Read lubukusu Khub. 1 Bible Online

Khub. 1 - lubukusu bible

Khub. 1

¹ Wele Omunyali Owa Bioosi alomaloma ne Musa mu sichiimi sia Sinai. Aalomaloma ne naye mwiiema lie kumuse khu ndaalo eye khunyoa, eye kumwesi kwe khabili kwe kumwiiko kwe khabili, enyuma we Baisiraeli khurura mu sibala sia Misiri. Aboolela Musa ali,

²“Bala babaandu ba Isiraeli boosi, khuloondekhana ne luuya ne chinju chabwe. Babale khuloondekhana ne bukali bwabwe, buli owe siseecha, mulala sia mulala.

³Bala buli owe siseecha owe bukhulu bwe kimiiko kamakhumi kabili namwe khukhilakhoo. Bala boosi mu Isiraeli banyala bacha mwiie, ewe ne Aruni, sipupu ne sipupu.

⁴Reeba omwimeelesi owa buli luuya khukhwama buli mu kholo akhuyeete.

⁵Kano niko kamasina ke babaandu bakhakhuyeete. Khukhwama mu kholo eya Rubeni, Elisuri okhwa Sheteuri.

⁶Khukhwama mu kholo eya Simioni, Shelumieli okhwa Surisiatai.

⁷Khukhwama mu kholo eya Yuda, Nasioni okhwa Aminatabu.

⁸Khukhwama mu kholo eya Isakari, Netaneli okhwa Suari.

⁹Khukhwama mu kholo eya Sebuluni, Eliabu okhwa Heloni.

¹⁰Khukhwama mu baana ba Yosefu, mu kholo eya Efuraimu, Elisiama okhwa Amihudi, ne khukhwama mu kholo eya Manase, Kamalieli okhwa Petausuri.

¹¹Khukhwama mu kholo eya Benjamini, Abitani okhwa Gidioni.

¹²Khukhwama mu kholo eya Dani, Aieseri okhwa Amisiatai.

¹³Khukhwama mu kholo eya Asieri, Pakieli okhwa Okirani.

¹⁴Khukhwama mu kholo eya Kati, Eliasafu okhwa Teueli.

¹⁵Khukhwama mu kholo eya Nafutali, Aira okhwa Enani.”

¹⁶Bano nibo babaroborwa khukhwama mu baandu ba Isiraeli. Baba babemeelesi be chikholo chabwe lundi babemeelesi be chinju cha Isiraeli.

¹⁷Musa ne Aruni, babukula babaandu babaroborwa bano.

¹⁸Mala khu ndaalo enyoa eye kumwesi kukhola khabili, babuusia babaandu boosi, ba andika kamasina kabwe khuloondekhana ne luuya ne chinju. Kamasina ke babaandu be siseecha be bukhulu bwe kimiiko kamakhumi kabili namwe khukhilakhoo, baandikwa, mulala sia mulala.

¹⁹Musa akhola nga Wele Omunyali Owa Bioosi ne alaka. Abalila babaandu mu sichiimi sia Sinai.

²⁰Ekholo eya Rubeni, omubele owa Yakobo babalwa. Be siseecha boosi, babanyala khucha liie mala ba baba ne bukhulu bwe kimiiko kamakhumi kabili ne khukhilakhoo babalwa. Babalwa khuloondekhana ne luuya ne chinju chabwe.

²¹Babaandu be ekholo eya Rubeni baba chielefu arubaine na sita ne chimia chiraano.

²²Ekholo eya Simioni babalwa. Babaandu boosi be siseecha be bukhulu bwe kimiiko kamakhumi kabili ne khukhilakhoo, abo ba baaba banyala khucha mwiie. Babalwa mulala sia mulala khuloondekhana ne luuya ne chinju chabwe.

²³Ekholo eya Simioni yaba chielefu khamusini na tisa ne chimia chitaru.

²⁴Ekholo eya Kati ebalwa. Babalwa be siseecha boosi be bukhulu bwe kimiiko kamakhumi kabili ne khukhilakho, ba baaba banyala khucha mwiie. Babalwa mulala sia mulala khuloondekhana ne luuya ne chinju chabwe.

²⁵Ekholo eya Kati yoosi yaba chielefu arubaine natano ne chimia sita ne kamakhumi karaano.

²⁶Ekholo eya Yuda babalwa. Babalwa be siseecha boosi ba baaba bukhulu bwe kimiiko kamakhumi kabili ne khukhilakhoo, ba baaba banyala khucha mwiie. Babalwa mulala sia mulala khuloondekhana ne luuya ne chinju chabwe.

²⁷Ekholo eya Yuda boosi baba chielefu sabini naine ne chimia sita.

²⁸Ekholo eya Isakari babalwa. Babalwa be siseecha boosi ba baaba bukhulu bwe kimiiko kamakhumi kabili ne khukhilakhoo, lundi ba baaba banyala khucha mwiie. Babalwa mulala sia mulala khuloondekhana ne luuya ne chinju chabwe.

