Read lubukusu Amo. 6 Bible Online

Amo. 6 - lubukusu bible

Amo. 6

¹Muli bubi mumenyile mu Sayuni, ne nanywe mu mwibona muli, muli ne kumuleembe mu Samaria. Enywe mumanyikhaane nga babaandu be khunyoa akari we chikholo, enywe nibo ba Isiraeli bechakho khulwe buyeeti!

²Cha mala mulole lukoba lwa Kaline. Mala muchiililile khukhwola mu lukoba lwa Hamasi ne khukhwiikha khucha Filisiti Lukoba lwa Kati. Chaba chindayi khukhila bubwami bwa Yuda ne Isiraeli Ku? Sibala siabwe siaba sikali khukhila sisienywe ku?

³Se musuubila muli endaalo eye butinyu elikho yiicha tawe, bikholwa bienywe bikila enyoe yoole.

⁴Muli bubi mulambisia khu bitaanda bie kimisaanga, ne chi naikara che kamameeme ne chimoosi.

⁵Mwasiima kimienya kie khukhwekhochoocha, nga Daudi nakholanga, ne khukimbila mu matuungu kenywe.

⁶Munywela endali khu pwakuli ne khurumikhira kamafura kaunya bulayi, ne se mulila khulwe lilionakwa lia Isiraeli tawe.

⁷Nio mulaba be khunyoa khucha mu mbaambe. Chinaikara chenywe ne biakhulia bienywe bie ekolooba bilawao.

⁸Omwami WELE omwene arusia likaambila likoosi ali, “Nabiila liliebonia lie ba Isiraeli, nalekelesia chinju chabwe chimboofu. Ekhare mu makhono ko musiku lukoba lwabwe nende buli siindu siilimo.”

⁹Ne kaaba bali babaandu ekhumi be nju ndala barama, balafwa.

¹⁰Ne omulebe ofwisiisie lundi owimeleele kamasika, alarusia kumubili munju. Omulebe alareeba oyo osikaale munju ali, “Okundi alimo ku?” Omundu oyo alakobosia ali, “Tawe.” Abwenao omulebe alaloma ali, “Sila busa! Khukhakhola khurio khwararakho lisina lia Wele Omunyali Owa Bioosi tawe.”

¹¹Nga Wele Omunyali Owa Bioosi naloma, chinju chimboofu ne chingeekhe chilatechukhaka.

¹²Chifarasi chinyala chatimila khu lwanda ku? Omundu anyala alima mu nyanja ne chieeyi ku? Ne kakhali enywe mwakaluukhasia siakhulia siaba buchiba, ne bulayi khuba bubi.

¹³Mwibonia muli mwaamba lukoba lwa Lotebari, ne khuloma muli, “Khwaba ne kamaani kanyala kaamba Karinaimu.”

¹⁴Wele Omunyali Owa Bioosi owe bunyali aloma ali, “Baisiraeli, ndaruma ekholo engeni khuamba sibala sienywe. Balamupia enywe siibi khukhwama khu silibwa sia Hamati khukhwola khu kheechi kha Araba.”