Read lubukusu Hos. 9 Bible Online

Hos. 9 - lubukusu bible

Hos. 9

¹Baisiraeli mukhasangaala tawe, mukhasachaala nga chikholo chichiindi tawe, sikila mwakhola bueeyi ne khulekha Wele wenywe. Enywe mwasiima kumuruungo kwo mueeyi, khu luya lwe khukhwanikhilakho biakhulia.

²Mu siise sitiiti siri, se mulaba ne siakhulia ne kamafura kakoola tawe, ne endali se elibao tawe.

³Babaandu ba Isiraeli se balimenya mu sibala sia Wele Omunyali Owa Bioosi tawe, ne kakhali balikobola e Misiri, balilia biakhulia bibiakaanisibwa ne bali mu Asiria.

⁴Se balichukhila biianwa bie endali Wele Omunyali Owa Bioosi tawe, ne se balimusiimisia ne chimbosio chabwe tawe. Siakhulia siabwe siliba nga sie mu masika, buli osiliakho alibalikha khuba omunyaalu, sikila siakhulia esio siliba sie mu njala, se silichakho munju eya Wele Omunyali Owa Bioosi tawe.

⁵Mulikhola siina khu ndaalo yabisibwa eye kumulukha[3], ne khu ndaalo eya naikara eya Wele Omunyali Owa Bioosi!

⁶Lola, balikho bacha Asiria[4], Misiri elibabuusia, Memufisi elibasiikha, enyoonyi elimela khu biindu biabwe bie lukoosi bie efwesa, ne kamawa kalimela mu maeema kabwe.

⁷ Chindaalo che siiukuumo cholile, chindaalo che kumuruuru cholile, Isiraeli khukhwola bamanye chindaalo echo Omung'oosi abeele omusilu, omundu owa roho alaluukhe, sikila bumayaanu bwenywe ne sikhoonde sienywe sikali.

⁸Omung'oosi ali omuliindi owa Efuraimu, babaandu ba Wele wase, ne buboche bwe enyuni buli khu ngila chewe choosi, ne aambilwe sikhoonde munju eya Wele wewe.

⁹ Beyonaka babeene lukali, nga mu ndaalo cha Kibea, Wele alikhebulila bumayaanu bwabwe, akhabaukuume sikila bubwoni bwabwe.

¹⁰ Ese nanyoola Isiraeli, nga kimisabibu mu sichiimi, nga enduli eenyoa khu mutuli, mu sise sie siimiyu. Ese nabona bakuuka benywe ne becha e Baali-peori, mala beaana babeene khu Baali, ne khuba babi nga bawele nibo basiima.

¹¹Lukoosi lwa Efuraimu lulipurukha nga enyuni, babaana se bakhasaalwe tawe, bakhasi se bakhaesie tawe, khutasa lisaaye mbao.

¹²Akhaba ne basaala babaana, ndibeera boosi se ndilekhakho akhaba mulala tawe, baliba ne silaamo, siise nisio ndiba aleeyi nabo.

¹³Naboone babaana ba Efuraimu balakiilwe lifwa, Efuraimu khukhwola ayile babaana bewe khukhwirwa.

¹⁴Wele Omunyali Owa Bioosi, siina nisio okhakholele babaandu? Khola bakhasi babwe babe bakuumba, bakhanuniakho tawe.

¹⁵Wele Omunyali Owa Bioosi aboola ali, “Bubwoni bwabwe bwoosi bwarakikhira e Kilikali ebweeneyo niyo narakikhira khubabiila. Ndabarusia mu sibala siase sikila bubwoni nibwo bakhola, se khabasiime lundi tawe, babemeelesi babwe boosi bakholele sileka.

¹⁶Isiraeli sili nga kumurongooro nikwo kimili kiomile, kukhanyala kwaana kamatuunda tawe, se balaba ne babaana tawe. Ne akhaba baliba nabo ndiira babaana babwe basiime.”

¹⁷Wele wase niye esaayanga alibekaana, sikila baloba khumurekeeresia, baliba bakeendaani mu kholo choosi.