Read lubukusu Amo. 3 Bible Online

Amo. 3 - lubukusu bible

Amo. 3

¹Baandu ba Isiraeli, rekeeresia burume buno nibwo Wele Omunyali Owa Bioosi alomile khwinywe, ekholo yoosi niyo aarusia e Misiri.

²“Khu kholo choosi che khu sibala, enywe mweng'ene nibo namanya ne khuliinda. Sikila limanyikha ne buliindi buno bubwoni bwenywe bubalikha khuba bukali, niko kakila khukhwola muukuume enywe.”

³Babaandu babili banyala bakeendela alala ne bakhafukiilisiane tawe ku?

⁴Etalang'i eulukhumila mu musiru ne khanyoolile nisio elia ku? Etalang'i endoro enyala yekhuruura mwibina liayo ne khaambile siindu tawe ku?

⁵Enyuni enyala yaambwa nokhareere khu lukili nisio yenya khulia tawe ku? Kumureko kunyala kwatekukha sisiindu ne sikhetililekho ku?

⁶Ekhoombi eye liie enyala yapa mu lukoba mala babaandu baloba khwesiindukha ku? Butinyu bunyala bwakwa mu lukoba Wele Omunyali Owa Bioosi nakhabumanyile tawe ku?

⁷Omwami WELE se akholanga sisiindu siosi siosi nakhabuuliile lirekekha liewe khu bakholi ne bang'oosi bewe tawe.

⁸Etalang'i ne ulukhuma, naanu okhareenga tawe? Omwami WELE ne alomaloma, naanu onyala alekha khuboola burume bwewe?

⁹Boolela boosi bamenyile mu machipi ka Misiri ne Ashitoti oli, “Yebuusia alala mu ngulu chichabotookhelela Samaria, mubone likoyaana likali, ne kamabi kakekholekhamo.”

¹⁰Wele Omunyali Owa Bioosi aloma ali, “Babaandu bano bechusia chinju chabwe bibiindu bibianuulwa ne kamaani mu siayuumba. Ne se bali babeyikinwa tawe.

¹¹Khwako Omwami WELE aloma ali, omusiku alabotookhelela sibala siabwe, onake buliindi bwabwe ne khutechula chinju chabwe.”

¹²Wele Omunyali Owa Bioosi aloma ali, “Nga omwaayi ne areesia bileenge bibili biong'ene namwe liiru lie likheese nilio etalang'i eliile, kaliba kario khu bakhaone mu Samaria baliba batiiti ne luno balikho bauluukhila khu bitaanda bilayi.

¹³Omwami WELE, Wele we banamae aloma ali, ‘Luno rekeeresia, lundi kaambila be lisaaye lia Yakobo,

¹⁴ endaalo niyo khaukuumile babaandu ba Isiraeli khulwe bubwoni bwabwe, ndonaka alutare eya Beteli. Chinjika cha buli alutare chilatechulwa.

¹⁵Ndonaka chinju che siise sie kumunaane ne chinju che siise sie siimiyu. Chinju nicho bombakhila kimisaanga chilonakwa, buli enju emboofu elonakwa.’ ”