Read lubukusu Yoe. 2 Bible Online

Yoe. 2 - lubukusu bible

Yoe. 2

¹Khupa ekhoombi mu Sayuni, khupa ekengele khu sikulu siase sitakatifu lekha bamenywa be mu sibala boosi batereme, sikila endaalo eya Wele Omunyali Owa Bioosi elikho yiicha, eli siimbi,

²endaalo eye sisiilima ne bubeeleli, endaalo eye kamafuumbi ne sisiilima sikali! Nga bumali ne bumalatana khu bikulu, babaandu be bunyali ne kamaani bakhabakhoo khukhwama khale tawe, namwe se bakhabeo lundi bario enyuma wabwe tawe, mu selukho busa choosi.

³Chilia bibiaalwa nga kumulilo, ebweeni wacho sibala sili ne bibiaamo nga kumukuunda kwa Edeni, Enyuma wacho eli nga sichiimi mbakhoo silichefubarura tawe.

⁴ Chifwaana nga chifarasi, ne chitima nga chifarasi che liie.

⁵Nga chisuna khu ngaaki khwe chingulu, chisakaya oli kamakaari ke liie, chirundukha nga kumulilo mu bunyaasi bubwomu. Chili khu lunyilili nga banamae be kamaani baberekekheere liie.

⁶Nga ne chiicha buli mundu eendekhelele, buli mundu anyisiisie.

⁷Chibwaakala nga banamae, chiniina kamasiisi nga banamae, choosi chichiila alala ne se chaukhakho tawe.

⁸Ekiindi se khalisia ebweeni we yasie tawe, chibira mu mako ne se siliio sichikhiingilila tawe.

⁹Chisuna khu lukoba chitima khu masiisi, chiniina khu chinju ne mala chingilila mu numa nga babefwi.

¹⁰ Sibala siesisiikha nga ne chiicha, likulu literema. Enyanga ne kumwesi bimaliia, ne ching'enieesi se chikhosia lundi tawe.

¹¹ Wele Omunyali Owa Bioosi arafwira banamae bewe. Bipupu bie banamae bimuria bili bikali lundi bie kamaani. Eliba eriisia eriena endaalo eya Wele Omunyali Owa Bioosi! Naanu olikibacha?

¹²Wele Omunyali Owa Bioosi aloma ali, “Akhaba luno, yekanila mu bung'ali mala mungobolele mu khweyimana khulia, khulila ne khweunamila.

¹³Lekha kimiooyo kienywe kie bubeeleli kiekesie engunyi, khutabula chingubo chenywe khwong'ene se khwolaana tawe.” Kobolela Wele Omunyali Owa Bioosi, Wele wenywe ali omulayi lundi ali ne siisa sikali, ekhaliilikha lundi akhola nilio asuubisie, buli lwoosi ali ne silekhelo ne se ali khangu khuukuuma tawe.

¹⁴Naanu omanya nanyala akaluukhana mala amukholela siisa alekha chikhabi enyuma, mala mvane siianwa sie biakhulia nende sie khunywa Khulwa Wele Omunyali Owa Bioosi, Wele wenywe.

¹⁵Khupila ekhoombi khu Sikulu sia Sayuni, rusia kamalaka ke khukhweyimana khulia ne khulaanga libuusiana!

¹⁶Buusia babaandu alala, barekekhe khulwe libuusiana litakatifu buusia bakofu, buusia babaana, ne batoro boosi. Akhaba babeea khukhwola barure munju chabwe beche.

¹⁷Basaayi bakholela Wele Omunyali Owa Bioosi akari wa alutare ne silibwa sie Lukaangu, khukhwola balile ne khusaba bali, “Wele Omunyali Owa Bioosi ba ne siisa khu baandu bowo. Okhalekha chikholo chichiindi chakhulekelesia ne khukhuchekheelela ne chireeba chili, ‘Wele wenywe ali waena?’ Tawe.”

¹⁸Nio Wele Omunyali Owa Bioosi ekesia lilienaana khulwe sibala siewe, mala aaba ne siisa khu baandu bewe.

¹⁹Wele Omunyali Owa Bioosi akobosia babaandu bewe ali, “Luno ndikho muelesia biakhulia ne ndali ne kamafura ke kimiseituni, ne mulanyalikha. Chikholo chichiindi se chilamulekelesia tawe.

²⁰Ndarusiao sipupu sie chisike chichecha khukhwama ebunaswa, ne ndachisindikha mu siangalaamwe sitambamo siindu, che ebweeni ndachisindikha ebukwe mu nyanja eye kumuunyu ne che nyuma sia nyanja eya Mediterenia kimibili kiacho kilaunya ndachira sikila koosi niko chabakholela.

²¹“Okharia tawe, ee liloba, ne kakhali sangaala mala wikhoye, sikila Wele Omunyali Owa Bioosi akholile ke liukia.

²²Mukharia tawe enywe chisaang'i che mundaa, sikila kamayilwe kali mu sichiimi kali kamalayi, kumurongooro kwaama kamatuunda kakwo, ne kumutuli ne kumuseituni kiamile kamatuunda.

²³“Sangaala, baandu ba Sayuni, Yikhoyela niko Wele Omunyali Owa Bioosi, Wele wenywe abakholela. Amuelesie efula endayi eye siruumbi, amuelesie efula eye kumunaane ne efula eye khurakikha nga khale.

²⁴Biuulilo bikhechule biakhulia, kamaloo ke khusuura kalechula endali ne kamafura ke kimiseituni.

²⁵Ndamukoboselia nibio mwatibia mu miiko nikio bipupu bie chisike bionakilamo biakhulia bienywe. Naba ese owaruma banamae khwinywe.

²⁶Luno mulalia bikali mala mwikure. Mulifumia Wele Omunyali Owa Bioosi, Wele wenywe, owamukholeele bibiindu bie liukia. Babaandu base se balaambwa chisoni lundi tawe.

²⁷Nio, Baisiraeli mulamanya muli ese ndi akari wenywe lundi muli ese Wele Omunyali Owa Bioosi, ndi Wele wenywe ne se aliio okundi tawe Babaandu base se baliambwa chisoni lundi tawe.

²⁸ “Mu ndaalo chichiicha ndichukha Roho wase khu buli mundu, babaana benywe basoleeli ne bakhaana baling'oola, basaakhulu baliroora kamarooro ne baele benywe baliba ne kamalola.

²⁹Mu siise esio ndichukha Roho wase akhaba khu bakholi be siseecha nende be.

³⁰“Ne khaane bimanyisio mwikulu ne khu sibala kamafuki, kumulilo ne liliisi.

³¹ Enyanga elimaliia, ne kumwesi kulibesema nga kamafuki, ebweeni we ndaalo emboofu eya Wele Omunyali Owa Bioosi eye khuriisia ne ekhoola tawe.

³² Lilicha liekholekhe mbo buli yesi yesi osaba Wele Omunyali Owa Bioosi akhaonisibwe. Sikila khu sikulu sia Sayuni ne mu Yerusalemu bakhabemo babebacha nga Wele Omunyali Owa Bioosi naboolile, ne mwabo babaona balibamo nibo Wele Omunyali Owa Bioosi alaanga.”