Read lubukusu Khub. 10 Bible Online

Khub. 10 - lubukusu bible

Khub. 10

¹Wele Omunyali Owa Bioosi aboolela Musa ali,

²“Khola chikhoombi chibili che efwesa eyosebwe ne kumukuba. Okhachirumikhire khulwe khulaanga babaandu alala ne lundi khulwe khukhola baandu barekukhe.

³Chikhoombi ne chiipwa chombi, babaandu boosi balibuusiana niio oli, a muliango kwe liiema lie kumuse.

⁴Ne baapa ekhoombi ndala yong'ene, babemeelesi be chikholo cha Isiraeli bong'ene balibusiana niio oli.

⁵Ne mupa chikhoombi khu siise sitiiti, chikholo chiili elubeka lwe bukwe chilirekukha.

⁶Ne ne mupa chikhoombi siise sitiiti lukhola khabili, chikholo chiili elubeka lwe ebunafubo chilirekukha. Babaandu ne benya khurekukha, chikhoombi chilipwanga khu siise sitiiti.

⁷Ne mwenya khulaanga babaandu boosi alala, chikhoombi chilipwa khu siise sileeyi.

⁸Babaana ba Aruni, basaayi, niibo bakhape chikhoombi. Lilaka lie chikhoombi liliba liloondwa mu selukho chenywe choosi.

⁹Ne mucha mwiie mu sibala sienywe, ne khu khuupana ne omusiku omunaania, khupa chikhoombi khu siise sitiiti. Ne mukhola murio Ese Wele Omunyali Owa Bioosi, Wele wenywe, ndimuyeeta ne khumuonia khukhwama khu basiku benywe.

¹⁰Lundi mu ndaalo chenywe che khoyo, ne mu naikara chenywe chicharoborwa nende che kumwesi, mulipa chikhoombi ne mulikho muaana biianwa bienywe bie khukhwosia ne chimbosio che biianwa bienywe bie kumuleembe. Biianwa bino bikhabe likhebusia khwinywe ebweeni wa Wele wenywe. Ese ndi Wele Omunyali Owa Bioosi, Wele wenywe.”

¹¹Mu mwiiko kukhola khabili, khu mwesi kukhola khabili, khu ndaalo ekhola kamakhumi kabili, enyuma we babaandu ba Isiraeli khurura e Misiri, lifuumbi liarura khu ngaaki khwe liiema lia Wele Omunyali Owa Bioosi.

¹²Baisiraeli barakikha lukeendo lwabwe khukhwama mu sichiimi sia Sinai khukhwama abuundu alala khukhwola aandi. Lifuumbi liecha liafuunikha sichiimi sia Parani.

¹³Barakikha lukeendo khuloondekhana ne lilaka lia Wele Omunyali Owa Bioosi khukhwama khu Musa.

¹⁴Nga barekukha, babanyoa khucha baba babaandu ba baaba asi we pendera eye ekholo eya Yuda. Barekukha mu bipupu biabwe. Omwimeelesi wabwe aba Nashoni okhwa Aminatabu.

¹⁵Ne Netaneli okhwa Suari aba omwimeelesi owe ekholo eya Isakari.

¹⁶Eliabu okhwa Heloni, aba omwimeelesi owe ekholo eya Sebuluni.

¹⁷Ne nga liiema lia Wele Omunyali Owa Bioosi ne liatikululwa ba okhwa Kerishoni ne ba okhwa Merari barakikha lukeendo.

¹⁸Ne ependera eye sipupu sia Rubeni yarekukha. Barekukha mu bipupu biabwe. Omwimeelesi wabwe aba Elisuri okhwa Sheteuri.

¹⁹Shelumieli okhwa Surisiatai aba omwimeelesi owe ekholo eya Simioni.

²⁰Omwimeelesi owe ekholo eya Kati aba Eliasafu okhwa Teueli.

²¹Nio Bakoati barekukha ne basutile bibiindu bitakatifu. Liiema lia Wele Omunyali Owa Bioosi lienyekhana liasimikhwa mu kambi ekiindi, nibo ne bakhoola tawe.

²²Babaloondakho, baba bali asi we pendera eye ekholo eya Efuraimu. Barekukha mu bipupu biabwe. Omwimeelesi wabwe aba Elisiama okhwa Amihudi.

²³Omwimeelesi owe ekholo eya Manase aba Kamalieli okhwa Petausuri.

²⁴Ne Abitani okhwa Gidioni aba omwimeelesi we ekholo eya Benjamini.

²⁵Ekhumaliilikha, ba baaba asi we pendera eye ekholo eya Dani barekukha. Niibo baba nga baliindi be lubeka lwe enyuma we bipupu bioosi. Barekukha mu bipupu biabwe. Omwimeelesi wabwe aba Ahieseri okhwa Amisiatai.

²⁶Ne omwimeelesi owe ekholo eya Ashera aba Pakieli okhwa Okirani.

²⁷Owemeelela ekholo eya Nafutali aba Ahira okhwa Enani.

²⁸Eyino niyo yaba engila niyo Baisiraeli barekukhilamo, khuloondekhana ne bipupu biabwe.

²⁹Musa aboolela mukhwewe Hobabu, okhwa Reueli, Omumidiani ali, “Khulikho khucha abuundu niio Wele Omunyali Owa Bioosi aloma ali alakhukhuelesia efwe. Yiicha oche ne nafwe. Efwe khula khukholela kamalayi, sikila Wele Omunyali Owa Bioosi alakile Baisiraeli kamalayi.”

³⁰Ne kakhali Hobabu aloma ali, “Se endacha nanywe tawe. Ndikho ngobola mu sibala siase ne mu baandu base.”

³¹Musa aloma ali, “Nosiima okhakhulekha tawe. Ewe omanyile nga khunyala khwombakha ekambi mu sichiimi. Ewe onyala wakhurangirira.

³²Ne waaba bali ocha nafwe, kamalayi niko Wele Omunyali Owa Bioosi akhakhukholele efwe, fwesi khukhakhukholele ewe.”

³³Babaandu barura khu sikulu sia Wele Omunyali Owa Bioosi bacha lukeendo lwe chindaalo chitaru. Lisanduku lie ndakaano eya Wele Omunyali Owa Bioosi liarangira ebweeni wabwe khu ndaalo chitaru echo khuyiima abuundu niio banyala bombakha ekambi.

³⁴Ne lifuumbi lia Wele Omunyali Owa Bioosi liaba angaaki wabwe kumuusi buli lwoosi nga barekukhanga khukhwama mu kambi.

³⁵ Buli lwosi nga Lisanduku lie ndakaano ne liarekukhanga Musa alomalomanga ali, “Yinyokha, Ee Wele Omunyali Owa Bioosi, mala basiku bowo basalanikhe. Lekha abo ba bakhubiila bakhwilukhe.”

³⁶Ne buli lwosi nga Lisanduku lie ndakaano ne liemanga, alomanga ali, “Kobola, Ee Wele Omunyali Owa Bioosi, khu baandu bowo ba Isiraeli bali bakali, bakhabalikha tawe.”