Read lubukusu Amo. 1 Bible Online

Amo. 1 - lubukusu bible

Amo. 1

¹ Yino niyo elomo eya Amosi, owaba omwaayi khukhwama mu lukoba lwa Tekoa. Wele ekesia Amosi bibiindu bioosi biliekholekha khu Isiraeli, kimiiko kibili sibala ne sikhesisiikha tawe. Mu ndaalo echo Usia aba omwami owa Yuda ne Yeroboamu okhwa Yehoasi aba omwami owa Isiraeli.

² Amosi aloma ali, “Wele Omunyali Owa Bioosi aulukhumila khu Sikulu sia Sayuni, akhokha khukhwama Yerusalemu. Khwako kamaayilwe khu sikulu sia Karimeli koomile ne bunyaasi bwaniaalile.”

³ Wele Omunyali Owa Bioosi aloma ali, “Babaandu ba Damasika babeelelela khukhola bubwoni, ne sikila kano ng'ali ndabaukuuma. Bakuluumia babaandu be mu Kileati ne burafu bukali.

⁴Khwako ndaruma kumulilo khu lichipi liliombakhwa no mwami Hasaeli, ne ndoosia kamasiisi ke chingoba cho mwami Benatati.

⁵Ndatechula bilibwa bie lukoba lwa Damasika ne khurusiamo bamenywa be litooma lia Afeni no muruki owa Beseteni. Babaandu ba Siria balabukulwa nga baboe khuyilwa mu sibala sia Kiri.”

⁶ Wele Omunyali Owa Bioosi aloma ali, “Babaandu ba Kasa babeleleele khukhola bubwoni, sikila kano ndabaukuuma. Baayila ekholo yase yoosi khukikusia khu baandu ba Edomu nga nasioobi.

⁷Nio ndoosia lukoba lwa Kasa ne kamasiisi kalwo.

⁸Ndarusiao baruki be chingoba cha Ashitoti ne Ashikeloni. Ndaukuuma lukoba lwa Ekironi, ne Bafilisiti babarama boosi balafwa.”

⁹ Wele Omunyali Owa Bioosi aloma ali, “Babaandu ba Tiro babelelela khukhola bubwoni, sikila kano ng'ali ndabaukuuma. Baayila ekholo yase yoosi mu mbaambe mu sibala sia Edomu, ne se baloonda endakaano eye busaale niyo bakhola tawe.

¹⁰Khwako ndoosia lukoba lwa Tiro ne kamasiisi kalwo.”

¹¹ Wele Omunyali Owa Bioosi aloma ali, “Babaandu ba Edomu babelelela khukhola bubwoni, sikila kano ng'ali ndabaukuuma. Bayimanga balebe babwe ba Isiraeli ne mbalu, ne se babakholelakho siisa tawe. Lirima liabwe se liaba ne sisiakamo tawe, liabao buli lwoosi.

¹²Khwako ndoosia lukoba lwa Temani ne kamasiisi ka Bosira.”

¹³ Wele Omunyali Owa Bioosi aloma ali, “Babaandu ba Amoni babelelela khukhola bubwoni, sikila kano ng'ali ndabaukuuma. Ne bali mwiie mu Kileati mu khwenya khukaliyia sibala, batienulangamo bakhasi be bisombo.

¹⁴Khwako ndoosia kamasiisi ke lukoba lwa Raba ne kamasiisi kalwo. Lukukuulo lulabao endaalo eye liie, ne khu khuupana khulifundeela nga embembeesi.

¹⁵Ne omwami ne baamuloondela balicha mu mbaambe.”