Read lubukusu Khub. 11 Bible Online

Khub. 11 - lubukusu bible

Khub. 11

¹Babaandu barakikha khukhweng'ulung'unya khu Wele Omunyali Owa Bioosi khulwe butinyu bwabwe. Wele Omunyali Owa Bioosi nga ne aulila, aambwa lirima mala aruma kumulilo kwewe kwaburukha akari wabwe. Kumulilo kuno kwosiakho chindulo che ekambi yabwe.

²Nio babaandu baalilila Musa, mala Musa asaaya Wele Omunyali Owa Bioosi, kumulilo kwasima.

³Khwako abuundu ao alaangwa Tabera[1], sikila kumulilo kwa Wele Omunyali Owa Bioosi kwaburukha akari wabwe.

⁴Nono babaandu be situluungu ba baaba mu Baisiraeli baba ne kumuluungo kumukali kwe khulia. Ne Baisiraeli bosi barakikha khulila lundi baloma bali, “Khaba khwanyoolakho enyama khwalia!

⁵Khukhebulila ching'eeni nicho khwalia busa e Misiri ne khukharuungakho sisiindu tawe. Malenge, kamaoondo, chinyenyi, bituungulu, ne bituungulu bia saumu.

⁶Ne luno se khulikho ne kamaani tawe. Mbao nisio khunyala khwalia tawe ne ekhali mana yino yong'ene.”

⁷ Nono mana yino yaba nga bumiicho butiiti bwe kamaemba ne yafwaanana ne buboche.

⁸Babaandu babuusianga mana mala bakisia khu lususi namwe bakichungila mu bibwiili. Ne basiele bakitekhelanga mu ndekheelo mala bakholamo chikeki. Ne bunulu bwe mana bwaba nga bunulu bwe chikeki, chichakholwa ne kamafura.

⁹ Nga luume ne lwamanga khu kambi mu silo, mana yakwa ne nalwo.

¹⁰Musa aulila babaandu ne balila chinju chabwe ne buli mundu a muliango kwe liiema liewe. Wele Omunyali Owa Bioosi aambwa lirima likali ne Musa abona bubi.

¹¹Musa areeba Wele Omunyali Owa Bioosi ali, “Siina sikila ne ukholele ese omukholi wowo kamabi? Siina sikila ne ekhanyoolile kumwalaalo ebweeni wowo tawe? Siina sikila ne underekho busiro bwe babaandu bano boosi?

¹²Ese niye owaesia babaandu bano? Ese niye owabasaala, nio ewe umboolele oli mbalele nga omulesi ne alela omwana omung'aalia, khukhwola mu sibala nisio walaka bakuuka babwe?

¹³Naamia waena enyama niyo nyala naelesia babaandu bano boosi? Sikila balikho bandilila bali ese mbaelesie enyama balie.

¹⁴Seng'ene se nyala khusuta babaandu bano tawe. Buli busiro bukali khwise.

¹⁵Ne waaba ne ukholela kano, khusaba unjire siise sino nio ndekhe khubona butinyu bwase.”

¹⁶Wele Omunyali Owa Bioosi aboolela Musa ali, “Mbusilie babaandu kamakhumi saba bamanyikhaane khwiwe nga basaakhulu be Baisiraeli. Bareere a liiema lie kumuse mala wimeo nabo.

¹⁷Ndekha asi mala ndomalome ne nawe abwenao. Ndabukulakho roho oli khwiwe mala mure khu nibo. Ne balikhuyeeta khusuta busiro bwe babaandu nio ewe olekhe khubusuta weng'ene.

¹⁸Ne boolela babaandu oli: Yikwalaasia mwabene sikila kumuchuli, mukhalie enyama. Enywe mwalilile mala Wele Omunyali Owa Bioosi aaulile. Mwalomile muli, ‘Naanu olakhuelesia enyama khulie? Khwaba bulayi mu Misiri.’ Khwako Wele Omunyali Owa Bioosi alabaelesia enyama mala mulie.

