Read lubukusu Khub. 12 Bible Online

Khub. 12 - lubukusu bible

Khub. 12

¹Musa akhwa omukhasi Omukushi. Nio Miriamu ne Aruni bamwikiicha.

²Bareeba bali, “Ng'ali Wele Omunyali Owa Bioosi alomalome khubirira khu Musa yeng'ene? Se alomalome khubirira khwifwe fwesi?” Wele Omunyali Owa Bioosi aulila kano.

³Musa aaba omuolu lukali khukhila babaandu boosi be khu sibala.

⁴Wele Omunyali Owa Bioosi alomaloma ne Musa, Aruni, ne Miriamu, “Yiicha enywe bataru a liiema lie kumuse.” Mala bataru abano barura enje.

⁵Ne Wele Omunyali Owa Bioosi ekha asi mwifuumbi, eema amuliango kwe liiema lie kumuse mala alaanga Aruni ne Miriamu. Bombi besende ebweeni.

⁶Wele Omunyali Owa Bioosi aloma ali, “Nono rekeeresia kamakhuwa kase: Omung'oosi aaba ne aliio akari wenywe, Ese Wele Omunyali Owa Bioosi nyala neyekesiana samwene khu niye mu malola. Ndomalome naye mu marooro.

⁷ Ne se kali kario khu mukholi wase Musa tawe. Namweyikina khukhwimeelela Baisiraeli boosi.

⁸Khu niye ndomalomanga naye moni na moni, se kali musimo tawe. Lundi abona lukoondo lwase! Siina sikila nono ne mukharire khukhwikiicha omukholi wase Musa?”

⁹Lirima lia Wele Omunyali Owa Bioosi liaba likali khu nibo mala arekukha.

¹⁰Ne nga lifuumbi lienyokha khu liiema lie kumuse, Miriamu aba ne bulwaale bwe kamakele kumubili kwoosi. Kwaba kumuwaanga chwe, nga kamaarara. Ne Aruni alola Miriamu mala amubona ali ne bulwaale bwe kamakele.

¹¹Aboolela Musa ali, “Nosiima, Wele Omunyali Owa Bioosi, okhakhuelesia kumunaanio tawe sikila khwakholile bumayaanu mu busilu.

¹²Okhamulekha afwaana nga owafwa tawe. Okhamulekha abe nga owonakwa kumubili lubeka lulala nga ne asaalwa khurura munda mwa maawe tawe.”

¹³Nio Musa alilila Wele Omunyali Owa Bioosi, “Ekhusaba omuonie ee Wele.”

¹⁴ Ne kakhali Wele Omunyali Owa Bioosi aboolela Musa ali, “Kaaba bali raraawe amufucha kamare mu moni, andi se akhabeele ne chisoni khu ndaalo saba? Lekha ekalilwe enje we ekambi chindaalo saba. Ne chiweele anyala akalusibwa mu kambi lundi.”

¹⁵Nio Miriamu ekalilwa enje we ekambi khu ndaalo saba. Ne babaandu se bachiililila ne lukeendo tawe khukhwola nga ne bareera Miriamu mu kambi.

¹⁶Enyuma wako babaandu barekukha khukhwama e Heseroti, mala baapa ekambi mu sichiimi sia Parani.