Read lubukusu Amo. 5 Bible Online

Amo. 5 - lubukusu bible

Amo. 5

¹Baandu ba Isiraeli, rekeeresia kumwenya kwe kamasika nikwo nja khu mwimbila kuno:

²Isiraeli nga omukhaana owe yabwana, afwiile, salamukha lundi tawe. Bamwanjuukhe asi, ne se aliio omwinyosia tawe.

³Omwami WELE aloma ali, “Banamae eelefu barumwa enje ne lukoba luuli mu Isiraeli, ne bakobola emia bong'ene, luluundi luruma emia, ne bakobola likhumi bong'ene.”

⁴Wele Omunyali Owa Bioosi aboolela babaandu ba Isiraeli ali, “Yiicha niio ndi, mala mumenye.

⁵Mukhacha Beerisheba khusaaya tawe. Mukhakhaka khu khumbiima e Beteli tawe, Beteli lulabuna. Mukhacha e Kilikali tawe, Babaandu balwo bacha khuyilwa mu mbaambe.”

⁶Kobolela Wele Omunyali Owa Bioosi mala mumenye. Nga tawe, alioosia babaandu be nju eya Isiraeli, kumulilo kulioosia babaandu ba Beteli, ne sakhabeo onyala akusimia tawe.

⁷Enywe mwabunile, mukaluukhasia bung'ali bwe babaandu, ne khulekha khubakholela bung'ali!

⁸ Wele Omunyali Owa Bioosi abuumba sulwe ne ching'enieesi chichiindi, Akaluukhasia sisiilima siba buwaanga, ne kumuusi kuba siilo. Alanga kameechi ke nyanja, mala akachukha khu sibala. Lisina liewe bali Wele Omunyali Owa Bioosi.

⁹Areranga libuna khu be kamaani, ne khu ngoba chabwe.

¹⁰Enywe mwabiila yesi yesi oloma bung'ali, ne khu khwikiicha bukhali bung'ali tawe,

¹¹Khwako sikila mupia bataambi siibi, ne khubanuula biakhulia biabwe. Nono, se mulamenya mu chinju chindayi che kamabaale nicho mwombakha tawe, ne se mulanywa endali khukhwama khu miseituni kimilayi nikio mubiaala tawe.

¹²Sikila manyile bumayaanu ne bubwoni bwenywe bukali, mupia baluungi siibi ne khulia asoya, lundi mukhiingilila bataambi khunyoola bung'ali mu koti.

¹³Khwako omundu omukesi alasila siise sie bubwoni esio, khubela sili siise sibi.

¹⁴Yiima kamalayi, ne mukhayiima kamabi tawe, nio mumenye bulayi. Nio Omwami Owe Banamae alaba nanywe, nga mwabene mulomile.

¹⁵Biila kamabi mala musiime kamalayi, mala mubone muli bung'ali bwekholekha mu koti. Wele Omunyali Owa Bioosi, Wele we bunyali aaba ne siisa khu baandu be lisaaye lia Yosefu basiili balamu.

¹⁶Lundi nono Wele Omunyali Owa Bioosi aloma ali, “Khukhwisasaara ne khusooma khulwe bubeeleli khulaba khu ngila che lukoba. Akhaba baalimi balecha kamasika ke bafu alala ne naabo babamanya khusooma.

¹⁷Lundi khukhwisasaara khulaba mu mikuunda kie kimisabibu kioosi. Lino liosi lilakholekha sikila ndabaukuuma enywe.” Wele Omunyali Owa Bioosi alomile.

¹⁸Muli bubi enywe mu mwekoomba endaalo eya Wele Omunyali Owa Bioosi, Siina sikila mwenye endaalo eya Wele Omunyali Owa Bioosi? Khwinywe elaba endaalo eye sisiilima ekhali ne buwaanga tawe.

¹⁹Eliba nga omundu owilukha etalang'i, mala akaanana linani, namwe nga omundu oli munju mala atiila khwisiisi khana endemu elikho mala emuluma.

²⁰Endaalo eya Wele Omunyali Owa Bioosi eliba ne sisiilima se buli buwaanga tawe, endaalo ekhafuumbe se liba ne kumuumu tawe.

²¹Wele Omunyali Owa Bioosi aloma ali, “Nabiila chinaikara che chi dini chenywe, se nyala nasangaalila libuusiana lienywe tawe.

²²Ne mwakhanderera biianwa bie khukhwosia ne biianwa bie biakhulia, se ndabifukiilila tawe, se ndafukiilila mundeerere bibiaayo bienywe binefu nga biianwa tawe.

²³Lekha khunjokesia ne kimienya kienywe, se nenya khurekeeresia kamatuungu kenywe tawe.

²⁴Ne kakhali lekha bung'ali bupwomookhe nga kameechi, ne buluungi nga kameechi ke mu nyanja.”

²⁵Omwami Owe Banamae aloma ali, “Baandu ba Isiraeli, mu miiko kamakhumi kane kino mwandererakho chimbosio ne biianwa mu sichiimi?

²⁶Ne luno, sikila mwasikamiile bifwaani bia Sakusi wele omwami wenywe, ne bia Kaiwani, eng'enieesi wele wenywe, nibio mwekholele mwabene

²⁷khwako ndamuyila mu mbaambe mu sibala siili embotookho wa Damasika.”