kumwiima kwe bueeyi kubalimo, khwako se bamanyile Wele Omunyali Owa Bioosi, Wele wabwe tawe.

⁵Ekibonio eya Isiraeli ebonekha ebweeni wayo, Isiraeli elikwa sikila bubwoni bwayo, ne Yuda yosi elikwa ne nabo.

⁶Baliaana bibiaayo biabwe ne chikhaafu khu Wele Omunyali Owa Bioosi, ne kakhali se balimunyoola tawe, sikila aabanjuukhe.

⁷Bafunaka lisuubila khu Wele Omunyali Owa Bioosi, sikila basaala babaana mu bakhasi bakeni. Khwako kumwesi kumuyia kulibabunia alala ne kimikuunda kiabwe.

⁸Khupa ekhoombi mu Kibea, ne lulwiika mu Rama. Khupa lulwang'a e Beteli, yirekekha, ewe Benjamini.

⁹Isiraeli ekhabune mu ndaalo eye siiukuumo, mu kholo cha Isiraeli, ng'ali ndoma ng'ali kaliekholekha.

¹⁰Babemeelesi ba Yuda bali nga abo barusiao chinjakha, ndibachukhakho lirima liase nga kameechi.

¹¹Isiraeli yapisibwe siibi yaminiikhwe mu likhalakwa, sikila yakhayilila khuyiima buyeeti bwa busa.

¹²Khwako ndi nga sipurupuru khu Isiraeli, ne nga sichikhi sibolile khu nju eya Yuda.

¹³Nga Isiraeli yabona bulwaale bwayo ne Yuda likoonjo liayo mala Isiraeli yacha Asiria ne khusaba omwami omukhulu buyeeti, ne kakhali se anyala khukhusilikha namwe khuonia likoonjo tawe.

¹⁴Sikila ese nja khuba nga etalang'i khu Isiraeli, ne nga eng'ana eye etalang'i khu nju eya Yuda. Ese, samwene, ndibatabulaka mala mbalekhe ndibatiila, ne se aliio olibareesia tawe.

¹⁵Ndianjukha babaandu base, khukhwola bapisibwe siibi sisiolaana sikila bubwoni bwabwe mala bambeenje. Wakana mu butinyu bwabwe buno balikhaka khu khumbeenja.