Read lubukusu Amo. 9 Bible Online

Amo. 9 - lubukusu bible

Amo. 9

¹Nabona Omwami Wele emile alubeka we alutare mala aloma ali, “Khupa lukali bisiindi bie Lukaangu nio kumusiingi kwesisiikhe. Bifunake bikwe khu mirwe kie babaandu boosi, nderera mwiie babaandu baramire ne se aliio olelukha tawe, akhaba na mulala salilukha tawe.

²Bakhacha emakoombe ndabarusiao. Bakhaniina mwikulu, ndabekhisia.

³Baakhekisa khu Sikulu Karimeli, ndabayiima mbanyoole. Bakhanjekisakho bacha mu nyanja, ndaboolela kunaninga kwe mu nyanja kubalume.

⁴Basiku babwe babayila mu mbaambe, ndabakhola babeere. Nakhalake khubabunia, se ndabayeeta tawe.”

⁵Omwami, WELE owe banamae, etiila khu sibala, mala siesisikha boosi bamenyilekho balila. Ne sibala sioosi sinyokha ne khukwa nga luluuchi Naili.

⁶Wele Omunyali Owa Bioosi ombakha lukoba lwewe mwikulu, aafuunikha sibala ne likulu alaanga kameechi ke nyanja mala akachukha khu sibala. Alaangwa bali Wele Omunyali Owa Bioosi!

⁷Wele Omunyali Owa Bioosi aloma ali, “Baisiraeli, Enywe khwise se muli nga Baesopia tawe ku?” Se nareera Baisiraeli khukhwama mu sibala sia Misiri, Filisiti khukhwama Kurete, ne Basiria khukhwama Kiri tawe ku?

⁸Lola ese, Omwami WELE ndaloleelelanga bubwami bwe bubwoni bwa Isiraeli, ne ndabwonaka burure khu sibala. Ne kakhali se ndabunia boosi be lisaaye lia Yakobo tawe.

⁹“Ndakhookha ne khusisikha Baisiraeli nga bachichunga nibio bakesile. Ndasisikha mu kholo choosi khurusiamo boosi bakhakhoyela tawe.

¹⁰Babooni boosi baali mu baandu base balererwa mwiie, abo baloma bali, ‘Wele se alafukiilila busiku bwosi bwosi bukhwichekho tawe.’ ”

¹¹ Wele Omunyali Owa Bioosi aloma ali, “Endaalo elikho yiicha niyo ndikobosia bubwami bwa Daudi, buuli nga enju yakwa yabuna. Ndang'oona kamasiisi kayo ne khukemekha. Ndakiombakha lundi ne khukikhola ebe nga yaba mataayi.”

¹²Wele Omunyali Owa Bioosi olakhola kano aloma ali, “Baisiraeli balaula sibala sisiarama sia Edomu ne chikholo choosi chichaba chichase.”

¹³Wele Omunyali Owa Bioosi aloma ali, “Chindaalo chilikho chiicha, nicho bimiichwa bichoa khangu kimisabibu kiosi kilachoa khangu mala endali enyoolekhanemo; ne endali enulu eleseletekha khukhwama mu bikulu, mala yiikhe khukhwama khu ngulu.

¹⁴Ndikobosia Baisiraeli base mu sibala siabwe. Balombakha lundi chingoba chabwe chichonakwa mala bamenyeyo, balabiaala kimisabibu ne khunywa endali, balabiaala mu mikuunda ne khulia bikhulamo.

¹⁵Khemekhe Baisiraeli babaandu base mu sibala nisio nabaelesia, ne se balirusibwamo lundi tawe.” Wele Omunyali Owa Bioosi, Wele wowo alomile.