Read lubukusu Yon. 3 Bible Online

Yon. 3 - lubukusu bible

Yon. 3

¹Nio Wele Omunyali Owa Bioosi aaboolela Yona lukhola khabili ali,

²“Rekukha oche e Ninefe, lukoba luboofu olwo, mala oboolele babaandu burume nibwo khueleesie buno.”

³Khwako, Yona aaulila ka Wele Omunyali Owa Bioosi mala aarekukha aacha e Ninefe lukoba luboofu olwo. Lukoba luboofu olwo abeele lubukula chindaalo chitaru khukeenda khuulubiramo.

⁴ Ne kakhali Yona arakikha khukeendelesia khuubira mu lukoba lube lukeendo lwe ndaalo ndala. Nio aaboola mu mumilo kwe angaaki ali, “Mu ndaalo kamakhumi kane Ninefe lulabuna!”

⁵Ne babaandu be Ninefe basuubila burume bwa Wele. Nio bakhalaka bali buli mundu akhoya eeyimana khulia, mala babaandu boosi khukhwama khu bakhoongo khukhwola khu be asi, beboa chingubo che kamakunia, khukhwekesia bali bekaniile.

⁶Nga omwami owe Ninefe aaulila kamakhuwa ako, eenyokha khu ndebe yewe eye bubwami, eefuula ekanjo yewe eye bubwami, efwaala engubo eye likunia, mala eekhala asi mwikokhe.

⁷Aaruma likhuwa khu baandu be Ninefe ali, “Lino lili lilaka khukhwama khu mwami ne bakeekhe bewe. Se aliio oolalia sisiindu siosi siosi tawe, aakhaba chikhaafu ne kamakheese se bilaaya ne khuunywa tawe.

⁸Babaandu boosi befwaale kamakunia ne aakhaba bibiaayo bioosi khukhwola babiboe kamakunia. Buli mundu akhoya alilile Wele mu lieenya likali, lundi khukhwola buli mundu alekhe kimiima kiewe kie bumayaanu ne bikholwa biewe bie sisiayuumba.

⁹Wakaana Wele alakaluukhasia kamebaasio kewe, alekhe khuuba ne lirima nio efwe khukhafwa tawe!”

¹⁰Nga Wele ne abona ali baalekhile bumayaanu bwabwe, akaluukhasia kamebaasio kewe, mala khubauukuuma nga abeele alomile tawe.