²⁹Ekholo eya Isakari baba babaandu chielefu khamusini naine ne chimia chine.

³⁰Ekholo eya Sebuluni babalwa. Babalwa be siseecha boosi ba baaba ne bukhulu bwe kimiiko kamakhumi kabili ne khukhilakhoo lundi babanyala khucha mwiie. Babalwa mulala sia mulala khuloondekhana ne luuya ne chinju chabwe.

³¹Babaandu be kholo eya Sebuluni baba chielefu khamusini na saba ne chimia chine.

³²Ekholo eya Yosefu, be luuya lwa Efuraimu, babalwa. Babalwa be siseecha boosi ba baaba be bukhulu bwe kimiiko kamakhumi kabili ne khukhilakhoo, ba baaba banyala khucha mwiie. Babalwa khuloondekhana ne luuya ne chinju chabwe.

³³Ekholo eya Efuraimu baba babaandu chielefu arubaine ne chimia chiraano.

³⁴Ekholo eya Manase babalwa. Babalwa be siseecha boosi ba baaba ne bukhulu bwe kimiiko kamakhumi kabili ne khukhilakhoo lundi ba baaba banyala khucha mwiie. Babalwa khuloondekhana ne luuya ne chinju chabwe.

³⁵Ekholo eya Manase baba babaandu chielefu salasini na mbili ne chimia chibili.

³⁶Ekholo eya Benjamini babalwa. Babalwa be siseecha boosi ba baaba ne bukhulu bwe kimiiko kamakhumi kabili ne khukhilakhoo lundi ba baaba banyala khucha mwiie. Babalwa khuloondekhana ne luuya ne chinju chabwe.

³⁷Ekholo eya Benjamini baba babaandu chielefu salasini natano ne chimia chine.

³⁸Ekholo eya Dani babalwa. Babalwa be siseecha boosi ba baaba ne bukhulu bwe kimiiko kamakhumi kabili ne khukhilakhoo lundi ba baaba banyala khucha mwiie. Babalwa khuloondekhana ne luuya ne chinju chabwe.

³⁹Ekholo eya Dani baba babaandu chielefu sitini nambili ne chimia saba.

⁴⁰Ekholo eya Asieri babalwa. Babalwa be siseecha boosi ba baaba ne bukhulu bwe kimiiko kamakhumi kabili ne khukhilakho, lundi ba baaba banyala khucha mwiie. Babalwa khuloondekhana ne luuya ne chinju chabwe.

⁴¹Ekholo eya Asiera baba babaandu chielefu arubaine namocha ne chimia chiraano.

⁴²Babaandu be ekholo eya Nafutali babalwa. Babalwa boosi be siseecha ba baaba ne bukhulu bwe kimiiko kamakhumi kabili ne khukhilakhoo lundi ba baaba banyala khucha mwiie. Babalwa khuloondekhana ne luuya ne chinju chabwe.

⁴³Ekholo eya Nafutali baba babaandu chielefu khamusini natatu ne chimia chine.

⁴⁴Bano nibo ba babalwa ne Musa ne Aruni ne bayeetwa ne babemeelesi be Baisiraeli ekhumi na babili, buli mulala khukhwama mu kholo yewe.

⁴⁵Babaandu boosi babalwa. Babalwa boosi be siseecha ba baba ne bukhulu bwe kimiiko kamakhumi kabili ne khukhilakhoo lundi ba baaba ne banyala khucha mwiie mu Isiraeli.

⁴⁶Boosi baba chielefu chimia sita na chitaru, ne chimia chiraano ne kamakhumi karaano.

⁴⁷Ne kakhali Balawi se babalwa alala ne chikholo chichiindi tawe.

⁴⁸Sikila Wele Omunyali Owa Bioosi aaboolela Musa ali,

⁴⁹“Okhabala ekholo eya Lawi tawe.

⁵⁰Ne kakhali, bare mu bwimeelesi bwe liiema lia Wele Omunyali Owa Bioosi, ne bibiindu bilimo bioosi. Balisuta liiema lino ne bibiindu bialio bioosi. Balikhola ekambi yabwe ebotookhelele liiema lie ndakaano eya Wele Omunyali Owa Bioosi mala baliliinde.

⁵¹Buli lwosi ne muuya liiema, Balawi balilitikulula. Ne lundi buli lwosi nga liiema ne lienyekhana liombakhwe, Balawi nibo baliliombakha. Ne omundu okundi yesi yesi ne eseenda siimbi aliirwa.

⁵²Baisiraeli balikhola chikambi chabwe mu bipupu. Buli mundu mu sipupu siewe asi we pendera yabwe.

⁵³Ne kakhali Balawi bakhakhole ekambi ebotookhelele liiema lie ndakaano eya Wele Omunyali Owa Bioosi khu liliinda, nio Wele Omunyali Owa Bioosi alekhe khuaambila Baisiraeli lirima.”

⁵⁴Khwako Baisiraeli bakhola bario. Bakhola koosi khuloondekhana nga Wele Omunyali Owa Bioosi ne alaka Musa.