Read lubukusu Amo. 4 Bible Online

Amo. 4 - lubukusu bible

Amo. 4

¹Rekeeresia kano, enywe bakhasi Basamaria, muunera nga chikhaafu cha Basiani chiliisibwa bulayi, musukiasukia bataambi, mupia siibi babanani, ne khuyingilila baseecha benywe bamuelesie kamalwa!

²Nga Omwami WELE ne ali Omutakatifu, asuubisia ali, “Chindaalo chilicha nicho balimukhururira asi ne kimilobo, buli mulala khwinywe aliba nga eng'eeni khu mulobo,

³balimukhuruura bamuyile a lisiisi lilikho sibaanga mala bamumwaate enje.”

⁴Cha Beteli mukhole bubwoni; “Khemuche Kilikali mutase bubwoni bwenywe lukali! Reera chimbosio chenywe buli kumutikhinyi, lundi buli enyuma we chindaalo chitaru[2], reera sitonyi sienywe silala khwikhumi.

⁵Chililiila khuaana siakhulia sienywe khulwe khu khupila Wele orio, mala mwifumie nga mureera chi saka chengelu! Kano niko mwasiima khukhola.

⁶“Naba ese owareera enjala mungoba chenywe choosi, ne se mwangobolela tawe.

⁷Nabisia efula siise nisio biakhulia bienywe biakienyela lukali. Nareera efula khu lukoba lulala ne khu lundi tawe. Efula yakwa mu mukuunda mulala ne kukuundi kwoma.

⁸Babaandu khukhwama mungoba chingali, baulila bulesia lundi baba batekhele, benya kameechi ne se bakanyoola tawe, matiiti niko banyoola se kaboola tawe. Ne kakhaba kario se mwangobolela tawe.

⁹“Nareera siimiyu khulasia biakhulia bienywe. Chisike chalia bimelwa mu mikuunda kienywe kioosi, kimisabibu, kimituli, ne kimiseituni. Ne Kakhaba kario se mwangobolela tawe.

¹⁰“Nareera bulwaale khwinywe nga bubwaba khu Bamisiri. Neerera basoleeli benywe mwiie ne khu bukula chifarasi chenywe. Nechusia bubolo bwe bafu bukali mu chikambi chenywe. Ne kakhaba kario se mwangobolela tawe.”

¹¹ Wele Omunyali Owa Bioosi aloma ali, “Nabunia balala mwinywe nga Sodomu ne Komora. Babaona mwinywe baba nga lukhu lurusibwa mu mulilo ne lukhaamba tawe. Ne kakhaba kario se mwangobolela tawe,

¹²nio kario baandu ba Isiraeli, ndabaukuuma enywe. Sikila nja khukhola kano, yirekekhera likhalaka liase!”

¹³Wele niye owabaang'ana bikulu ne khuungu. Akholanga lilienya liewe limanyikhana khu baandu, akaluukhasia kumuusi kwekhola siilo. Akeendelanga angaaki we sibala. Lino nilio lisina liewe: Wele Omunyali Owa Bioosi, Wele Omunyali Owa Bioosi!