Read lubukusu Amo. 2 Bible Online

Amo. 2 - lubukusu bible

Amo. 2

¹ Wele Omunyali Owa Bioosi aloma ali, “Babaandu ba Moabu babelelela khukhola bubwoni, sikila kano ng'ali ndabaukuuma. Se baaria bikuumba bio mwami owa Edomu tawe, ne sikila babiosia biakwa likokhe.

²Ndoosia sibala sia Moabu ne kamasiisi ka Kerioti. Babaandu ba Moabu balafwila mu luyoka lwe liie nga banamae ne bakukuula ne khu khuupa chikhoombi.

³Ndeera omuruki owa Moabu ne babemeelesi be sibala boosi.”

⁴Wele Omunyali Owa Bioosi aloma ali, “Babaandu ba Yuda babelelela khukhola bubwoni, sikila kano ng'ali ndabaukuuma. Balekelesia liliekesia liase lundi se baliinda kamalaka kase tawe. Batiimisibwa ne bawele babeeyi chana abo nibo bakuuka babwe baasayaanga.

⁵Khwako ndoosia Yuda ne kamasiisi ka Yerusalemu.”

⁶Wele Omunyali Owa Bioosi aloma ali, “Babaandu ba Isiraeli babeelelela khukhola bubwoni, sikila kano ng'ali ndabaukuuma. Bakusia baluungi mu mbaambe bakhanyala khuruunga kamakobi kabwe tawe, babanani bakhanyala khukula biraaro tawe.

⁷Baapia siibi[1] batekhele nende bakhenyala tawe, ne khura bataambi mu butinyu. Omwana ne raraawe boombi bakhola sifwaabi no mukhasi nasioobi, khwako banyaalutia lisina liase litakatifu.

⁸Buli abuundu we khusaba, babaandu bakona khu ngubo nicho banuula bataambi nga buambilisi. Mu Lukaangu lwa Wele wabwe, banywa endali niyo banuula abo baali ne kamakobi kabwe ke chirupia.

⁹ “Ne baandu base, enywe mumwakila nio nabunisila elala Bamoriti, babaandu ba baaba baleeyi nga kimitarakwa lundi be kamaani nga kimikhoonge.

¹⁰Namurusia enywe mu Misiri, namubisilia mu sichiimi khulwe kimiiko kamakhumi kane, mala namuelesia sibala sie Bamoriti khuba sisienywe.

¹¹ Ese Wele Omunyali Owa Bioosi ndoma ndi, ‘Narobora balala khu basoleeli benywe khuba bang'oosi, ne babaandi khuba banadhiri bo Mwami. Baisiraeli kano se kali kang'ali tawe ku?’

¹²Ne mwanywesia baberusia khu mwami endali, ne khuyingilila bang'oosi balekhe khuboola burume bwase.

¹³Ne luno ndamuswalakilila asi, ne mulalenya nga ekorokocho eyichuule biakhulia.

¹⁴Akhaba babaalaba chimbilo se baleonia tawe, nende be kamaani se balaba nako tawe, ne banamae se balanyala khukhweonia tawe.

¹⁵Babaandu be buyiingo se baleema khu khupana tawe, babaalaba se balanyala khukhwilukha tawe, nende be khu farasi boosi se balaona tawe.

¹⁶Khu ndaalo ng'ene eyo akhaba banamae banyindaafu lukali, balalekhuula bibioki biabwe mala belukhe.” Wele Omunyali Owa Bioosi alomile.