Read lubukusu Hos. 7 Bible Online

Hos. 7 - lubukusu bible

Hos. 7

¹Nga ne ndionia Isiraeli, kamamayaanu ka Isiraeli kalimanyikha, akhaba bikholwa bimayaanu bia Samaria, sikila babeana. Omwifwi afunaka chinju khukhwiba, banuuli banuula babaandu khu ngila.

²Ne kakhali se bebaasiakho bali, ese khebulila bikholwa biabwe bimayaanu tawe. Nono bikholwa biabwe biabakarire, mala nabimanyile.

³Basangaasia omwami ne kamamayaanu kabwe, basangaasia babemeelesi ne bubacha bwabwe.

⁴Boosi bali baeeyi bali nga kumulilo mu sibero nikwo oupa kimikaati alekha khukhwikelesiamo khukhwamila khukaanda sifu khukhwola nga ne siya.

⁵Endaalo eye khukhwekhoya khwo mwami, bameesia omwami ne babemeelesi bewe, ne khubasilwasia ne ndali.

⁶Ne nga bunoro, kimiooyo kiabwe kiya busa ne liliekoomba libi, lirima liabwe lising'eng'a siilo siosi, ne kumutikhinyi lierika nga kumulilo kuburukha.

⁷Boosi babila oli bunoro e sibero, mala beera baruki babwe. Babaami babwe boosi bakwiile, ne se aliio owasaba ese buyeeti tawe.

⁸Wele Omunyali Owa Bioosi aloma ali, “Isiraeli atubaanile ne chikholo chichiindi, Isiraeli eli nga kumukaati kukwafuba, Beyikina chikholo chichiindi.

⁹Ne se bamanya bali, lilieyikina liabwe lino liabamalile kamaani tawe, Chindaalo chabwe chilikho chiwa ne se bamanyile tawe.

¹⁰Ekibonio eya Isiraeli ebabuula babeene, ne se bakobolela Wele Omunyali Owa Bioosi, Wele wabwe tawe, namwe bamuyiime mu kano koosi tawe.

¹¹Isiraeli bali nga liuusi lisilu likhali ne limanya tawe, balaanga Misiri, ne khukhwilukhila Asiria.

¹²Ne nga bacha, nja khubafumakho lutimba lwase, nja khubakwisia asi nga chinyuni che mu ngaaki, nja khubaukuuma khulwe bikholwa biabwe bimayaanu.

¹³“Bali ne silaamo, sikila banjilukha, babunile, sikila bandekelesie, nakhabaonisie, ne kakhali baloma bubeeyi khwise.

¹⁴Se baasaba khukhwama mu miooyo kiabwe tawe, ne kakhali bakukuulila khu bitaanda biabwe bekhalakaka babeene khulwe siakhulia ne ndali, ne khukhundekelesia.

¹⁵Akhaba ne nabekesia ne khura kamaani mu makhono kabwe, bangwangwanila.

¹⁶Basaaya Baali bali nga buyiingo nibwo okheyikina tawe, babemeelesi babwe balifwila mwiie, sikila ekibonio yabwe eye sileka kano kaliba enjekho khu nibo mu sibala sia Misiri.”