Read lubukusu Amo. 7 Bible Online

Amo. 7 - lubukusu bible

Amo. 7

¹Naba ne kamalola khukhwama khu Mwami WELE: Nabona sisusuuchu sie chisike niio omwami aba namalile khukhaa bunyaasi ne bele bwarakiikhe khusisina lundi.

²Mumalola kase nabona chisike chalia buli simelwa mu sibala, mala naloma ndi, “Ee Omwami WELE, beela babaandu bowo! Babaandu bowo bamenya bariena? Bali batiiti lukali lundi batekhele!”

³Wele Omunyali Owa Bioosi aakaluukhasia kamebaasio kewe ne khuloma ali, “Niko oboone se kalekholekha tawe.”

⁴Naba ne kamalola kakaandi khukhwama khu Mwami WELE. Namubona ne erekekha khuukuumila babaandu bewe kumulilo. Kwosia enyanja engali lukali mala kwarakikha khukhwosia ne sibala.

⁵Nio naloma ndi, “Lekha, ee Omwami WELE! Babaandu bowo bamenya bariena? Bali batiiti lukali lundi batekhele!”

⁶Wele Omunyali Owa Bioosi akaluukhasia kamebaasio kewe mala aloma ali, “Akhaba kano se kalekholekho tawe. Omwami WELE aalomile”

⁷Naba ne kamalola kakaandi khukhwama khu Wele Omunyali Owa Bioosi. Namubona emile e siisi nilio bombakha khulwe khurumikhira ekabilo ne ekabilo eyo yaba mukhono mwewe.

⁸Ne Wele Omunyali Owa Bioosi andeeba ali, “Amosi, olikho obona siina?” Nakobosia ndi, “Naboone ekabilo.” Nio Wele Omunyali Owa Bioosi aloma ali, “Ndakirumikhiranga khukhwekesia ndi babaandu base balinga lisiisi liliekhiikha. Se ndakaluukhasiakho lundi kamebaasio kase ke khubaukuuma tawe.

⁹Abuundu niio lisaaye lia Isaaka lisaayilanga alonakwa, abuundu owa Isiraeli atakatifu alonakakwa. Ndakamia bubwami bwo mwami Yeroboamu.”

¹⁰Amasia, omusaayi owa Beteli, aruma likhuwa khu Yeroboamu omwami owa Isiraeli ali, “Amosi alikho akhukwangwaanila ewe mu baandu. Lilomaloma liewe lilonaka sibala.

¹¹Kano niko aloma: ‘Yeroboamu alafwila mwiie, ne babaandu ba Isiraeli balaambwa bayilwe mu mbaambe.’ ”

¹²Nio Amasia aboolela Amosi ali, “Wanyalile orio, mung'oosi! Kobola e Buyuda mala ochiililile khung'oolela ebweeneyo. Lekha bakhuruunge khu niko ong'oola.

¹³Okhang'oolela mu Beteli muno lundi tawe. Ano ali abuundu wo mwami e khusaaya, Lukaangu lwe chikholo.”

¹⁴Nio Amosi amukobosia ali, “Ese sendi omung'oosi namwe omwana wo mung'oosi tawe. Ese ndi omwaayi, lundi omwaki we kimikhuyu.

¹⁵Ne Wele Omunyali Owa Bioosi ambukula khukhwama khu milimo kiase nga omwaayi ne khukhumboolela ali, ‘Cha ong'oole khu baandu base Isiraeli.’

¹⁶Nio luno rekeeresia niko Wele Omunyali Owa Bioosi aloma. Umboolela khulekha khung'oola, ne khulekha khuboolela babaandu ba Isiraeli bubi bwabwe.

¹⁷Amasia, Wele Omunyali Owa Bioosi akhuboolela ewe ali, ‘Omukhasi wowo alaba omutamba mu lukoba, ne babaana bowo balererwa mwiie. Sibala siowo silakabwamo mala siebwe babaandi, ne ewe wamwene olafwila mu sibala sikhamanyile Wele tawe. Ne babaandu ba Isiraeli ng'ali balaambwa bayilwe mu mbaambe.’ ”