¹⁹Se mukhalie khulwe ndaalo ndala yong'ene namwe chibili, namwe chiraano, namwe likhumi namwe akhaba chindaalo kamakhumi kabili tawe.

²⁰Ne kakhali mulikilia khulwe kumwesi kwoosi nabwila nga ne eli mururira mu moolu, ne khumusinya. Lino licha khwikholekha sikila mwalobile Wele Omunyali Owa Bioosi oli mwinywe lundi mwengu'lung'unya muli, ‘Siina sikila ne khwarura e Misiri?’ ”

²¹Musa aaboolela Wele Omunyali Owa Bioosi ali, “Babaandu nibo ndakeendanga ne nabo bali chielefu chimia sita, mala ewe oloma oli, ‘Ocha khubaelesia enyama balie khu mwesi kwoosi.’

²²Chikhaafu ne kamakheese kanyala kerwa kaboola ku? Namwe ching'eeni choosi chinyala chalobwa chaboola ku?”

²³Nio Wele Omunyali Owa Bioosi akobosia Musa ali, “Siindu siina sinyala siakhaya Ese? Nono olabona elomo yase ne elaba eya ng'ali namwe tawe.”

²⁴Nio Musa arura enje aboolela babaandu niko Wele Omunyali Owa Bioosi aaloma. Mala abuusia babemeelesi be Baisiraeli kamakhumi saba abakhola bema babotookhelela liiema lie kumuse.

²⁵Nio Wele Omunyali Owa Bioosi ekha asi mwifuumbi mala alomaloma ne Musa. Abukulakho roho eyaba khu Musa mala akielesia babemeelesi kamakhumi saba. Ne roho nga abechakho bang'oola. Ne kakhali se bachiililila tawe.

²⁶Nono babaandu babili baba barama mu kambi. Baba Elidadi ne Medadi. Roho abechakho baba balala khu bemeelesi kamakhumi saba. Ne kakhali se bacha a liiema lie kumuse tawe, nio bang'oola mu kambi.

²⁷Omusoleeli mulala atima acha aboolela Musa ali, Elidadi ne Medadi balikho bang'oolela mu kambi.

²⁸Ne Yoshua okhwa Nuni, owaba omuyeeti owa Musa khukhwama mu buele bwewe, aboolela Musa ali, “Omwami wase Musa, bakaanie!”

²⁹Ne kakhali Musa amureeba ali, “Ewe obuba siina? Andi ese obubile. Nikoomba ndi babaandu ba Wele Omunyali Owa Bioosi boosi babe bang'oosi ne Wele Omunyali Owa Bioosi abaelesie Roho wewe!”

³⁰Nio Musa alala ne basaakhulu ba Isiraeli bakobola mu kambi.

³¹Ne Wele Omunyali Owa Bioosi arumania embeo yareera chisiindu khukhwama mu nyanja chakwa embi ne kambi, ambi buleeyi bwe lukeendo lwe endaalo ndala lubeka olu, ne lukeendo lwe endaalo ndala ekiindi lubeka luluundi, khubotookhelela ekambi, mala choola embi emita ndala khukhwama khwiloba.

³²Babaandu benyokha endaalo ng'eneyo yoosi, ne silo sioosi, ne ndaalo eyaloondakho yoosi, baamba chisiindu. Owatiila ndiiti khukhila babasie atiila chechula chindubi chibili, mala bachanikhila enje choosi khubotookhelela ekambi.

³³Ne basiili ne enyama mu meno kabwe; ne basiili khukinyanya tawe, lirima lia Wele Omunyali Owa Bioosi liaburukha khu nibo. Wele Omunyali Owa Bioosi abareerera butinyu bukali.

³⁴Elio liakila lisina lie abuundu ao lialaangwa Kiburoti-Hataaba, sikila abwenao niio basiikha babaandu be kumuluungo kwe enyama.

³⁵Khukhwama Kiburoti-Hataaba babaandu bakeenda boola Haseroti, bakholao ekambi.