Read lubukusu Amo. 8 Bible Online

Amo. 8 - lubukusu bible

Amo. 8

¹Naba ne kamalola kakaandi khukhwama khu Mwami WELE, anjekesia sikono sisichuule kamatuunda ke mu siimiyu.

²Wele Omunyali Owa Bioosi areeba ali, “Amosi, olikho obona siina?” Nakobosia ndi, “Naboone sikono sie kamatuunda ke mu siimiyu.” Nio Wele Omunyali Owa Bioosi amboolela ali, “Sisiakamo siechile khu baandu base ba Isiraeli. Se ndakaluukhasia kamebaasio kase ke khubaukuuma tawe.

³Khu ndaalo ng'eneyo kimienya kie mwichipi kilaba bililo. Bafu bakhandakane buli abuundu. Balisiikhwa sinywinywi.”

⁴Rekeeresia kano, enywe mupia siibi babanani, ne khukhaka khubunia bataambi mu sibala.

⁵Muloma muli, “Se khunyala khulindiilila chindaalo chindakatifu chibire nio khukusie biakhulia biefwe tawe. Esabato eliakama liina, nio khurakikhe khukusia lundi? Nio khuniinie bukusi, khurumikhire bipiimilo bie bubeeyi, ne khukhwonakaka bipiimilo bibea bakuli befwe.

⁶Nio khukharumikhire chirupia khukula bataambi ne biraaro bibili biili khwasie bikhakule omubanani, ne khukusia likhuuchi lie ngano.”

⁷Wele Omunyali Owa Bioosi, Wele owa Isiraeli, echubile ali, “Se ndibilila bikholwa biabwe bimayaanu tawe.

⁸Ne sibala sikhesisiikhe khulwa kano, ne buli mundu mu sibala alaba mu sibi. Sibala sioosi sikhatengaale, silenyokha ne khukwa nga luluuchi Naili.

⁹Siise silikho sicha nisio ndakhola enyanga ekwe mwiangilwe, ne sibala siilabule kumuusi. Ese Omwami WELE, nalomile.

¹⁰Ndakaluukhasia naikara chenywe chibe kamasika, ne kimienya kienywe kioosi kie busangaafu bube khulila khwe ngunyi. Ndamukhola mubeke kimirwe kienywe ne khufwara chingubo che kamakunia, ne mulaba nga basaasi balila omwana wabwe omuteelwa. Endaalo eyo eliba embi khukhwola khu siakamo.

¹¹Omwami WELE aloma ali, lola siise silikho siicha nisio ndareera enjala khu sibala, enjala elalia babaandu, ne se eli eye siakhulia tawe, balaba ne bulesia, ne se buli bwe kameechi tawe. Balaulila enjala ne bulesia bwe Lomo eya Wele Omunyali Owa Bioosi. Ese Wele Omunyali Owa Bioosi nalomile.

¹²Babaandu balayiiyayiiya khukhwama khu nyanja eye Kumuunyu khukhwola Mediterenia, lundi balatirimukha khukhwama e bunaswa khukhwola siafubo, khukhwama ebukwe khukhwola mumbo. Balayiima buli abuundu burume khukhwama khu Wele Omunyali Owa Bioosi, ne se balabunyoola tawe.

¹³Endaalo ng'ene eyo bakhaba basoleeli be kamaani ne bakhaana, balifwakho khulwe bulesia.

¹⁴Abo babechuba khu bifwaanane bia Samaria, ne baloma bali, ‘Khulwa wele owa Dani,’ namwe, ‘Khulwa wele owa Beerisheba’ babaandu abo balafwa.”