Read lubukusu Yoe. 1 Bible Online

Yoe. 1 - lubukusu bible

Yoe. 1

¹Buno nibwo burume bwa Wele Omunyali Owa Bioosi khu Yoeli okhwa Petueli.

²Rekeeresia, enywe bakhulu, buli sia mulala mu Yuda, ulila. Siindu nga sino siri siekholekhakho mu biise bienywe, namwe mu biise bie bakuukawenywe ku?

³Boolela kano babaana benywe, ne lekha babaana benywe baboolele babaana babwe ne babaana babwe baboolele eselukho eloondakho.

⁴Nibio chisike chiliile chalekha, chisike chingali chilalia. Nibio chisike chingali chilekhile, kamatete kalalia, ne nibio kamateete kalekhile chisike chichonakaka chilamaliilisia.

⁵Enywe bameesi, sisimukha mala mulile, yisasaara enywe banywi be ndali mweesi, sikila bamwimane endali enulu.

⁶ Sikila ekholo yebwaakale sibala siase, eli ne bunyali lundi se balikha tawe, kameeno kayo kali nga ke etalang'i eli ne kangekwe oli ke etalang'i ekhasi.

⁷Ekholo yonakake kimisabibu kiase, ne yasakakiilemo kimituli kiase, Yakhoboolile kamoola ne khukamwaata asi, chisakia chayo chawangiie.

⁸Sooma nga omukhaana owe yabwana owiboyile kamakunia nasooma omusoleeli wewe owe siselelo.

⁹Mbao biianwa bie biakhulia namwe endali nibio khuaana mu Lukaangu tawe, basaayi balila sikila se bali ne siianwa sia Wele Omunyali Owa Bioosi tawe.

¹⁰Kimikuunda kili busa, sibala silila, sikila biakhulia bionakakwe, endali se eliio tawe, akhaba kamafura mbao.

¹¹Enywe balimi yeunamila, lila, enywe muliinda kimisabibu, sikila engaanu, ne e shayiri, Ee biakhulia bioosi bionakwe.

¹²Kimisabibu kianialile, kimituli kioosi kianialile ne khukhwooma, kimikomanga, kimikhendu ne kimipopayi, kimirongooro kioosi mu mikuunda kiomile ng'ali ekhoyo mu baandu yosi mbao.

¹³Yifwara kamakunia mala mulile, enywe basaayi mukhola khu alutare! Yingila mu Lukaangu mala mulile siilo sioosi! Siakhulia namwe endali mbao khuaana khu Wele wowo.

¹⁴Rusia kamalaka ke khukhweyimana, laanga libuusiana! Buusia babemeelesi ne babaandu boosi ba Yuda beche mu munju eya Wele Omunyali Owa Bioosi, Wele wowo, mala mulilile Wele Omunyali Owa Bioosi.

¹⁵ Ee endaalo eya Wele Omunyali Owa Bioosi eli siimbi, Endaalo niio Omunyali Owa Bioosi areera libuna. Liriisia siina nilio endaalo eyo elireera!

¹⁶Biakhulia biefwe biarusiibweo ebweeni wefwe, ekhoyo ne busangaafu khukhwama munju eya Wele wefwe luno mbao.

¹⁷Bumiicho bwomeele mumba, mu birara siindu mbamo, birara bionakakwe, sikila biakhulia mbao.

¹⁸Chikhaafu chimoloola mu butinyu sikila kamayilwe mbao tawe, akhaba kiminyele kie kamakheese kipwa sibi.

¹⁹Ee Wele Omunyali Owa Bioosi, ese khulilila ewe sikila kumulilo kwosiisie kamayilwe ne sichiimi, mala kwosiisie kimirongooro kioosi kie mundaa.

²⁰Akhaba chisolo chikhulilila ewe sikila chinjichi chateenyile ne kumuumu kumurafu kwosiisie kamayilwe ke mu sichiimi.