Read lubukusu Yoe. 3 Bible Online

Yoe. 3 - lubukusu bible

Yoe. 3

¹“Lola, mu ndaalo echo ne mu siise esio nga ndikobosia kimiaandu kia Yuda ne Yerusalemu,

²Ndibuusia chikholo choosi ne khuchireera mu Litooma lie bukhalaki lia Yehoshafati. Ne ndichikhalakila ebweeneyo khulwe babaandu base ne kumukabwa kwase Isiraeli, sikila babasalanisia mu bibala bikeni ne khukabaniamo sibala siabwe.

³Lundi bapile chikura khulwe babaandu base mala baanile omwana omusoleeli khulwe khuruunga bueeyi, ne khuaana omwana omukhaana khulwe khuruunga ndali, mala bakinywele.”

⁴ Wele Omunyali Owa Bioosi areeba ali, “Ee Tiro ne Sidoni ne bibala bioosi bia Filisiti enywe muli siina khwise? Enywe mulikho munduunga khulwa siindu siina? Mwaba ne mulikho munduunga, ndamwiyacha khulwe bikholwa bienywe khangu.

⁵Sikila mwabukuule efwesa yase ne esahabu ne khusuta kamabiikhilo kase ke buiinda ne khuyila mu ngaangu chenywe.

⁶Mwakusiisie babaandu base ba Yuda nende be mu lukoba lwa Yerusalemu khu baandu ba Kiriki. Ne khubayila aleeyi khukhwama mu sibala siabwe.

⁷Ne kakhali luno ndabaachilisia khukhwama niio mwabakusia, mala kheache khwinywe khu niko mwabakholela.

⁸Ndakusia babaana benywe basoleeli ne bakhaana khu baandu ba Yuda mala babaandu ba Yuda balabakusia khu baandu ba Sabea, babaandu be aleeyi.”

⁹“Langilila kano mu chikholo, yerekekhera liie laanga banamae benywe, busia banamae benywe mala muche!

¹⁰ Basa chimbako chenywe chibe chimbalu, ne chingeso chenywe chibe kamafumo akhaba batekhele khukhwola bache mwiie.

¹¹Yiicha khangu, enywe mweesi chikholo chiili siimbi, mwebuusie mwitooma.” Ee Wele Omunyali Owa Bioosi, ruma banamae bowo babebwaakale.

¹²“Lekha Be Chikholo berekekhe mala bache mwitooma lia Yehoshafati, sikila ebweeneyo ndakhalakilayo chikholo choosi chili siimbi.

¹³ Kesa, sikila likesa liolile. Yingilamo mu chisuure, sikila enjikha yechuule ne chindemo chechuule chiicha asi, sikila bumayaanu bwabwe buli bukali.”

¹⁴Bipupu, bipupu, mwitooma lie likhalaka! Sikila endaalo eya Wele Omunyali Owa Bioosi eli siimbi mwitooma lie likhalaka.

¹⁵Enyanga ne kumwesi biamaliie, ne ching'enieesi se chikhosia tawe.

¹⁶ Wele Omunyali Owa Bioosi aulukhuma khu sikulu sia Sayuni, kumumilo kwewe kuuliilikhanila mu Yerusalemu ne likulu ne liloba biterema Ne kakhali Wele Omunyali Owa Bioosi ali bubwilukhilo bwe babaandu base lukoba khu baandu ba Isiraeli.

¹⁷Nio, Baisiraeli, mulimanya muli ese ndi Wele Omunyali Owa Bioosi, Wele wenywe, menyile khu Sayuni, sikulu siase sitakatifu. Yerusalemu lulaba lukoba lutakatifu, banamae baakwa se balilutiilakho lundi tawe.

¹⁸“Mu ndaalo eyo bikulu biliroonya endali enulu, ne chingulu chilikha kamabeele, ne binoko bioosi bia Yuda bilibisia kameechi. Ne esebele eliakukha khukhwama munju mwa Wele Omunyali Owa Bioosi, ne khuchukha mwitooma lia Sitimu.

¹⁹“Misiri siliba sisiangalaamwe, ne Edomu sichiimi sisianjukhwa, sikila sisiayuumba sisiakholekha khu baandu ba Yuda sikila bachukhile sifuki sia busa mu sibala siabwe.

²⁰Ne kakhali sibala sia Yuda silimenywamo khulwa mindali, ne Yerusalemu luliba lwe chiselukho choosi.

²¹Ndiyacha sifuki siabwe, ne se khabeele baberi tawe, sikila Wele Omunyali Owa Bioosi amenyile mu Sayuni.”