Read lubukusu Obad. 1 Bible Online

Obad. 1 - lubukusu bible

Obad. 1

¹ Buno nibwo bung'oosi bwa Obadia. Kano niko Omwami WELE aloma khu kholo eya Edomu. Wele Omunyali Owa Bioosi arumire omurume wewe khu kholo chingali, ne efwe khwaulile burume bwewe buloma buli, “Yinyokha! Khuche mwiie khupane ne Edomu!”

²Wele Omunyali Owa Bioosi aboolela Baedomu ali, “Lola ndamumala enywe kamaani, buli mundu alamulekelesia.

³Ekibonio yenywe yamubeyile, enywe mumenyile mu ngulu angaaki, enywe muloma mu miooyo kienywe muli, ‘Naanu olikhuula efwe?’

⁴Mwakhombakha angaaki nga efuruusi, chinju chenywe chakhaba mu ngaaki nga ching'enieesi, kakhaba kario ndamuula.

⁵“Babefwi ne becha siilo, beeba nibio benya biong'ene. Babaandu ne babuta chisabibu, balekhangakho ndiiti. Ne kakhali basiku benywe bamubunisilie elala.

⁶Lisaaye lia Esau liamunuulile kimiaandu kienywe!

⁷Nibo mwaambana nabo boosi bamubeyile enywe, bamutimanie mwolile khu lwakha, basuubilwa benywe bamuulile enywe basaale benywe babeyikinwa bamurekire buko, mala enywe se mwamanyile tawe.

⁸“Khu ndaalo niyo ndiukuumilakho Edomu, ndibunia babaandu babwe bakesi, ne khubarusiamo limanya liabwe lioosi.

⁹Banamae be kamaani ba Temani baliterema, ne buli omunamae mu Edomu aliirwa.

¹⁰“Mulaambwa chisoni, mala mubunisibwe khulwa mindali, Sikila mwanuula ne khukhwira bawandaayenywe be lisaaye lia Yakobo.

¹¹Enywe mwema alubeka, mu ndaalo nicho basiku basutilamo kimiaandu kia Yerusalemu, Baakwa bengila mu bilibwa bie lukoba, mala baapa chikura khu Yerusalemu ne enywe mwaambana nabo.

¹²Andi se mwasangaala nga bawandaayenywe ne banyoola butinyu tawe. Andi se mwasangaala mu ndaalo nicho babaandu ba Yuda banyoolelamo butinyu tawe. Andi se mwefumia mu ndaalo che butinyu tawe.

¹³Andi se mwengila mu lukoba lwe babaandu base ne khu sangaalila butinyu bwabwe tawe, ne lundi khubanuula kimiaandu kiabwe khu ndaalo eye libuna liabwe tawe.

¹⁴ Andi se mwema niio chingila chakaananila khukhwira babelukha tawe, andi se mwaana babarama khu basiku babwe khu ndaalo eye butinyu bwabwe tawe.

¹⁵“Endaalo eli siimbi niyo Ese Wele Omunyali Owa Bioosi ndikhalakila chikholo choosi. Baandu ba Edomu, niko mukholile kakhekholekhe khwinywe nga nilwo mwakhola, mulikholelwa murio.

¹⁶Babaandu base banywelele endali endulu mu sikoombe siase sie siiukuumo khu lukulu lwase lutakatifu. Ne kakhali chikholo choosi chichaloondekhana chilanywa, sikoombe sie endali endulu lukali sie siiukuumo, balanywa boosi mala bakoriokhe.

¹⁷“Ne kakhali khu sikulu sia Sayuni balibao babebacha ne aliba Abuundu Atakatifu Babaandu ba Yakobo balinyoola kamaloba kabwe mu bung'ali.

¹⁸Babaandu ba Yakobo ne Yosefu baliba nga kumulilo, balibunia babaandu ba Esau nga kumulilo ne kwosia bichikhi ne mbao owe lisaaye lia Esau olirama tawe. Ese, Wele Omunyali Owa Bioosi nalomile.

¹⁹“Babaandu khukhwama e bunafubo owa Yuda balitila Edomu, ne abo khukhwama mu maayo mwe chingulu balitiila Filisiti, Baisiraeli balimenya mu bibala bia Efuraimu ne Samaria ne babaandu ba Benjamini balitiila Kileati.

²⁰Banamae khukhwama e bunaswa owa Isiraeli balikobola mala baule bamenyile mu Foenike khukhwola e Sarefati. Baambe khukhwama Yerusalemu baali mu Sarite balitiila chingoba chiili ebunafubo owa Yuda.

²¹Babaandu ba Yerusalemu be bukhili balibwaakala Edomu mala babamiie, ne Wele Omunyali Owa Bioosi omwene aliba Omwami.”